QR Ūlttyq akademiialyq kıtaphanada Qazaqstan Jazuşylar odaǧy men «BELES» qūrylys kompaniiasy ūiymdastyrǧan «Jas qalam – jaŋa roman» jobasynyŋ grant iegerı, jas qalamger Qanat Äbılqaiyrdyŋ «Aǧyraptaǧy aty joq adam» atty kıtabynyŋ tanystyrylymy öttı.
Is-şaraǧa Parlament Senatynyŋ deputaty, jurnalist Nūrtöre Jüsıp, Mäjılıs deputaty, aqyn Qazybek İsa, Mäjılıs deputaty, jurnalist Janarbek Äşımjan, jazuşy, QR Memlekettık syilyqtyŋ laureaty Älıbek Asqar, synşy Amangeldı Keŋşılıkūly, Halyqaralyq «Alaş» ädebi syilyǧynyŋ iegerı Baqyt Bedelhan, Jazuşylar odaǧynyŋ Astana qalalyq filialynyŋ direktory Däuletkerei Käpūly jäne elordalyq ziialy qauym ökılderı qatysty.
«Elımızde qazaq ädebietıne, ūlt ädebietıne jany aşityn käsıpker azamattar bar. Solar üş romanǧa qarjy bölıp, talantty jazuşylarǧa jaǧdai jasady. Sonyŋ bırı – jazuşy Qanat Äbılqaiyr. Ol tarihi taqyryptardy jazdy.
«Aǧyraptaǧy aty joq adam» romanynda adamnyŋ sezımın qozǧalysqa keltıretın elementter bar. Jazuşynyŋ äŋgımeşıl şeberlıgıne riza boldym» deidı synşy Amangeldı Keŋşılıkūly.
Al kıtap avtory aǧyrap sözıne toqtalyp öttı.
«Köp adam «Aǧyrap degen ne?» dep sūrap jatyr. Dınde jūmaq pen tozaq degen ūǧym bar. İslam dınınde jūmaq pen tozaqtyŋ ortasynda bır meken bolady. Ol jerde jaqsylyǧy men jamandyǧy teŋ tüsken, iaǧni jūmaqqa da, tozaqqa da jıberuge kelmeitın adamdar qalady degen tüsınık bar. Osyǧan qatysty Aǧyrap degen süre de bar. Şyǧarmadaǧy oqiǧa Aǧyrap degen qalada ötedı» deidı jazuşy Qanat Äbılqaiyr.
