Астанада Қазақстанның Еуразиялық бизнес қауымдастығының аясында ҚР инвестициялық климатын жақсарту мақсатындағы дөңгелек үстел өтті.
Мұнай бағасының құлдырауы себебінен әлемдік экономикада қалыптасқан жағдай бізге де салқынын тигізді. Соған қарамастан, Қазақстан индустриаландыру саясатын одан әрі жүргізіп, инвестиция тартуды жалғастырып келеді. Бұл саланың бұған дейінгі көрсеткіші де ел экономикасы қуатының артқандығын және инвестициялық тартымдылығының дәлелі болса керек. Мәселен, соңғы он бір жылда 220 млрд доллар шетелдік тікелей инвестиция экономиканың түрлі салаларына жан бітіріп, жұмысын жандандырды. Соның ішінде индустриаландыру бағдарламасының аясында 2005 жылдан бері тікелей тартылған инвестицияның 77% ел экономикасының ауқымды бөлігін алып жатқан өңдеу саласына құйылған.
Ал қазіргі кезде Астана инвестиция тартудың орталығына айналып отыр. Мысалы, өткен жылы қалаға тартылған инвестиция көлемі 772,7 млрд теңге болып, 2014 жылмен салыстырғанда 17% өскен.
Инвестиция тарту мәселесінде Үкіметте тынымсыз жұмыс істеуде. Үкімет басшысы жанынан трансұлттық компаниялардың қатысумен жасалып жатқан ірі инвестициялық жобалардың жұмысын бақылау үшін арнайы кеңес құрылды.
Сондай-ақ, Сыртқы істер министрлігімен бірлесе отырып, инвестиция бойынша арнайы кеңесшілер жіберілетін 10 ел анықталды. Олар: АҚШ, Ұлыбритания, Италия, Оңтүстік Корея, Иран, Жапония, Германия, Франция, Қытай, Үндістан.
