سالەمەتسىز بە, سايات اعا؟ ءسىزدىڭ شىعارماشىلىعىڭىز قاتتى ۇنايدى. بىراق, كەيىنگى كەزدە جاڭا اندەرىڭىزدى ەستىمەيتىن بولدىق. قازىر قايداسىز؟
اياۋلىم ازيبەكوۆا, ستۋدەنت
قازىر جاستاردىڭ كوبى ارزان ءسوزدى اندەرگە قۇمار بولىپ كەتتى. مەنىڭ وندايعا جولاعىم كەلمەيدى. ءسوزدىڭ سالماعى بولعانى دۇرىس قوي. ەكىنشىدەن, جاڭا ءان جازدىرماي جاتقانىم جوق. جازدىرىپ جاتىرمىن. كوبىنەسە «قازاق راديوسى» مەن «شالقاردان» بەرىلىپ تۇرادى.
ەسترادا جۇلدىزدارىنىڭ اراسىنان قازاقي, قاراپايىم بولمىسپەن ونەردە وزىندىك قولتاڭبا قالىپتاستىرعان ءانشىسىز. شىعارماشىلىق كەشىڭىزدى قاشان وتكىزەسىز؟
ايىم كاريموۆا, وقىرمان
ول ويدا بار. بيىل كۇزدە جوسپارلاپ وتىرمىن. بۇل – قاراجاتتىڭ ىڭعايىنا قاراي جۇزەگە اساتىن جۇمىس.
انشىلەردىڭ كوبى «ەكى جۇلدىز», «كەش جارىق» سىندى جوبالارعا قاتىسىپ ءجۇر. سونداي شوۋلاردان ءسىزدى نەگە كورمەيمىز؟
ينارا ارمانقىزى, وقىرمان
– بىرىنشىدەن, ول شوۋلارعا شاقىرماعانىنا قاتتى قۋاندىم. ەكىنشىدەن, سوعان قاتىسۋعا اسا ءبىر قۇلقىم دا جوق. «ەكى جۇلدىزعا» قاتىسار بولساڭ, ۇيىمداستىرۋشىلار نە كي دەسە, سونى كيىپ, نە ىستەسە دەسە, سونى ىستەۋگە ءماجبۇرسىڭ.
ءبىر سۇحباتىڭىزدا دوستارىم «اۆتوسىنشى» دەپ اتايدى دەپسىز. وسى ۋاقىتقا دەيىن قانشا كولىك ءمىندىڭىز؟
ەراسىل قاجىحانوۆ, وقىرمان
– اۆتوكولىكتەرىمنىڭ ۇزىن-سانى جيىرماعا جەتىپتى. بايلىعىم تاسىپ بارا جاتقاننان نەمەسە ماقتانعاننان ەمەس, كولىكتى قاتتى جاقسى كورەمىن. نەگە ەكەنىن بىلمەيمىن, استىمداعى كولىگىم اياقاستى ۇناماي قالادى. سودان نە ساتىپ جىبەرەم نەمەسە اۋىستىرامىن. مەنىڭ «اۆتوقۇمارلىعىمدى» دوستارىم دا ءبىلىپ الىپ, قالجىڭداپ «اۆتوسىنشى» دەيدى. قازىر انشىلەر كولىك الاتىن بولسا, بىردەن مەنى شاقىرادى.
بەينەبايانىڭىز نەگە جوق؟
جۇلدىز جۋماشكينا, وقىرمان
سول بەينەباياندى ءتۇسىرۋ كەرەك پە دەپ ويلانىپ ءجۇرمىن. ەلدىڭ ءبارىنىڭ سۇرايتىنى – بەينەبايان. بولاشاقتا تۇسىرەمىن. جالپى, بەينەبايان – ادامنىڭ قۇلاق قۇرىشىن قاندىرىپ, كوزىن تالدىراتىن نارسە بولۋى كەرەك.
قازاق ەسترادا انشىلەرىنىڭ كوپشىلىگى ساحنادا قوزعالا المايدى دەگەن سىني پىكىر ءسىزدى دە اينالىپ وتپەگەن سياقتى…
شىنار ەلۋباەۆا, وقۋشى
مەن ءبيشى ەمەس, ءانشىمىن عوي. بيلەپ ۇياتقا قالعانشا, حالىقتىڭ الدىنا شىعىپ ءانىمدى جاقسى ورىنداپ بەرسەم بولدى. ەلگە ۇنامايتىن ءان ايتىپ جاتقان جوقپىن. بيلەيتىندەي رەپەرتۋارىمدا كوڭىلدى اندەر دە كوپ ەمەس. ليريكالىق ءان ايتىپ تۇرىپ قالاي بيلەيسىڭ. ارتىڭدا بي قويدىرۋ دۇرىس شىعار, ونى بولاشاقتا كورە جاتارمىز. بىراق مەنىڭشە, ەڭ الدىمەن شىعارماشىلىققا كوڭىل ءبولۋ قاجەت. نەگىزگى سالماقتى رەپەرتۋارعا سالامىن.
قاراپايىم كورەرمەن رەتىندە قاي انشىلەردى تىڭدايسىز؟
ارايلىم سماعۇلوۆا, بۋحگالتەر
قازاقي, سانالى دۇنيە جەتكىزىپ جاتقان ءانشىنىڭ ءبارىن جاقسى كورەمىن. انشىلەردى انىنە قاراي تىڭدايمىن. جانىما جاقىن ءان ايتسا, ءبارىن تىڭداۋعا دايارمىن. كەزىندە دوسىمجان تاڭاتاروۆتىڭ ورىنداۋىنداعى «جەتەيىن دەسەم, جەتە الماي» دەگەن ءاندى كوزىمىزگە جاس الىپ, تىڭداعان كەزىم بولعان. «ەل ماقتاعان جىگىتتى قىز جاقتاعان» دەمەكشى, مەيرامبەكتىڭ دە اندەرى ادەمى.
سايات اعا, جەكە بيزنەسىڭىز بار ما؟
ارداگەر ەسەنۇلى, ستۋدەنت
– الىپ بارا جاتقان بيزنەس جوق. جالپى, قاي قازاقتىڭ بولسىن, مالجاندى كەلەتىنى راس. مەنىڭ دە شاما-شارقىم كەلگەنشە مال كۇتىپ-باپتايتىنىم بار. اۋىلدا شارۋاشىلىعىمىز بار.
سپورتپەن شۇعىلداناسىز با؟
نۇراسىل ەرنارۇلى, وقۋشى
– مەن سپورتشى بولسام دەۋشى ەدىم. اۋىلدا بوكستان سپورت سەكتسياسى اشىلىپ, سوعان قاتتى بارعىم كەلدى. بىراق, ۇيدە مالعا قارايتىن ەشكىم بولماي, بارا المادىم. ەرىكسىز ۇيدە شتانگا كوتەرىپ, سودان بويىم وسپەي قالدى (كۇلدى).
ارىپتەستەرىڭىزدەن كىمدەرمەن جاقسى ارالاساسىز؟
گۇلىم بولاتقىزى, وقۋشى
ءبىر ساحنادا جۇرگەن سوڭ بارلىعىمەن بىردەي ارالاسۋعا تىرىسامىن. كورگەن جەردە سالەمىمىز ءتۇزۋ. تەاتر ارتىستەرىمەن جاقسى ارالاسامىن. بەكجان اعامىز بار, دۋلىعا, ەرلان تاعى باسقالارى بار.
ازىرلەگەن
ەركەجان كوپتىلەۋقىزى
