Äsima BİMENDİNA:BIRLIGIMIZ – BEKEM, KELEŞEGIMIZ – KEMEL
Äsima Bimendina, QR Parlament Mäjılısınıŋ deputaty
Elımız Täuelsızdık alǧan 23 jylda talai biıktı baǧyndyryp, köptegen jetıstıkke jettı, bolaşaqqa senımdı qadamdar jasady, qazaq atymyz älemge tanyldy. Aibyndy qalamyz Astana – asqaraly asularymyzdyŋ aiǧaǧy. Elımızde ötken halyqaralyq şaralar abyroiymyzdy asyrdy.
Elbasy keşe Täuelsızdık künıne arnalǧan saltanatty jiynda söilegen sözınde «Nūrly jol» jaŋa ekonomikalyq saiasaty jai ǧana baǧdarlama emes, älemdık syn-qaterlerge qarsy daiyndalǧan qorǧanys qūraly ekenın erekşe atap öttı. Jahandyq ekonomikamen sanasa otyryp, baiyppen jasalǧan baǧdarlama eldegı barlyq öŋırler üşın jaŋa mümkındıkterge jol aşady.
Elbasy kelesı jyly ülken deŋgeide toilanatyn mereilı datalarǧa toqtaldy. Sonyŋ ışınde Qazaq handyǧynyŋ qūryluynyŋ 550 jyldyǧyn erekşe atauǧa bolady. Būl tarihymyz tügendeletın, ūlttyq bolmysymyz ūlyqtalatyn, eldıgımızdıŋ ırgesın nyǧaitatyn maŋyzdy mereke bolmaq. Bız – biık baspaldaqtardan, tarihi ötkelderden ötken tektı halyqpyz. Sondyqtan osyndai ūly toidy ötkızuge daiyn boluymyz kerek, därıpteuımız kerek, özımızdı özgelerge däleldeuımız kerek. Elbasy nyqtap tapsyrmalar berdı. Endı ruhy joǧary elımız mūndai kündı asqaqtatyp atap ötedı dep oilaimyn.
Qazaqstannyŋ bügıngıdei berık el boluynda ūlttar arasyndaǧy yntymaqtyŋ rölı zor. Keler jyly Qazaqstan halqy assambleiasynyŋ 20 jyldyǧy toilanady. Bırlıgımız bekem bolsa, keleşegımız – kemel.