ءوز-ءوزىڭدى قۇرباندىققا بايلاۋ سوڭعى ۋاقىتتاعى ءساننىڭ ەڭ سوراقى كورىنىسىنە اينالدى. بۇلاي دەۋىمىزدىڭ سەبەبى دە جوق ەمەس. استاناداعى كوپىردىڭ ۇستىنە شىعىپ, سەلفي جاساماقشى بولعان جاسوسپىرىمدەردىڭ ارەكەتىنەن سوڭ جاعامىزدى ۇستادىق. بۇرىن تەك شەتەلدەگى مىسالداردى عانا ەستيتىن ەدىك قوي. ەندى ءبىزدىڭ بالالار دا وسى ترەندتىڭ تىرناعىنا ىلىگىپتى.
قابانباي باتىر داڭعىلى بويىنداعى كوپىرگە ورمەلەپ, تومەندەگى كىسىلەرگە قول بۇلعاپ تۇرعان ءۇش جەتكىنشەكتى ىشكى ىستەر دەپارتامەنتىنىڭ قىزمەتكەرلەرى تەز ارادا قۇتقاردى. كامەلەتكە تولماعانداردىڭ اتا-انالارى پوليتسياعا شاقىرىلىپ, ءتۇسىندىرۋ جۇمىستارى جۇرگىزىلدى. الگى سابازدارىڭنىڭ سونداعى ايتقانى – «مىقتى سەلفي تۇسىرگىمىز كەلگەن». كۇلەسىڭ بە, جىلايسىڭ با؟!
جازىم – اياق استىندا. قايعىنى ەشكىم تىلەپ المايدى. سانكت-پەتەربۋرگ قالاسىنىڭ سۇيكىمدى بويجەتكەنى كسەنيا يگناتەۆا دا اجالىنىڭ سەبەپكەرى سەلفي بولارىن سەزبەگەن شىعار. پيتەردىڭ كورىكتى جەرلەرىن سۋرەتكە ءتۇسىرىپ, عالامتورعا جاريالاۋعا ابدەن اۋەستەنگەن ارۋ دوستارىن تاڭعالدىرۋ ءۇشىن بيىك كوپىردىڭ جاقتاۋىنا ءمىنىپ, قۇس قاناتتى سەلفي جاساماقشى بولعاندا, اياعى تايىپ كەتكەن. تومەن قۇلديلاپ بارا جاتىپ جالاڭاش قولىمەن ەلەكتر جەلىسىنە جارماسقان قىزدى قۋاتى كۇشتى توق اياعان جوق.
جان تۇرشىكتىرەر وقيعالاردىڭ ءبىرى بىلتىر ءۇندىستاننىڭ ۋتتار-پرادەش شتاتىنداعى تەمىرجول بويىندا بولدى. ءۇش ستۋدەنت جاقىنداپ كەلە جاتقان پويىزبەن بىرگە سۋرەتكە تۇسكىلەرى كەلگەن. فوتونىڭ ءساتتى شىعۋى ءۇشىن بارىن سالعان جىگىتتەر پويىزدىڭ جاقىنداعانىن بايقاماي قالعان. ءسويتىپ, دەلي قالاسىنان اگراعا قاراي جول تارتىپ, ءتاج-ماحال كەسەنەسىنە بارعىسى كەلگەن ءۇش دوس قىرشىنىنان قيىلدى.
تۇركياداعى سەلفيشىل جاستاردىڭ ەسسىز ارەكەتى دە ورنى تولماس وكىنىشپەن اياقتالعان. الانيادان انتالياعا دەمالۋعا كەلگەن بەس جىگىت ۇيگە قايتار جولدا اسفالت ۇستىنە جاتىپ, سەلفيگە تۇسپەك بولادى. ال جۇيتكىپ كەلە جاتقان جۇك كولىگى ولاردى كورمەي, ەكەۋىن باسىپ كەتىپتى. قالعان ۇشەۋى اجال اۋزىنان ازەر قۇتىلعان. قايتىس بولعان جىگىتتەردىڭ ءبىرى ون جەتىدە, ەكىنشىسى ون توعىزدا.
«ساقتانساڭ, ساقتايمىن» دەمەي مە مۇندايدا قازاق؟!
بوتاگوز ماراتقىزى
