انشىلەر تارتۋى
كەشە كونگرەسس-حولدا بالالاردى قورعاۋدىڭ حالىقارالىق كۇنىنە ارنالعان «بالا تىلەگى» اتتى كونتسەرت ءوتتى. قازاقستاننىڭ بەلگىلى ەسترادا انشىلەرى, استانا قالاسى مەملەكەتتىك اكادەميالىق فيلارمونياسى ارتىستەرى, «زۆەزدنىي چاس» ۆوكالدىق ستۋدياسى, «ۇركەر», «كاۋسار» بي انسامبلدەرى, «نازقوڭىر» قوبىزشىلار توبى, «جىگەر» دومبىراشىلار ءانسامبلى قاتىسقان كەشتە بال-بالالىق شاققا جەتەلەيتىن اندەر شىرقالدى.
مايرا ءىلياسوۆا, باعدات سامەدينوۆا سىندى بەلگىلى انشىلەر باستاعان كونتسەرتتە ايگۇل قوسانوۆا, گۇلزيرا بوكەيحان سىندى حالقىمىزدىڭ سۇيىكتى جۇلدىزدارى, وزگە دە ەسىمدەرى حالىقتىڭ اۋزىندا جۇرگەن ارتىستەر مەن ەندى عانا تانىلىپ كەلە جاتقان ونەرپازدار ونەر كورسەتتى.
ۇقسايدى بار تىنىشتىق
جەر بەتىندە,
ۇيقىداعى ءسابيدىڭ كەلبەتىنە.
وياتۋ بىلاي تۇرسىن,
رۇقسات جوق
ۇيىقتاپ جاتقان بالامدى
تەربەتۋگە…
اقيىق اقىن مۇقاعالي ماقاتاەۆتىڭ سوزىنە جازىلعان, اتا-انانىڭ بالاعا دەگەن ماحابباتىنىڭ مەيىرىمىنە بولەيتىن «بەسىك باسىندا» اتتى بۇل ءاندى التىناي جوراباەۆا ورىنداپ ءجۇر. التىناي دا بۇل كونتسەرتكە قاتىسىپ, اتالمىش ادەمى تۋىندىنى جاڭعىرتتى.
جالپى, بالالىق تاقىرىبىنا سوقپاعان قازاق كومپوزيتورلارى كەمدە-كەم. ارىدان تارتساق, ءابىلاحات ەسپاەۆ, باقىتجان بايقاداموۆ, اسەت بەيسەۋوۆ, ولاردىڭ بەرگى جاعىندا سۇگىرالى ساپاراليەۆ, ەسكەندىر حاسانعاليەۆ, سەيدوللا ءبايتەرەكوۆ, التىنبەك قورازباەۆ, مارات وماروۆ سىندى مۋزىكا شەبەرلەرىنىڭ بالدىرعان شاق تۋرالى تۋىندىلارى بار. اسىرەسە, تۇرسىنعازى راحيموۆتىڭ «ءسابي بولعىم كەلەدى» اتتى ءانىن ەستىگەن ادامداردىڭ اراسىندا تازا, كۇناسىز, ەش الاڭسىز كەزىن اڭسامايتىندار جوق-اۋ, ءسىرا.
اكە, انا اتانۋ قۋانىشى دا كوپتەگەن كومپوزيتورلارعا شابىت بەردى. سەيدوللا بايتەرەكوۆتىڭ سازسىرناي ۇنىمەن قۇلپىراتىن «كىشكەنتاي» كومپوزيتسياسى سونداي تۋىندى.
قىسقاسىن ايتقاندا, كونتسەرتتە ورىندالعان اندەر كورەرمەندەرگە تاماشا اسەر سىيلاپ, بالالىق شاقتارىنا ساپار شەكتىردى.
امانعالي قالجانوۆ