جاسارتۋ تەحنولوگياسى ەنگىزىلەدى
استانا مەن كورەي رەسپۋبليكاسىنىڭ ماماندارى ءوزارا ارىپتەستىك جونىندەگى مەموراندۋمعا قول قويدى. سونىڭ اياسىندا №2 قالالىق اۋرۋحانا بازاسىندا كورەيانىڭ چاۋم كلينيكاسىنىڭ ءبىر ورتالىعى اشىلماق.
استانا قالاسى دەنساۋلىق ساقتاۋ باسقارماسىنىڭ باسشىسى ەرىك ءبايجۇنىسوۆتىڭ ايتۋىنشا, وسى ورتالىق ىسكە قوسىلعاننان كەيىن ەمدەلۋ ءۇشىن كورەيا, گەرمانيا سىندى ەلدەرگە كەتىپ جاتقان وتانداستارىمىز ءوز ەلىمىزدە ەم قابىلدايتىن بولادى.
جالپى وڭتۇستىك كورەيانىڭ چاۋم كلينيكاسى اعزانىڭ قارتايۋىنا بايلانىستى تۋىندايتىن اۋرۋلاردى ەمدەۋ, ادامدى جاسارتۋ تەحنولوگيالارىمەن الەمگە تانىمال. بۇل جاعىنان كورەيلەر تالاي ەلدىڭ مەديتسيناسىن 10-15 جىلعا ارتقا تاستاپ كەتتى.
ارينە, كورەيالىقتاردىڭ تاجىريبەسىن ۇيرەنگەن ءبىزدىڭ ماماندار دا ەمدەۋدىڭ ەرەك ءتاسىلىن يگەرەتىن بولادى.
كورەيادا دىڭگەكتى جاسۋشالار (ستۆولوۆىە كلەتكي) كومەگىمەن ەمدەۋ ءتاسىلى ەرەكشە دامىعان. بۇل ءادىس, اسىرەسە, ادامدى جاسارتۋعا, ءاجىمدى كەتىرۋگە ءجيى قولدانىلادى.
№2 قالالىق اۋرۋحانادا كورەيالىقتار ورتالىق اشسا, وندا تەگىن مەديتسينالىق كومەكتىڭ كەپىلدەندىرىلگەن كولەمى شەڭبەرىنە كىرەتىن سىرقاتتار تەگىن ەمدەلەدى. البەتتە, كوسمەتولوگيا سالاسىنا قاتىستى قىزمەت كورسەتۋلەر اقىلى نەگىزدە ءجۇرگىزىلەدى.
جالپى شىعىس مەديتسيناسى الدىمەن اۋرۋدىڭ وزىمەن ەمەس, ونىڭ شىعۋ سەبەبىمەن كۇرەسەدى, ادامنىڭ اعزاسىن تۇتاس ەمدەيدى. دەمەك, بۇل كلينيكانىڭ ەل ازاماتتارىنا كومەگى كوپ بولارى ءشۇباسىز.
قىمبات توقتامۇرات