تۇركىتىلدەس ەلدەردىڭ ونەرلى جاستارى ەلوردادا باس قوستى. مەرەكە كۇنى قازاق ەلى مونۋمەنتىنىڭ الدىندا «استانا – جاستاردىڭ جىر مەكەنى» اتتى گالا-كونتسەرت ءوتتى.
كەش تىزگىنىن قازاقستاندىق بەلگىلى جاس ارتىستەر ءانۋار نۇرپەيىسوۆ, ريتا كۇمىسقاليەۆا, ازەربايجاندىق انشى ەلدار گاسىموۆ, قىرعىزستاننان كەلگەن ءانشى قىز قانىكەي, وزبەكستاندىق ونەرپاز ۇلىقبەك يساكوۆتار ۇستادى.
بيىل استانانىڭ ابىرويى ارتىپ, تۇركى جۇرتىنىڭ ورتالىعى اتانعانى بارشاعا ءمالىم. سوندىقتان, جۇرگىزۋشىلەر بۇل كونتسەرتتى ءبىر تۋعان باۋىرلاس حالىقتار دوستىعىن اسپەتتەيتىن شارالاردىڭ ءبىرى دەپ اتاپ ءوتتى. شارا ساحنالاندىرىلعان قويىلىممەن اشىلدى. تۇركى ەلدەرىنىڭ ەڭ ۇزدىك دەپ تانىلعان 40-قا جۋىق ان-جىرى ورىندالدى.
«تۇركى ەلدەرىنىڭ سۇلۋلارى» اتتى ارنايى جوبانىڭ اياسىندا قازاقستان, ازىربايجان جانە وزبەكستان ەلدەرىنىڭ تالانتتى جاس ديزاينەرلەرىنىڭ ەڭبەكتەرى كورسەتىلدى. روزا رىمباەۆا, مانسۇر تاشماتوۆ, رينات يبراگيموۆ سىندى تانىمال انشىلەردىڭ قوسىلا شىرقاعان اندەرى حالىقتىڭ ىستىق ىقىلاسىنا بولەندى.
«ەۋروۆيدەنيە-2011» جەڭىمپازى, ازەربايجاندىق ەلدار گاسىموۆ, قازاقستاندىق الىشەر كارىموۆ, ديماش قۇدايبەرگەن, وزبەكستاندىق سەۆارا نازارحان, رەسەيلىك ستاس پەحا سالعان اندەردى جاستار جاعى جىلى قابىلدادى.
دوستىق قارىم-قاتىناستى بارىنەن جوعارى قويۋ – بارشا شىعىس حالىقتارىنا ورتاق قاعيدا. بۇل جۇرتتىڭ جاتتى جاقىن ەتە بىلەتىن قاسيەتى تاعى بار. استانا تويىنا ارنايى كەلگەن ونەرپازدار وسىلاي دەيدى. قازاق ەلورداسىنىڭ بۇگىندە تۇركىتىلدەس حالىقتاردىڭ استاناسىنا اينالۋىنىڭ ۇلكەن مارتەبە ەكەندىگىن دە ايتادى.
گالا-كونتسەرتتىڭ سوڭى مەرەكەلىك وتشاشۋعا ۇلاستى.
شىنار دوسان
