شىلدەنىڭ ۇشىندە بەيبىتشىلىك جانە كەلىسىم سارايىندا كاسىبي مۋزىكالىق «استانا جۇلدىزى» ۇلتتىق بايگەسى ەكىنشى مارتە وتەدى. ونىڭ باستاماشىسى – استانا قالاسى اكىمدىگى. ۇيىمداستىرۋشى – «Adam Media Group». جوبانىڭ باستى ماقساتى – كاسىبي بىلىكتى ساراپشىلاردىڭ تاڭداۋى ارقىلى ۇلتتىق مۋزىكانىڭ وركەندەپ, ورلەۋىنە ىقپال ەتۋ, ساپالى مۋزىكانىڭ سۇرانىسقا كەڭىنەن يە بولۋىنا جاعداي جاساۋ. بايگە بولاشاق قازاقستاننىڭ جارقىن كەلبەتىمەن بايلانىستى بولماق.
بۇل مۋزىكالىق بايگە العاش رەت استانا كۇنىنىڭ 15 جىلدىعىنا وراي ۇيىمداستىرىلعانى بەلگىلى. جوبانىڭ باستاماشىلارى كاسىبي ونەرپازدار اراسىندا رەزونانس تۋدىرعان كونكۋرستىڭ وتاندىق ونەردىڭ وركەندەۋىنە تيگىزەر وڭ اسەرىن ەسكەرە وتىرىپ, شارانى جىل سايىن وتكىزۋدى ۇيعاردى.
العاشقى قادامنان-اق «استانا جۇلدىزى» قازاقستان شوۋ-بيزنەسىندەگى ەڭ جارقىن جوباعا اينالدى. بىلتىر روزا رىمباەۆا, مارجان اراپباەۆا سىندى ەلىمىزدىڭ تانىمال انشىلەرى, «مۋزارت», «ۇلىتاۋ», «Musicola», «كەشYou» توپتارى, ءالي وقاپوۆ, اعايىندى زادارنوۆسكيلەر سەكىلدى دارىندى جاستار بايگەنىڭ جەڭىمپازدارى اتاندى. وسى جىلى اسا ماڭىزدى بايگەنى كىم يەلەنەدى؟ «استانا جۇلدىزى-2014» بايگەسىنىڭ لاۋرەاتتارى كىمدەر بولماق؟
«استانا جۇلدىزى» الەمدەگى ەڭ تانىمال مۋزىكالىق بايگەلەر ەرەجەسىنە ساي جۇزەگە اسادى. جوبانىڭ باستى ەرەكشەلىگى – جۇلدەگەرلەردى تاڭداۋداعى كاسىبيلىك. وتاندىق مۋزىكانىڭ دامۋىنا, جاڭارىپ, جاڭعىرۋىنا اسەر ەتكەن ۇزدىك ونەرپازداردى قۇرامىندا 100 كاسىبي مامان – ەڭبەگى سىڭگەن ارتىستەر, پروديۋسەرلەر, كومپوزيتورلار, اقىندار, مۋزىكا جانە fashion-ءوندىرىس ماماندارى, باق وكىلدەرى بار قازاقستاننىڭ مۋزىكالىق اكادەمياسى تاڭدايدى. داۋىس بەرۋدىڭ وسى جۇيەسى الەمدىك دەڭگەيدە قولدانىلىپ ءجۇر.
ۇزدىكتەردى انىقتاۋ ەكى كەزەڭنەن تۇرادى. ءبىرىنشى كەزەڭدە قازىلار القاسى 11 اتالىم بويىنشا 3 ۇمىتكەردى لايىق دەپ تانيدى. ەكىنشى كەزەڭدە ساراپشىلار ءار اتالىمنان ەڭ مىقتىنى تاڭدايدى. 11 اتالىم جەڭىمپازدارىنىڭ ەسىمدەرى رەسمي ماراپاتتاۋ راسىمىندە 3 شىلدەدە بەلگىلى بولادى. بۇل كۇنى استاناداعى جانكۇيەرلەردىڭ قولداۋىنا لايىقتى وتاندىق ەڭ ۇزدىك تانىمال جاندار مەن ونەر ادامدارى بەيبىتشىلىك جانە كەلىسىم سارايى الدىنا توسەلگەن قىزىل كىلەم ۇستىمەن ءجۇرىپ وتەدى.
