ۇرپاق دەنساۋلىعى – باستى نازاردا
نادەجدا پەتۋحوۆا, قر پارلامەنتى ءماجىلىسىنىڭ دەپۋتاتى
ەلباسى نۇرسۇلتان نازارباەۆ «قازاقستان – 2050» ستراتەگياسى – قالىپتاسقان مەملەكەتتىڭ جاڭا ساياسي باعىتى» اتتى جولداۋىندا مەملەكەتتىڭ الدىندا تۇرعان جاڭا مىندەتتەردى ايقىنداپ بەردى. وسى جولعى جولداۋدا حالىقتى ساپالى جانە قولجەتىمدى مەديتسينالىق قىزمەتتەر كورسەتۋمەن قامتاماسىز ەتۋ, اۋرۋلار ءتۇرىنىڭ بارىنشا كەڭ سپەكترىن دياگنوستيكالاۋ جانە ەمدەۋمەن قامتاماسىز ەتۋ, مەديتسينالىق ءبىلىم بەرۋ جۇيەسىن تۇبىرىمەن جاقسارتۋ, مەديتسينالىق جوعارى وقۋ ورىندارى جۇمىسىنىڭ تاجىريبەلىك عىلىمي-زەرتتەۋشىلىك بولىگىنە باستى ماڭىز بەرۋ سىندى كوپتەگەن ماسەلەلەر قامتىلدى. ءوز ەلىنىڭ بولاشاعىن ويلاعان مەملەكەت ەڭ الدىمەن وسكەلەڭ ۇرپاعىنىڭ دەنساۋلىعىنا كوڭىل ءبولىپ, سولاردىڭ جاعدايىن جاسايدى. وسى ماڭىزدى مىندەتتى ەلباسىمىز دا ۇنەمى نازاردا ۇستاپ, جولداۋىندا 16 جاسقا دەيىنگى بالالاردى مەديتسينالىق قىزمەتتىڭ بارلىق سپەكترىمەن قامتۋ قاجەتتىگىن باسا ايتتى. بۇل ەلدىڭ كەلەشەگىنە تۇتقا بولاتىن جەتكىنشەكتەرىمىزدىڭ دەنى ساۋ, سالاماتتى ازاماتتار بولىپ وسۋىنە ۇلكەن مۇمكىندىك بەرەتىن يگى قادام ەكەنى ءسوزسىز.
دەنساۋلىق – ادامنىڭ ەڭ باستى بايلىعى. سوندىقتان ءار ازامات ءوز دەنساۋلىعىن كۇتىپ, دەر كەزىندە دارىگەرگە كورىنىپ جۇرگەنى ابزال. اۋرۋدى ەمدەگەننەن, الدىن العان جاقسى. پرەزيدەنت ءوز جولداۋىندا پروفيلاكتيكالىق مەديتسينا اۋرۋدىڭ الدىن الۋداعى باستى قۇرال بولۋعا تيىستىگىن ناقتىلاپ بەردى. ەندى مەديتسينا سالاسىنىڭ وكىلدەرى وتاندىق مەديتسينانىڭ دامۋىنا, قىزمەت ساپاسىن جاقسارتۋعا ءبىر كىسىدەي اتسالىسىپ, دەنساۋلىق ماسەلەلەرىن شەشۋگە بارىن سالۋى كەرەك.