دۇنيەجۇزىلىك قورشاعان ورتانى قورعاۋ كۇنى اياسىندا پرەزيدەنت باستاماسىمەن قۇرىلعان ەلورداداعى «جاسىل بەلدەۋ» اۋماعىندا سانيتارلىق تازالاۋ جۇمىستارى جۇرگىزىلدى.
كەڭ اۋقىمدى ەكولوگيالىق اكتسياعا مينيستر نۇرلان قاپپاروۆ باستاعان قر قورشاعان ورتا جانە سۋ رەسۋرستارى مينيسترلىگىنىڭ وكىلدەرى, استانا قالاسىنىڭ تابيعي رەسۋرستار جانە تابيعات پايدالانۋدى رەتتەۋ باسقارماسى, قالالىق ەكولوگيا دەپارتامەنتى مەن «استانا ورمانى», «استانا ەكو-پوليگون نس» جشس كوممۋنالدىق كاسىپورىندارى, «PosadiDerevoKZ» رەسپۋبليكالىق قوعامدىق بىرلەستىگى, قر ۇلتتىق گۆاردياسىنىڭ اسكەري قىزمەتكەرلەرى مەن «جاس وتان» جاستار قاناتىنىڭ مۇشەلەرى قاتىستى. سونداي-اق, قالا تۇرعىندارى دا ەرىكتى تۇردە شاراعا بەلسەنە اتسالىستى.
سانيتارلىق قورعاۋعا الىنعان «استانا ورمانىنىڭ» كىرەبەرىسىندە ەسكەرتۋ تاقتايشالارى ورناتىلعان ەكەن. ۇققانىمىزداي, ورمانداعى اعاشتاردى رۇقساتسىز كەسۋگە, وزىڭنەن كەيىن قوقىس قالدىرۋعا, وت جاعۋعا قاتاڭ تىيىم سالىنادى. تابيعات اياسىندا دەمالام دەۋشىلەردىڭ بارىنە ورتاق قاراپايىم ەرەجەلەر. «بىراق بۇل ورماندا كىم دەمالماق؟» دەگەن سۇراق تۋدى ويىمىزدا. ورمان ماڭايىن قوقىر-سوقىردان تازارتۋعا كەلگەندەردىڭ ءوزى اۋىز-مۇرىندارىن قىمتاپ, مەديتسينالىق ماسكا تاعىپ العانىن كوردىك. نەگە دەيسىزدەر عوي: تاياق تاستام جەردە قاتتى تۇرمىستىق قالدىقتار پوليگونى ورنالاسقان. ءسىرا, اۋا ارقىلى كۇل-قوقىستىڭ ءتۇرلى قاۋىپتى ۆيرۋستارىن اعزاعا جۇقتىرىپ الامىز دەپ قورىققاندارى بولار. دۇرىس-اق. بىراق, ىرگەلەس ورنالاسقان ورماننىڭ اعاشتارى قوقىستىڭ جاعىمسىز ءيىسىن سەزدىرمەي تۇرعانى سەزىلەدى. جاقسى ما, جامان با, ايتەۋىر, جاسىل جەلەكتىڭ جاعىمدى حوش ءيىسى دە مۇرىنعا كەلمەيدى. ورماننىڭ قاتتى لاستانعانىن بايقاماۋ مۇمكىن ەمەس. اعاشتارعا الىستان كوز تاستاساڭ, شۇبەرەككە تولى اۋليەاعاشقا ۇقسايدى. ال, شىن مانىندە بۇتاقتاردىڭ ءار جەرىنە ءبىر كەزىندە ءوزىمىز قولدانىپ, جارامسىز بولىپ قالعان تسەللوفان پاكەتتەر بايلانىپ قالعان. بايقاعانىمىزداي, «جاسىل بەلدەۋدىڭ» پوليگونعا جاقىن جەرىنىڭ ءبارى كۇرەسىنگە تولىپ, ابدەن لاستانىپ كەتكەن ەكەن. قاسىنداعى قوقىس پوليگونى تىپتەن ادام شوشىتادى. قالدىقتاردى جەم قىلىپ قاپتاعان شاعالالار شاڭقىلداپ ۇشىپ ءجۇر. وي باعامداساق, بۇل دا ۇلكەن قاۋىپ ەمەس پە؟! ولاردىڭ ۆيرۋس تاسىمالداۋشى بولماسىنا كىم كەپىل؟ «قاتتى تۇرمىستىق قالدىقتار پوليگونى جانىنداعى ورماندى تازالاۋدىڭ ماعىناسى بار ما؟ جينالعان جەرلەر جەل تۇرسا, قايتادان شاشىلماق ەمەس پە؟» دەگەن سۇراقتى «استانا ەكو-پوليگون نس» جشس كوممۋنالدىق كاسىپورىننىڭ ديرەكتورى دارحان دوسماعامبەتوۆكە قويعانىمىزدا: «بۇل قوقىس جىلدار بويى جينالعاندىقتان, تازارتۋ جۇمىستارى اياقتالماي كەلەدى. پوليگون ماڭايىن ۇشاتىن قالدىقتاردان ءاردايىم تازارتىپ وتىرامىز. ارنايى رەگلامەنت بويىنشا جۇمىس ىستەيمىز. قوقىستى جەر استىنا كومىپ, ۇستىنەن توپىراق جايامىز. جاقىن ارادا قورشاۋدى ۇلكەيتۋ جوسپاردا بار. جالپى, پوليگون ابدەن تولعان. مىنە, ءدال جانىندا ۇلكەن قوقىس شۇڭقىرى قازىلۋدا. وسىنىڭ ءبارىن سول شۇڭقىرعا كوشىرىپ, كومەمىز. قۇرىلىسى جىلدىڭ اياعىندا اياقتالماق. رەكۋلتيۆاتسيا جاساپ, ءشوپ وسىرەمىز. اقىر سوڭىندا, بۇل جەردە قوقىس پوليگونىنىڭ ءىزى دە قالماۋعا ءتيىس» دەپ جاۋاپ بەردى. سەنگىمىز كەلەدى. ناتيجەسىن دە كورە جاتارمىز. جالپى, شاراعا باس-اياعى 700-گە جۋىق ادام جۇمىلدىرىلىپ, ناتيجەسىندە ارنايى تەحنيكا ارقىلى پوليگونعا 16 رەيس جاسالىپ, 80 توننا قوقىس شىعارىلدى. سوندا دا, قولايسىز جەردە ورنالاسقان قوقىس پوليگونى ارقانىڭ اڭىراعان جەلى سوقسا, «جاسىل بەلدەۋدى» قايتادان لاستاماي ما؟ ادامداردىڭ دەنساۋلىعىنا تىكەلەي قاتىستى بولعاندىقتان بۇل ويلاندىراتىن ماسەلە بولسا كەرەك.
ءمادينا جاقىپ
