«استانا» كونتسەرت زالىندا قالالىق اكىمدىكتىڭ «ناز» مەملەكەتتىك بي تەاترى «U-Sana» اتتى بالالارعا ارنالعان جاڭا پرەمەرانى ۇسىندى.
بۇل قويىلىم ءدال بۇگىنگى كۇننىڭ وزەكتى ماسەلەسىن قوزعاعان. قازىرگى تاڭدا جەتكىنشەكتەردىڭ گادجەتكە تاۋەلدىلىگى الەمدى الاڭداتىپ وتىر. ءاسىرەسە, اتا-انالاردىڭ جانىن جەگىدەي جەۋدە. ارينە, بۇگىن ۋاقىت تالابى باسقا. جاڭا تەحنولوگيالار قارىشتاعان زامان. جاس بالعىندار كوزىن تىرناپ اشقاننان سمارتفوننىڭ قۇلاعىندا وينايدى. كەيدە ىشتەن ءبارىن ءبىلىپ تۋعان با دەپ ويلاپ قالاسىز. مۇنىڭ جاقسى جاعى دا بار. كەرىسىنشە, جاعىمسىز جاعى دا جەتكىلىكتى. جاڭا تۋىندىدا سونىڭ ءبارى شىنايى بەينەلەنگەن. سپەكتاكلگە ءبىر وتباسىنىڭ تاعدىرى ارقاۋ بولعان. ءبىر ءۇيدىڭ ەركىن, ەرمەك, ايگۇل دەگەن بالالارى بولادى. ولار ساباقتى ۇزدىك وقىپ, اكە-شەشەسىمەن باقىتتى ءومىر ءسۇرىپ جاتادى. ۇشەۋى دە ءتارتىپتى, ۇقىپتى. كىتاپ وقىعاندى دا جاقسى كورەدى. بارلىق وقيعا اسان دەگەن كورشى بالانىڭ پلانشەتپەن ويناپ جۇرگەنىنەن باستالدى. جەتكىنشەكتەر وعان قاتتى قىزىعادى. شاڭىراقتاعى ەڭ اسىل مۇرا سانالاتىن دومبىرانى پلانشەتكە ايىرباستايدى. وعان جان-تانىمەن بەرىلگەن بالالار اناسىن تىڭداۋدان قالىپ, كومپيۋتەرلىك ويىندار يەسى ۋسانانىڭ ىقپالىنا كونىپ تىنادى. اناسى جوعالعان بالالارىن ىزدەپ, سارساڭعا تۇسەدى. ال ەركىننىڭ ماقساتى – باۋىرلارىن وسىدان قۇتقارعىسى كەلەدى. ولاردىڭ ەكەۋى دە ۋسانانىڭ قۇلىنا اينالعان. ويىنعا تاۋەلدى بولعان بالالارىن تۇتقىننان شىعارۋ ءۇشىن ەركىن مەن اناسى بار كۇشىن جۇمسايدى. اقىرى, سپەكتاكل سوڭى جاقسىلىقپەن اياقتالادى. ەركىن باۋىرلارىن جاماندىقتان قۇتقارىپ, بۇرىنعى ومىرلەرىنە قايتا اكەلەدى. قىسقاسى, تۋىندى عالامتور جەتەگىندە كەتىپ, ويىننىڭ قىزىعىنا تۇسكەن بالالاردى بىلىمگە, كىتاپقا جەتەلەۋدى كوزدەگەن.
قويىلىم بارىسىندا زاماناۋي تەحنيكانىڭ مۇمكىندىكتەرىن پايدالانعان بيشىلەردىڭ ونەرى بالالاردى بىردەن باۋرادى. ايرانداي ۇيىعان وتباسىنىڭ گادجەتكە تاۋەلدى بولىپ شىرقى بۇزىلعانىن ادامدار بي قيمىلدارى ارقىلى ءتۇسىندى. ۆيرتۋالدى الەمنىڭ قۇلى بولعان جەتكىنشەكتەردىڭ تاعدىرى مەن ولاردى شىرماۋدان شىعارىپ العىسى كەلگەن انانىڭ ارپالىسى كورەرمەندەردىڭ كوزىنە جاس اكەلدى.
سپەكتاكلدەگى ۋسانا حانشايىمىن قارلىعاش ناسەن تاماشا سومداسا, اناسىن گاۋھار يسماگۋلوۆا كەلىستى وينادى. سونداي-اق, تەاتردىڭ جەتەكشى ارتىستەرى اسحات مادەن, ەرجان قۇدايبەرگەنوۆ, مارعۇلان جەڭىسوۆ, ايدانا دايرابەكوۆالار ءوز وبرازدارىن ءساتتى الىپ شىقتى. تۋىندىنىڭ قويۋشى رەجيسسەرلەرى ارمان بايماعامباەۆ پەن ۇلان يزەناەۆتىڭ, ليبرەتتو اۆتورى ساعادىلدا ءۇسىبالىنىڭ, مۋزىكاسىن جازعان بايدالى رىسپانبەتتىڭ ەڭبەكتەرىن ەرەكشە ايتىپ وتكەن ءجون.
«بالالار وزدەرىنىڭ ءرولىن وتە جاقسى سومدادى. ەڭ كەرەمەتى – تۋىندىنىڭ مازمۇنى بولىپ تۇرعان سياقتى. جەتكىزەتىن ويى وزەكتى. مازمۇن مەن فورماعا كەلگەن كەزدە اراگىدىك ەرەكشەلىكتەر بار. ءبىر سوزبەن ايتقاندا, ماعان ۇنادى. وقيعا مازمۇنعا ىلەسىپ وتىرعان كەزدە ەرەكشە اسەر قالدىرادى. قويىلىمدا ەرەكشەلىك پەن جاڭالىق بار. جاس قىزدار مەن بالالارعا ريزا بولدىم. ولار 40 مينۋت بويى قالاي بيلەدى ەكەن دەپ تاڭعالىپ وتىردىم. كەرەمەت اسەر الدىم» دەدى بەلگىلى رەجيسسەر, قازاقستاننىڭ ەڭبەك سىڭىرگەن قايراتكەرى الىمبەك ورازبەك.
پرەمەرانى تاماشالاۋعا كەلگەندەردىڭ دەنى مەكتەپ وقۋشىلارى بولدى. «مىڭ ەستىگەننەن ءبىر كورگەن ارتىق» دەمەكشى, ولارعا تىڭ تۋىندى وي سالدى دەپ ويلادىق. لايىم, سولاي بولسىن!
ازامات ەسەنجول
