– استانادا 25 ءساۋىر كۇنى وتەتىن «Astana Piano Passion» حالىقارالىق جاس پيانيستەر كونكۋرسىنا قازاقستان اتىنان ءتورت تالانتتى ونەرپاز قاتىسادى. جالپى, وسىنداي ءىرى جارىستا وتىز بالا ونەرلەرىن كورسەتەدى. بۇل تۋرالى ورتالىق كوممۋنيكاتسيالار قىزمەتىندە وتكەن بريفينگتە بايقاۋدى ۇيىمداستىرۋشىلاردىڭ ءبىرى – «Accordidi Astana» قورىنىڭ ديرەكتورى ليۋدميلا دوروشەنكو ءمالىم ەتتى.
كونكۋرستى استانا قالاسى اكىمدىگىنىڭ قارجىلاي قولداۋىمەن «Accordidi Astana» قورى ۇيىمداستىرىپ وتىر. جوبانىڭ كوركەمدىك جەتەكشىسى – اتاقتى پيانيست دەنيس ماتسۋەۆ. بيىلعى كونكۋرستىڭ قازىلار القاسى قۇرامىندا يزرايل, رەسەي, ۇلىبريتانيا, فرانتسيادان كەلەتىن ماماندار بولادى.
جالپى, ۇيىمداستىرۋ كوميتەتىنە الىس-جاقىن 45 ەلدەن 400-گە جۋىق ءوتىنىش كەلىپ تۇسكەن. بيىل بايقاۋعا العاش رەت مونعوليا, ماكەدونيا, نورۆەگيا جانە فينليانديا ەلدەرىنىڭ مۋزىكانتتارى قاتىسپاق.
«كونكۋرسقا قاتىسقىسى كەلەتىن بالالارعا ءبىز ەشقانداي شەكتەۋ قويمايمىز. ياعني, ولار ءوتىنىش بەرگەن سوڭ ىرىكتەلىپ, نەگىزگى قاتىسۋشىلار انىقتالادى. بيىلعى كونكۋرسقا قازاقستان اتىنان ءتورت بالا قاتىسادى» دەپ ءتۇسىندىردى دەنيس ماتسۋەۆ.
