پرەزيدەنت نۇرسۇلتان نازارباەۆ «100 ناقتى قادام» ۇلت جوسپارىندا الەۋمەتتىك كومەك پەن ونىڭ اتاۋلى سيپاتىن كۇشەيتە وتىرىپ ىنتالاندىرۋدى مىندەت ەتىپ قويعانى بەلگىلى. وسىعان بايلانىستى اتاۋلى كومەك كورسەتۋ جۇيەسىنىڭ تيىمدىلىگىن ارتتىرۋ قولعا الىندى. سونىڭ ءبىرى – بىلتىرعى قىركۇيەك ايىنان باستاپ «ورلەۋ» باعدارلاماسى شەڭبەرىندە شارتتى اقشالاي كومەك كورسەتۋ جۇمىستارى.
2015 جىلى باس-اياعى 74 ادامدى قۇرايتىن 15 جانۇياعا كومەك بەرىلدى. ولاردىڭ ىشىندە ەڭبەككە قابىلەتتى 15 ازاماتقا جۇمىس جاعىنان جاردەم كورسەتىلدى. اتاپ ايتقاندا, 14 ادام «جۇمىسپەن قامتۋ – 2020 جول كارتاسى» باعدارلاماسى اياسىندا جۇمىسقا ورنالاستى. ال بىرەۋى قوعامدىق جۇمىسقا تارتىلدى. وسى جوبانى ىسكە اسىرۋ ءۇشىن 2015 جىلى رەسپۋبليكالىق بيۋدجەتتەن 1 ملن 900 مىڭ تەڭگە سوماسىندا ماقساتتى ترانسفەرتتەر ءبولىندى.
قازاقستان رەسپۋبليكاسى ۇكىمەتىنىڭ «رەسپۋبليكالىق بيۋدجەتتەن اعىمداعى ماقساتتى ترانسفەرتتەردى پايدالانۋ ەرەجەسىن بەكىتۋ تۋرالى» قاۋلىسىنا سايكەس, 2016 جىلعا قاتىستى وبلىستىق بيۋدجەتتەن, استانا جانە الماتى قالالارى بيۋدجەتىنەن «ورلەۋ» جوباسى بويىنشا شارتتى اقشالاي كومەك كورسەتۋگە قاتىستى, از قامتىلعان وتباسىلارعا شارتتى اقشالاي كومەك (بۇدان ءارى-شاك) تولەنەدى.
شاك – اقشالاي تۇردە تولەنەدى, ول كۇنكورىس دەڭگەيىنىڭ سوماسىنان ايلىق تابىسى 60 پايىزعا تومەن بولاتىن (2016 جىلدىڭ ەكىنشى توقسانىندا 13735 تەڭگە بولدى) جەكە تۇلعالارعا نەمەسە جانۇيالارعا وتباسىنىڭ بەلسەندىلىگىن ارتتىرۋدىڭ قوعامدىق كەلىسىمشارتى نەگىزىندە بەرىلەدى. اقشالاي جاردەماقى وتباسىنىڭ بەلسەندىلىگىن ارتتىرۋدىڭ قوعامدىق كەلىسىمشارتىن ورىنداعان جاعدايدا عانا بەرىلەدى. كەلىسىمشارت بويىنشا, وتباسى الەۋمەتتىك بەلسەندىلىكتى ارتتىرۋ كەزىندە كەزدەسەتىن كەدەرگىلەردى جەڭۋمەن جۇمىس جاساۋعا مىندەتتەلەدى.
قوعامدىق كەلىسىمشارت – قازاقستان رەسپۋبليكاسىنىڭ جۇمىسسىز, وزدىگىنەن جۇمىسقا ورنالاسقان جانە از قامتىلعان ازاماتتار مەن ورالمانداردى جۇمىسقا ورنالاستىرۋ جاعىنان كومەكتەسەتىن, حالىقتى جۇمىسپەن قامتۋ ورتالىعى اراسىنداعى قۇقىقتار مەن تاراپتاردىڭ مىندەتتەرىن انىقتايتىن كەلىسىم بولىپ تابىلادى.
«ورلەۋ» جوباسىندا وتباسىعا (جەكە تۇلعاعا) شارتتى اقشالاي كومەك كورسەتۋ شارالارىنىڭ كەشەنى – جۇمىسپەن قامتۋعا جاردەمدەسەتىن مەملەكەتتىك ءىس-شارالارعا وتباسىنىڭ جۇمىسقا قابىلەتتى مۇشەسى قاتىسقان جاعدايدا جانە قاجەت بولسا, جۇمىسقا از قابىلەتتى وتباسى مۇشەسى الەۋمەتتىك بەيىمدەلۋ شاراسىنان ءوتىپ جاتقان جاعدايدا ىسكە اسىرىلادى.
«ورلەۋ» جوباسىنىڭ مىندەتتەرى – از قامتىلعان جۇمىسقا قابىلەتتىلىگى تومەن وتباسىلاردى تەك جاردەماقىمەن قامتىپ قانا قويماي, ولاردىڭ قوعامعا بەيىمدەلگەن جانە كاسىبي باعدارلانعان بولۋىنا قول جەتكىزۋ, ياعني ءپاسسيۆتى اقشالاي كومەكتەن وتباسىنىڭ بەلسەندى قولداۋشىسىنا اينالدىرۋ.
قوعامدىق كەلىسىمشارت رەسمي تابىس الۋعا مۇمكىندىك بەرەدى. وسىلايشا, بولاشاقتا الەۋمەتتىك جاعىنان قوسىمشا قامتاماسىز ەتىلۋى مەن مەديتسينالىق كومەك الۋعا مۇمكىندىك تۋادى. قوعامدىق كەلىسىمشارت جۇمىسسىز ازاماتتىڭ جۇمىسپەن قامتۋعا جاردەمدەسەتىن مەملەكەتتىك باعدارلاماعا (قوعامدىق جۇمىس ورىندارى, جاستار پراكتيكاسى, ۋاقىتشا قوعامدىق جۇمىستار) قاتىسۋىنا كەپىلدىك بەرەدى.
كەدەيلىكتى ەڭسەرۋ – مەملەكەت پەن ينديۆيد اراسىنداعى بىرلەسكەن جاۋاپكەرشىلىك. از قامتىلعان, جۇمىسقا قابىلەتتىلىگى تومەن تۇلعالارعا قوعامدىق كومەك كورسەتۋ ولاردىڭ كەدەيلىكتەن شىعۋعا كۇش جۇمساۋ بەلسەندىلىگىنە قاراي تولەنەدى.
جۇمىس ەڭ ۇزدىك الەۋمەتتىك كومەك ەكەنى بەلگىلى. سوندىقتان مەملەكەت «ورلەۋ» جوباسىنىڭ بارلىق قاتىسۋشىلارىنا جۇمىسپەن قامتۋ تۇرىندە قوعامدىق كومەك كورسەتەدى, وتباسىنىڭ اۋقاتتى ءومىر ءسۇرۋ دەڭگەيىنە جەتۋىنە, بەلسەندىلىگىن ارتتىرۋعا جاردەمدەسەدى.
