БАЯНДЫ БОЛАШАҚ БАҒДАРЫ
Астана қаласы әкімдігінде Мемлекет басшысы Нұрсұлтан Назарбаевтың «Қазақстан-2050» Стратегиясы» – қалыптасқан мемлекеттің жаңа саяси бағыты» атты Жолдауы талқыланды. Жиынға Парламент, қалалық мәслихат депутаттары, қала әкімдігіне қарасты мекеме басшылары және саяси партия белсенділері қатысты. Олар Елбасы жолдауындағы маңызды міндеттер төңірегінде пікір алмасып, ой бөлісті.
Қалалық мәслихаттың хатшысы Сансызбай Есіловтің пікірінше, «Қазақстан – 2050» стратегиясы ел дамуының басты бағыттарын айқындап, болашақтағы алар белестерімізді саралап барып жасалған тарихи құжат. «Заман талабы, халық сұранысы болашақ жоспардың ауқымы мен қарқынын кеңейтіп, тың экономикалық серпіліс жасауды талап етіп отыр. Бұл жолдау еліміздің алдағы 38 жылына жоспарланған стратегиялық мақсаттар мен міндеттерді баяндаған, бүкіл халықты жалпыға ортақ еңбек қоғамына дайындаған аса маңызды құжат болып есептеледі» деді ол.
Жолдаудың әр бөлімі мемлекет саясатының негізгі ұстанымдарына халықтың мүддесі мен игілігіне негізделгенін айтты.
Жыл сайынғы Жолдаудан халықтың жаңалық, жақсылық күтетіні бар. Себебі онда бүгінгі күннің ең өзекті мәселелері көтеріліп қана қоймай, оларды шешу жолдары да нақты көрсетіледі.
Парламент Сенатының депутаты Владимир Редкокашин биылғы Жолдаудың халық үшін тың жаңалықтарға толы екендігіне тоқталды.
«Құжаттың «Әлеуметтік саясаттың жаңа принциптері – әлеуметтік кепілдіктер және жеке жауапкершілік» деп аталған бөлімі менің назарымды ерекше аударды. Неге десеңіз, мұнда қоғамның әлеуметтік жағдайы төмен топтарына, жұмыссыздарға, мүмкіндігі шектеулі жандарға көңіл бөлу қажеттігі айтылған» деді ол. Сенатордың келтірген мәліметі бойынша «Қазақстан – 2030» стратегиялық бағдарламасы қабылданғаннан бергі 15 жыл ішінде еліміз ең қарқынды дамушы 5 мемлекеттің қатарына еніпті. Ел азаматтарының табысы 16 есеге, ішкі жалпы өнім жан басына шаққанда 7 есеге ұлғайған.
Владимир Редкокашиннің пікірінше, жолдауда дүниеге ұрпақ әкелуші – қыз балалардың тәрбиесі жайында кеңінен сөз болуы – Елбасының ұлт тағдырына бей-жай қарамайтындығының дәлелі.
«Цесна-Астық» Концерні» ЖШС Басқармасының төрағасы, қалалық мәслихат депутаты Николай Мещеряков Елбасының ауыл шаруашылығы өнімдерін жаһандық сұранысқа сай жаңғырту қажеттігі жайында айтқанына ерекше мән берген сыңайлы. Өз баяндамасында осы бөлімге ерекше тоқталған ол фермерлік пен шағын және орта бизнесті дамыту, ішкі жалпы өнімдегі ауылшаруашылық өнімдерінің үлес салмағын арттыру мәселесін көңілге қонымды деп санайтындығын тілге тиек етті.
ҚР Президенті жанындағы Мемлекеттік қызмет академиясы әлеуметтік саясат кафедрасының профессоры Тілеуғали Бөрібаевтың баяндамасында латын әліпбиіне көшу әлемдік ақпараттық кеңістікті игерудің негізгі жолы екендігі айтылды. Ол «Астанада қазақ тілінде білім беретін мектептер мен балабақшаларды ашу одан әрі жалғаса бергені жөн» деген ұсынысын да білдірді.
«Astana Innovations» АҚ төрағасы Саят Нүсіпов өздері жүзеге асыратын инновациялық жобалардың барлығы да Президент Жолдауының ұстанымдарына сәйкес келетіндігін атап көрсетті. Бүгінде Астанада инновациялық технологияларға құйылатын инвес-тиция артып келеді, инновациялық өнімдер көлемі де 15 есеге өскен. Инновация игілігін көретін күн жетті. Қазіргі кезде «Смарт-су құбыры» жобасының арқасында суды бей-берекет қолдануды 20 пайыздан 8 пайызға дейін кемітуге қол жеткіздік. Ал, «Смарт-ЛЭП» жобасы электр қуатын шығындауды 45 пайыз азайтуға, «Дәріханалық құлтемірлер» жобасы қала тұрғындарына қызмет көрсетуді 4 минуттан 7 секундқа дейін кемітуге мүмкіндік беріп отыр.
Мемлекет басшысы Нұрсұлтан Назарбаевтың жүргізіп отырған саясатының салмағы жыл өткен сайын артып келеді. Биылғы Жолдаудың да көтерер жүгі жеңіл емес. Демек, онда көрсетілген міндеттерді мүлтіксіз орындау барша қазақстандықтарға үлкен сын болары анық. Жиынды басқарған қалалық мәслихаттың хатшысы Сансызбай Есілов сөз соңында барша астаналықтардың Жолдауды қолдауда белсенділік танытып, бұл сыннан сүрінбей өтетіндігіне сенім білдірді.
Шынар ДОСАН