11 mausym künı Parijde Halyqaralyq körmeler biurosy Bas Assambleiasynyŋ sessiiasynda Qazaqstan resmi türde tanylyp, «EKSPO – 2017» halyqaralyq mamandandyrylǧan körmesınıŋ bairaǧyn saltanatty türde qabyldap alǧan edı. Keşe osy şaraǧa bailanysty «Rixos President Astana» qonaqüiınde Syrtqy ıster ministrınıŋ bırınşı orynbasary Räpıl Joşybaev pen «Astana EKSPO – 2017» ūlttyq kompaniiasynyŋ basqarma töraǧasy Talǧat Ermegiiaevtyŋ qatysuymen baspasöz mäslihaty öttı.
Jiynda söz alǧan «EKSPO – 2017» komissary Räpıl Joşybaev bügınde şeteldık ärıptestermen kelıssözder bastalǧanyn jäne investisiialyq bailanys ornatylyp jatqanyn jetkızdı.
«Fransiia astanasy Parij qalasynda körme bairaǧy elımızge saltanatty türde tapsyryldy. Halyqaralyq körmeler biurosynyŋ Bas hatşysy Visente Gonsales Lossertales körme tuynyŋ Qazaqstanǧa tabystaluyn erekşe jaǧdai dep baǧalady. Onyŋ aituynşa, elımız «EKSPO – 2017» körmesınıŋ tırkeu qūjattamasyn sättı qorǧady. Bas hatşynyŋ qazırdıŋ özınde taŋdaudyŋ dūrys jasalǧany däleldendı degenı bızdı quantady. Endeşe, aldymyzda auqymdy jūmystar tosyp tūr. Endıgı maqsat – el abyroiyn asqaqtatatyn şaraǧa daiyndyq jūmystaryn tiımdı ūiymdastyru» deidı ol.
Aita ketken jön, 12 mausym künı Ūlttyq kompaniia basşysy Talǧat Ermegiiaev Burabaida ötken şeteldık investorlar keŋesınde Elbasy Nūrsūltan Nazarbaevqa körme tuyn saltanatty jaǧdaida tabys ettı. Prezident körme bairaǧyn abyroimen qabyldap alǧany üşın kompaniia basşylyǧyna alǧys bıldırıp, daiyndyq jūmystaryna oŋ baǧa bergen bolatyn.
«Körme ötkızudıŋ halyqaralyq talaptary boiynşa, Tudy almaiynşa, EKSPO körmesınıŋ keşenderın saluǧa bızdıŋ qūqymyz joq. Bıraq, elımızdıŋ klimattyq jaǧdaiy eskerılıp, bızge säuır aiynan bastap körme qūrylysyn bastauǧa rūqsat berıldı. Bügınde körmege daiyndyq jūmystary keşıktırılmei, keste boiynşa jürgızılude. Qūrylys qarqyny künnen künge artyp keledı» deidı T. Ermegiiaev.
Sonymen, üş aiǧa sozylatyn «EKSPO – 2017» körmesınıŋ bastaluyna 1082 kün qaldy. Aituly şaraǧa jüzden astam memleket pen onǧa juyq halyqaralyq bedeldı ūiymdar jäne innovasiialyq tehnologiia salasyndaǧy köşbasşy kompaniialar qatysatyn bolady.
Gülmira AIMAǦANBET
