Qalalyq mäslihatta «Astana – aqyldy qala» smart-jobasyn ıske asyru mäselesı qaraldy.
Elordada «Astana – aqyldy qala» smart-jobasyn ıske asyru myqtap qolǧa alynǧan. İnvestisiialar jäne käsıpkerlıktı damytu basqarmasynyŋ basşysy Älışer Äbdıqadyrovtyŋ aituynşa, Astanadaǧy tyŋ jobalar älemdegı aqyldy qalalardyŋ täjıribesıne süiene otyryp jüzege asyrylady.
– Elbasy özınıŋ Joldauynda aitqandai, aqyldy qala ömır süruge jaily ärı qauıpsız boluy kerek. Būl tūrǧyda ıske asyrǧan jobanyŋ nätijelı bolyp jatqanyn aityp ötken jön. Mysaly, «Sergek» kameralarynyŋ biylǧy 9 aidaǧy körsetkışın ötken jylmen salystyrsaq, jol-kölık oqiǧasynan köz jūmǧandar sany ekı esege, jaraqattanǧandar 20 paiyzǧa azaiǧan. Aldaǧy uaqytta köşelerdı aqyldy şamdarmen jaryqtandyru jobasy jüzege asyrylatyn bolady. Mūndaǧy elektr şyǧyny būrynǧymen salystyrǧanda 50-60 paiyzǧa ünemdeledı dep közdelude, – degen Älışer Äbdıqadyrov barlyq jobalardyŋ memlekettık-jekemenşık ärıptestık negızınde ıske asyrylatyndyǧyn tılge tiek ettı.
Sondai-aq baiandamaşylardyŋ sözıne qaraǧanda, qazırgı taŋda bılım, medisina salalarynda elektrondy formatta qyzmet körsetu jaǧy ılgerı basyp kele jatqanmen, būl jaǧy arhiv ısınde älı de bäseŋ körınedı. Degenmen, būl tūrǧyda jūmystardyŋ jürgızılıp jatqanyn aitady Tılderdı damytu jäne arhiv ısı basqarmasy basşysynyŋ orynbasary Säken Esırkep.
– Qazırgı taŋda Astana qalasy memlekettık mūraǧatynyŋ qorynda 50 millionnan asa qūjat paraǧy saqtalǧan. Onyŋ ışınde 353 myŋ saqtau bırlıgı bar. Arhiv qoimasyndaǧy qūjattardyŋ negızgı bölıgı – qaǧaz. Biyl jyl basynan bügıngı künge deiın arhiv ısı boiynşa kelıp tüsken ötınışter sany 8 myŋǧa juyqtaidy. Aqparattyq jüienıŋ bolmauyna bailanysty barlyq ötınışterdı arhiv qyzmetkerlerı qūjattardy qolmen köterıp, katalogty özderı jasap, osylai aqparat beruge mäjbür. Qazırgı uaqytta mekemenıŋ balansynda 1 server, 48 kompiuter bar. Bıraq olardyŋ köbısı eskırgen. Osyǧan bailanysty Astana qalasy memlekettık mūraǧatyn jaqsartu boiynşa 2019-2021 jyldarǧa arnalǧan damu Strategiiasynyŋ jobasy äzırlendı. Eger būl joba qabyldansa, 50 million qūjattyŋ barlyǧy skanerlenıp, 2021 jyly arhivtegı qūjattardy sifrlandyru josparda tūr. Al jyl soŋyna deiın 70 myŋ qūjatty skanerleu közdelıp otyr. Sonymen qatar arhivke jaŋa ǧimarat berıledı dep kütılude. Näjımedenov pen Qaldaiaqov köşelerınıŋ boiynda ornalasqan ekı ǧimaratta jöndeu jūmystary jürgızılude, – deidı ol.
