ۆيسەنتە گونسالەس لوسسەرتالەس, حالىقارالىق كورمەلەر بيۋروسىنىڭ باس حاتشىسى: ءبىز كۇتكەن مەجەدەن كورىنە بىلدىڭىزدەر
كەشە قالا اكىمى يمانعالي تاسماعامبەتوۆ حالىقارالىق كورمەلەر بيۋروسىنىڭ باس حاتشىسى ۆيسەنتە گونسالەس لوسسەرتالەستى قابىلدادى. دوڭگەلەك ۇستەلگە وتىرعان قوس تاراپ استانادا 2017 جىلى وتەتىن «ەكسپو» كورمەسىنە دايىندىقتىڭ قالاي بولىپ جاتقانى تۋرالى اڭگىمەلەستى.
ي.تاسماعامبەتوۆ قۇرمەتتى قوناققا ەلوردادا قولعا الىنعان ءىرى ەكى جوبانى تانىستىرىپ ءوتتى. ناقتىراق ايتساق, جول-كولىك ينفراقۇرىلىمى مەن ەنەرگيا ۇنەمدەۋ تەحنولوگياسىن ەنگىزۋ تۋرالى تىڭ باستامالاردىڭ جولعا قويىلعانىن جەتكىزدى.
سونىمەن قاتار, «ەكسپو-2017» كورمەسىنە دەيىن حالىقارالىق اۋەجاي, اۆتو جانە تەمىرجول بەكەتتەرىنىڭ دە قۇرىلىسى باستالادى.
قولعا الىنعان كەشەندى جوبالاردىڭ ىشىندە قالاىشىلىك جولداردىڭ جاعدايى دا قاراستىرىلادى. ونىڭ ىشىندە قايتا جوندەۋدى قاجەت ەتەتىن جالپى ۇزىندىعى 19 شاقىرىمدى قۇرايتىن 4 كوشە بار. سونىمەن قاتار, كولىك قوزعالىسىنا ITS بىرجۇيەلىك باسقارۋدى ەنگىزۋدىڭ ءبىرىنشى كەزەڭى 2014 جىلدىڭ مامىر ايىندا قالاداعى 42 قيىلىسقا ورناتىلاتىنى جوسپاردا بار. وسى جوبا اياسىندا 6 كەزەڭنەن تۇراتىن 402 باعدارشام ورناتۋ جۇمىستارى دا جولعا قويىلىپ وتىر. ياعني, ITS جۇيەسىن ەنگىزۋ كولىكتەردەن بولىنەتىن زياندى قالدىقتاردىڭ مولشەرىن 12-14 پايىزعا دەيىن كەمىتەدى دەگەن ءسوز.
كورمە ۋاقىتىندا ءبىر مەزەتتە مىڭداعان قوناقتى قابىلداي الاتىنداي جاعداي جاسالماقشى. سوعان بايلانىستى قالامىزدا بۇگىنگە دەيىن حالىقارالىق ستاندارتقا ساي بەس جۇلدىزدى بىرنەشە مەيمانحانا بوي كوتەرگەن. ءالى دە قۇرىلىسى اياقتالىپ بىتپەگەندەرى مەن جوبا كۇيىندە تۇرعاندارى دا بارشىلىق. بىراق, ولاردىڭ بارلىعى 2017 جىلعا دەيىن پايدالانۋعا بەرىلەدى. ينۆەستيتسيالىق قولداۋدىڭ اياسىندا كۇشى 50 مۆت بولاتىن كۇن كوزىنەن قۋات الاتىن ەلەكتر ستانساسى مەن 60 شاقىرىمدىق ۆەلوجول دا ەل يگىلىگىنە بەرىلەدى دەپ كۇتىلۋدە. سونداي-اق, قالاداعى ادامداردىڭ قاۋىپسىزدىگى ءۇشىن بىرنەشە بەينەكامەرا ورناتىلاتىن بولدى.
ءوز كەزەگىندە حالىقارالىق كورمەلەر بيۋروسىنىڭ باس حاتشىسى ۆيسەنتە گونسالەس لوسسەرتالەس: «قۇشاق جايا قارسى العاندارىڭىز ءۇشىن مەن دە سىزدەرگە راحمەتىمدى ايتقىم كەلەدى. قالا كۇن وتكەن سايىن دامىپ كەلە جاتىر. وزدەرىڭىز بىلەتىندەي, مەنىڭ كەلگەندەگى ماقساتىم – قالاداعى قۇرىلىس قارقىنىمەن تانىسۋ. سەبەبى, قورىتىندى شەشىمىمىزدى شىعارىپ, كورمەگە قاتىسۋشى ەلدەرگە شاقىرتۋ جىبەرەتىن كەز جەتتى. قۇرمەتتى, اكىم مىرزا, ءوزىڭىزدىڭ بايانداماڭىزدان كەيىن كوپ نارسەگە كوزىم جەتكەندەي بولدى. ءبىز كۇتكەن مەجەدەن كورىنە بىلدىڭىزدەر دەپ تولىقتاي ايتا الامىن. «ەكسپو»-نىڭ جەتىستىگى كورمە مەزگىلىندە ەمەس, ودان كەيىن بايقالاتىن بولادى ءالى» دەپ ايرىقشا سەنىم ءبىلدىردى.
نۇريسلام قۇسپانعالي
