Äset İsekeşev, Astana qalasynyŋ äkımı: Memleket basşysy alǧa qoiǧan mındet merzımınde oryndaluy tiıs
Astana qalasynyŋ äkımı qyzmetıne kırısken künnen bastap Äset İsekeşev qalany aralap, köşpelı otyrystar ötkızude.
Äkım Astananyŋ barlyq audandarynda bolyp, tırşılıktı qamtamasyz etudıŋ maŋyzdy nysandarymen tanysyp, köşelerdı tekserdı. Elorda ömırıne qatysty kez kelgen mäsele qala äkımdıgınıŋ otyrystarynda egjei-tegjeilı zerttelıp, qaralatyn bolady.
Qala basşysy aldymen Taldykölge at basyn tıredı. Astana äkımı köldı tazartu boiynşa atqarylǧan jūmystarmen, sonyŋ ışınde su tazartu boiynşa qosymşa qūrylystardy salu jäne qalpyna keltıru jūmystarymen tanysty. Aita keteiık, byltyr Taldykölge şyǧaryndylar jıberu toqtatylǧan. Jyl soŋyna deiın su tübı tolyqtai tazartylmaq.
«Būl mäsele ünemı baqylauda boluy şart. Memleket basşysy alǧa qoiǧan mındet merzımınde oryndaluy tiıs» dedı Ä. İsekeşev.
Sonymen qatar, äkım qala tırşılıgın qamtamasyz etudıŋ basty nysandarynyŋ bırı – JEO-2 jäne JEO-3-te bolyp, elordanyŋ aldaǧy jylytu mausymyna daiyndyǧyn tekserdı.
2016-2017 j.j. jylytu mausymy bastalǧanşa JEO-2-de quattylyǧy 220 Gkal qūraityn №5, 6 jäne quattylyǧy 180 Gkal bolatyn №7 qazandyq agregattaryn ıske qosu közdelgen, būl osy jyly jalpy jylu quattylyǧyn 400 Gkal-ǧa deiın artyrudy qamtamasyz etedı. JEO-3-tıŋ bırınşı kezegınıŋ qūrylys jūmystary jalǧasuda. Astana qalasynyŋ energetika basqarmasynyŋ basşysy Baqtybek Japaevtyŋ aituynşa, käsıporynnyŋ tabysy tūtastai investisiialyq baǧdarlamalarǧa baǧyttalǧan. Is jüzınde atalǧan nysandar özın-özı qamtamasyz etıp, biudjet qarjysyn şyǧyndamaidy. Būǧan qosa, JEO-3-tıŋ ekınşı kezeŋı MJÄ şeŋberınde jüzege asyrylatyn bolady.
Ä.İsekeşev energiia közderın qalpyna keltıru men salu kez kelgen qala, äsırese, Astana üşın maŋyzdy strategiialyq mındet bolyp tabylatynyn atap öttı. Qazırgı kezde JEO-2 jäne JEO-3-te jürgızılıp jatqan jūmystar jylu şyǧaru tapşylyǧyn ötep, Astananyŋ barlyq audandaryn üzdıksız jäne senımdı jylumen jäne elektr energiiasymen qamtamasyz etuge mümkındık beredı. «Al bızdıŋ basty mındetımız osy» dedı qala äkımı.
