بۇرناعى كۇنى «الجير» مەموريالدى مۇراجاي كەشەنىندە «ءتىل تاعدىرى – ۇلت تاعدىرى» اتتى دوڭگەلەك ۇستەل وتىرىسى ءوتتى. قازاقستان حالقى تىلدەرىنىڭ XIV فەستيۆالى اياسىندا ۇيىمداستىرىلعان شاراعا ەلوردالىق زيالى قاۋىم وكىلدەرى قاتىستى.
باسقوسۋ الدىندا قاتىسۋشىلار ونداعى «قاسىرەت» قاقپاسىنا تاعزىم ەتىپ, «زەردە» قابىرعاسىنا گۇل شوقتارىن قويدى, قۇران باعىشتادى. مۇراجاي ديرەكتورى بولات جۇنىسبەكوۆ كوپشىلىكتى شەتەل ەلشىلىكتەرىنىڭ لاگەردە جازىقسىز جازاسىن وتەگەن ايەلدەرگە ارناپ قويعان ەسكەرتكىشتەرىمەن, «كۇرەس پەن ءۇمىت», «ءتۇڭىلۋ مەن السىزدىك» سكۋلپتۋرالىق بەينەلەرمەن, «كوز جاسى» ستەللاسىمەن جانە كەشەن ىشىمەن تانىستىردى. جيىنعا قاتىسۋشىلار مۇراجايداعى جادىگەرلەردى تاماشالاپ, «37 جىلى سولعان گۇلدەر» بەينەبايانى مەن «ءالجيردىڭ» ىزعارلى سۋىعى» اتتى دەرەكتى ءفيلمدى كورىپ, وڭ ىقىلاس تانىتتى.
انا ءتىلىمىزدىڭ بۇگىنگى حال-احۋالىن بايىپتاپ, قولدانىس اياسىن كەڭەيتۋدى ماقسات ەتكەن باسقوسۋدى استانا قالاسى تىلدەردى دامىتۋ باسقارماسىنىڭ باستىعى ەربول تىلەشوۆ اشتى. باسقارما باستىعى دوڭگەلەك ۇستەل وتىرىسىنا قاتىسۋشىلاردان ناقتى ۇسىنىستار كۇتەتىنىن دە جەتكىزدى.
جيىندا ادەبيەتتانۋشى سابىرجان شۇكىر سويلەپ, اعىلشىن ءتىلىنىڭ اۋقىمى تىم كەڭەيۋىنە الاڭدايتىنىن ايتتى. «انا تىلىمىزگە «شابۋىل» كوبەيدى. ۇلت ءتىلىن ساقتاۋ ءۇشىن قازاققا بىرلىك كەرەك. اتقارىلىپ جاتقان شارۋالارعا دا قولداۋ قاجەت. سوڭعى كەزدەرى قانداستارىمىزدىڭ اراسىندا وزگە ءدىننىڭ جەتەگىندە كەتكەندەر جەتەرلىك. ءدىنىمىز بولىنسە, ءدىلىمىز بولىنەدى. ءدىلىمىز بولىنگەن سوڭ, ءتىلىمىز دە اجىرايدى. سوندىقتان, قازاق تىلىنە ساپا كەرەك. ۇلت سانىن ەسەلەۋ دە ساپانى جاقسارتادى» دەدى س.شۇكىر. باسقوسۋدا ديپلومات, پروفەسسور سايلاۋ باتىرشا, جازۋشى تابىل قۇلياس, باسقا دا ءتىل جاناشىرلارى ويلارىن ورتاعا سالىپ, پىكىرلەرىمەن ءبولىستى.
*سۇبەلى ءسوز
ەربول تىلەشوۆ, استانا قالاسى, تىلدەردى دامىتۋ باسقارماسىنىڭ باستىعى:
«ءتول ءتىلىمىزدىڭ جاي-كۇيىنە قاتىستى ايتىلىپ جۇرگەن اڭگىمەلەر جەتەرلىك. ماسەلەن, «زەردە» تىلدەردى دامىتۋ ورتالىعىندا قازاق ءتىلىن ۇيرەنۋدى تەگىن وقيتىن مەملەكەتتىك قىزمەتكەرلەردىڭ ساباققا قاتىسۋى 47 پايىزدى عانا قۇرايدى. الايدا, بيلىك تاراپىنان اتقارىلىپ جاتقان جۇمىستاردى دا جوققا شىعارا المايمىز. استانا قالاسىندا قازاق ءتىلدى مەكتەپتەردىڭ سانى ارتىپ كەلەدى. ارالاس وقىتاتىن ءبىلىم وشاقتارىندا دا ءوز ءتىلىمىزدىڭ ورنى بولەك»
اسحات امزەبەكۇلى
