قالا اكىمى جەدەل مەديتسينالىق جاردەم ستانساسىنا شاقىرعان جەرگە 10 مينۋتتا جەتۋ جونىندە مىندەت جۇكتەگەنى بەلگىلى. بۇگىندە بۇل سالانى دامىتۋعا بايلانىستى بىرقاتار شارۋالار قولعا الىنعان.
قالا تۇرعىندارىنىڭ كوپشىلىگى جەدەل جاردەمنىڭ قىزمەتىنە ەمەس, جەدەل جەتۋىنە كوبىرەك شاعىم ايتادى. بىراق جەدەل توپتى شاقىرعان ادام وزىنە «مەن راسىمەن جەدەل جاردەمنىڭ كومەگىنە مۇقتاجبىن با؟» دەپ سۇراق قويىپ كوردى مە ەكەن؟ ولاي دەيتىنىمىز, شاقىرتۋلاردىڭ 60 پايىزى جەدەل مەديتسينالىق كومەكتى قاجەت ەتپەيتىن شاقىرتۋلار ەكەن. مىسالى, ءتىسىڭ اۋىرسا, قىزۋىڭ كوتەرىلسە, جەرگىلىكتى ەمحاناعا بارسا جەتكىلىكتى.
نەگىزى, شاقىرتۋلاردىڭ كوبى كەشكى ساعات 18.00-دەن تۇنگى 23.00-دەيىنگى ارالىقتا بولادى. ال ماماندار جول اپاتىنا ءتۇسىپ, ءومىر مەن ءولىم اراسىندا جاتقان جاندارعا الدىمەن بارادى.
جالپى قالالىق جەدەل مەديتسينالىق جاردەم ستانساسى ءبىر مينۋتتا ەكى شاقىرتۋ قابىلدايدى ەكەن.
بۇگىندە قالا بويىنشا 14 پودستانسا بار. ساتىپ الىنعان سانيتارلىق كولىكتەردىڭ ءبارى ولاردىڭ ءارقايسىسىنا بولىنگەن. ەندى تاعى ءۇش ستانسا اشۋ جوسپارلانعان. الداعى ۋاقىتتا قالالىق ەمحانالارعا دا وسىنداي كولىكتەر بەرىلمەك. ولار وزدەرىنە بەكىتىلگەن اۋماقتاعى شاقىرۋلارعا بارىپ, جۇرتشىلىققا مەديتسينالىق كومەك كورسەتەدى.
الداعى قىس ايلارىنىڭ بىرىندە ەسىلدىڭ سول جاعالاۋىندا تاعى ءبىر جەدەل جاردەم ستانساسىن اشۋ جوسپاردا تۇر. بۇل ۇلكەن ديسپەتچەرلىك ورتالىق رەتىندە قۇرىلادى. ونىڭ ءبىر بولىگى تەك جەدەل جاردەمگە ارنالسا, ەكىنشى ءبولىمى تەلەفون سوققان تۇرعىندارعا مەديتسينالىق كەڭەس بەرەتىن ورتالىق بولماق.
قىمبات توقتامۇرات
