جىلدا مەرەكە قارساڭىندا كوپتەگەن ستۋدەنت دوستارىمىز ۇيلەرىنە قايتۋعا بيلەت ىزدەپ الەككە تۇسەدى. جىل سايىن قايتالاناتىن كورىنىس قوي دەپ كوبىسىنىڭ ءتوزىمى بۇعان توسەلىپ تە كەتكەن. جاڭا جىلدى پويىزدا, اۆتوبۋستا, ۇشاقتا ءتىپتى بولماسا, ۆوكزالدىڭ وزىندە-اق قارسى الاتىن تۇرعىندارىمىزدىڭ لەگى قانشاما.
ەلدار ريازانوۆتىڭ كينوسىندا عانا ەمەس, كۇندەلىكتى كۇيبەڭ تىرشىلىكتىڭ بۋىمەن كوپ جاعدايدا ون ەكىنى امالسىز جول ۇستىندە قارسى الۋعا تۋرا كەلەدى. ءبىرى جولساپارعا كەلىپ كەشىگىپ جاتادى, ەندى ءبىرى اۋا-رايىنىڭ قولايسىزدىعىنان رەيستەن قالىپ جاتسا, تاعى ءبىرى عاشىعىن قيماي, ەندى ءبىرى اسىلىنا اسىعىپ, ءدال سول كۇنى وتباسىنىڭ جىلى شىرايىندا شاتتىققا بولەنگىسى-اق كەلەدى.
ال, ەمتيحاننىڭ الەگىمەن اۋرە-سارساڭعا ءتۇسىپ جۇرەتىن قاراپايىم ستۋدەنت قاۋىمى ءۇشىن, ەڭ باستىسى ون ەكىنى قارسى الۋ ەمەس, جارتى جىل كورمەگەن انالارى مەن اكەتايلارىنىڭ باۋىرىندا, ماۋقىن ءبىر باسىپ, ەركەلەپ قايتۋ عانا عوي… راس, كەيىنگى جىلدارى قاتارىمداعى قۇربى-قۇرداستىرىمنىڭ جاڭا جىلعا اسىعىپ-ۇسىگىپ دايىندالىپ جۇرگەندەرىن بايقاماپپىن. ولاردىڭ قاتارىندا ءوزىم دە بار سياقتىمىن. سەبەبى, نەبارى بەس كۇننەن كەيىن كەلەتىن مەيرامعا الابىرتىپ, الىپ-ۇشىپ جۇرگەنىم شامالى. جىلدان-جىلعا بۇل مەيرامنىڭ جۇرەگىمىزدەن قىزۋى باسىلىپ بارا جاتقانى, بالكىم, جاقسىلىقتىڭ نىشانى شىعار. دەگەنمەن, مەنىڭ ايتپاعىم, الگىندەگى بيلەت ماسەلەسى. ارنايى 45 كۇن بۇرىن تاپسىرىس بەرۋگە مۇمكىنشىلىكتەرى كەلمەيتىن, شالعايعا قاتىنايتىن ءبىراز دوستارىم بيىل دا قينالىپ قالدى. ولاردى قينايتىنى بيلەتتەردىڭ جەتىسپەۋشىلىگى عانا ەمەس, ونىڭ قۇنىنىڭ كۇننەن-كۇنگە قىمباتتاۋى دا قالتاعا سالماق ءتۇسىرىپ تۇر.
PS: ەلوردادا ءبىلىم الاتىن 48 مىڭ 606 ستۋدەنتتىڭ جارتىسىنا جۋىعى ەسكى جىلمەن جول ۇستىندە قوشتاسۋعا ءازىر. ولار قانداي جاعدايعا بولسىن ءازىر, ەڭ باستىسى قىسقى سوعىمنىڭ سىباعاسىنا ۇلگەرسە بولدى عوي…
نۇرگۇل احانقىزى
