«Aialaǧan Astana» baiqauynyŋ qatysuşylary qyzu daiyndyq üstınde.
Balalarǧa arnalǧan «Aialaǧan Astana» ūlttyq muzykalyq televiziialyq baiqauy biyl ekınşı ret ötkelı otyr. Onyŋ ūiymdastyruşylary – «Nūr Otan» HDP, Astana qalasy äkımdıgı, İgor Krutoi jetekşılık etetın «ARS» prodiuserlık kompaniiasy jäne «Euraziia» bırınşı arnasy. Baiqaudyŋ ırıkteu kezeŋınde elımızdıŋ 16 qalasynan 8-12 jas aralyǧyndaǧy 1000-nan asa bala baq synap, ortalarynan 17 bala ozyp şyqqanyn ılgerıde habarlaǧan edık. Qazır finalister qyzu daiyndyq üstınde. Baiqaudyŋ aqtyq syny Astana qalasynda 4-6 şılde elorda toiyna orai ötkızıledı.
Bas jüldege ie bolǧan jas daryn «Detskaia Novaia Volna» baiqauynda Qazaqstandy tanystyru mümkındıgıne jäne 1 million teŋge kölemındegı aqşalai syiaqyǧa (ol balanyŋ şyǧarmaşylyq damuyna jūmsalady) ie bolady. Būǧan qosa, 1, 2, 3 oryndarǧa jäne «Körermender közaiymy» atalymyna laiyq dep tanylǧan balalar da qūralaqan qalmaidy deidı ūiymdastyruşylar.
Qazır Qazaqstannyŋ tükpır-tükpırınen ırıktelgen jetkınşekter änşılık qabıletterın şyŋdap, vokal, solfedjio, akterlık şeberlık boiynşa reseilık Lina Arifulina şeberhanasynyŋ bılgır mamandarynan, pedagogtarynan sabaq aluda. Baiqaudyŋ negızgı maqsaty da tasada qalǧan talantty ızdep tauyp, käsıbi änşılık jolǧa salu desek, jülde alsyn-almasyn, bıraq bılıktı mamandardan sabaq aludyŋ özı balǧyndar üşın ülken olja ekenı anyq.
«Şou türınde ötetın baiqau üş kün boiy tıkelei efirde körsetıledı. Arnaiy ırıktelıp alynǧan 12 konserttık nömır daiyndalyp jatyr. Ädılqazylar alqasynyŋ ūiǧarymymen, SMS arqyly joldaǧan halyqtyŋ dauysy da eskerıledı, balalar «Zaratushtra Band» orkestrınıŋ süiemeldeuımen jandy dauysta än salatyn bolady. Qatysuşy mındettı türde qazaq jäne aǧylşyn tılderınde än aituy tiıs. Jeke oryndaumen qatar, M.Arapbaeva, A.Kışkenbaev, S.Baqaeva syndy änşılermen duet bolady» deidı baǧdarlamany ūiymdastyruşy reseilık mamandar.
UYZ LEBIZ
Ǧalimūrat Äbdımanapov, 13 jasta:
«Qaraqat» mektep-studiiasynda şyŋdaldym
– Än aitu – maǧan naǧaşylarymnan daryǧan öner. Ekınşı synypta oqyp jürgende pianino üiırmesıne bardym, sondaǧy pedagogter maǧan dauysymnyŋ jaqsy ekenın, horda än aityp jüre bermei, jeke än aitu kerektıgın aitty. Bıraq ata-anam da, men de asa män bergen joqpyz. Keiın 2011 jyly «Qaraqat» mektep-studiiasyna bardym, sol mektepte oqyǧanyma biyl üşınşı jyl.
Malika Smaǧūlova, 10 jasta:
Üi ışımızben önerge jaqynbyz
– Men Pavlodar qalasynan keldım. Eŋ alǧaş kastingke kelgende Adeldıŋ «Rolling in the deep» änın oryndadym. Armanym – sol änşımen kezdesıp, duet aitu. Ol üşın köp eŋbek etıp, ter tögu qajet. Menıŋ äpkem Aida Smaǧūlova kezınde «Voyage» tobynyŋ änşısı boldy, qazır de muzykamen ainalysady, aǧam Mergen Smaǧūlov ozyq DJ-lerdıŋ qatarynda. Äkem muzykalyq aspaptardyŋ qūlaǧynda oinaidy. Men de osy baiqaudan jüldelı oryn alyp, ata-ana ümıtın aqtaitynyma senımdımın, sebebı, özıne senbegen adamǧa eşkım senbeidı.
Zamira Saǧadieva, 12 jasta:
Än aitudy äjemnen üirendım
– Men Aqmola oblysynyŋ Zerendı audanynan keldım. «Aialaǧan Astana» – bızge berılgen ülken mümkındık, mūnda bız öz darynymyzdy bükıl elge tanyta alamyz. Astanadaǧy künderım qyzyqty ötude, bärımız «Duman» oiyn-sauyq ortalyǧyna, «Astanalyq sirkke» bardyq, Esıl özenınde parohodpen jürdık. Ataqty sportşy Denis Tennıŋ önerın tamaşaladyq. Kün saiyn vokaldan, biden sabaq alamyz, iogaǧa baramyz. Maǧan än aitudy äjem üirettı, anam da önerden qūralaqan emes. Bolaşaqta men de öner auylynan alys ketpeimın, tanymal änşı bolǧym keledı.
Aijan QASYMOVA,
L.Gumilev atyndaǧy Euraziia ūlttyq universitetınıŋ studentı
