كەشە قالالىق ءماسليحاتتىڭ ءماجىلىس زالىندا زاڭدىلىق, قۇقىق ءتارتىبى جانە قوعاممەن جۇمىس جاساۋ ماسەلەلەرى جونىندەگى تۇراقتى كوميسسيانىڭ وتىرىسى ءوتتى. كوميسسيا توراعاسى نيكولاي مەششەرياكوۆتىڭ باسشىلىعىمەن وتكەن جيىندا استانا قالاسىندا قۇقىقبۇزۋشىلىقتىڭ الدىن الۋ بويىنشا 2011-2013 جىلدارعا ارنالعان وڭىرلىك باعدارلامانىڭ ورىندالۋى تالقىلاندى.
اتالمىش باعدارلامانىڭ قورىتىندىسى تۋرالى استانا قالاسى اكىمى اپپاراتىنىڭ مەملەكەتتىك-قۇقىق ءبولىمىنىڭ مەڭگەرۋشىسى داۋلەت دوسقۇلوۆ بايانداما جاساپ, وسى ۋاقىت ارالىعىندا اتقارىلعان شارۋالارمەن تانىستىردى. ماسەلەن, ەلوردالىق جاستار اراسىندا ىشىمدىك پەن ەسىرتكىگە قارسى الدىن الۋدى ناسيحاتتايتىن بەس مىڭعا جۋىق ءىس-شارا وتكەن. «استانا – ەسىرتكىسىز قالا», «قاۋىپسىز اۋلا», «ۋچاستوك», «تۇنگى قالانىڭ بالالارى», «ءبىز قاۋىپسىز جولدى قالايمىز!» جانە تاعى باسقا اكتسيالار تۇراقتى وتكىزىلىپ, باق بەتتەرىندە جاريالانعان.
استانا قالاسى ءىىد باستىعىنىڭ ورىنباسارى باتىرلان ەسەنباەۆ وڭىرلىك باعدارلامانىڭ ماقساتتى تۇردە ورىندالعانىن ايتىپ, ناقتى دەرەكتەرمەن ءبولىستى.
جيىن سوڭىندا قالاداعى قىلمىستىق احۋال, بەينەباقىلاۋ كامەرالارىنىڭ تيىمدىلىگى مەن قوعامدىق ءتارتىپ ماسەلەلەرى جونىندە قويىلعان ساۋالدارعا جاۋاپ بەرىلدى.
گۇلميرا شارحانقىزى
