Memleket basşysy – Qazaqstan Respublikasy Qaruly küşterınıŋ Joǧarǧy Bas qolbasşysy räsım aiasynda elımızdıŋ joǧary äskeri oqu oryndarynyŋ tülekterıne ofiserlık şen tapsyrdy. Qazaqstan Prezidentınıŋ qolynan 12 tülek – Qorǧanys ministrlıgı Qūrlyq äskerlerı äskeri institutynyŋ, Işkı ıster ministrlıgı Işkı äskerler äskeri institutynyŋ jäne Ūlttyq qauıpsızdık komitetı äskeri institutynyŋ üzdık bıtıruşılerı şen aldy.
Nūrsūltan Nazarbaev jinalǧandarǧa arnaǧan sözınde memlekettık tu ärbır qazaqstandyq üşın qasiettı qūndylyq bolyp sanalatyn ūlttyq bırlık nyşany ekenın atap öttı.
– Būl – täuelsızdıgınıŋ 25 jyldyǧyn biyl toilaityn elımızdıŋ asqaq rämızı. Bız egemen Qazaqstandy osy kök tu astynda bırge qūrdyq. Şirek ǧasyr ışınde quatty memlekettıŋ ırgesı berık ǧimaratyn bırlesıp saldyq. Jaqynda ǧana respublikamyz BŪŪ Qauıpsızdık keŋesınıŋ tūraqty emes müşesı bolyp sailandy. Älemdık qoǧamdastyq planetadaǧy beibıtşılık pen qauıpsızdıktı qamtamasyz etu ısıne atsalysu syndy biık missiiany Qazaqstanǧa senıp tapsyrdy. Būl – elımızdıŋ biık bedelı men tabysty damuynyŋ moiyndaluy. BŪŪ Qauıpsızdık keŋesındegı jūmys bızdıŋ tuymyzdy būrynǧydan da tanymal ete tüsedı, – dedı Qazaqstan Prezidentı.
Memleket basşysy respublikanyŋ joǧary äskeri oqu oryndarynyŋ barlyq tülekterın qūttyqtap, qazaqstandyq patriotizm türlı salada, sonyŋ ışınde eŋ aldymen Otanǧa qyzmet etude körınıs tabatynyn aitty.
– Bügın bız joǧary äskeri oqu oryndarynyŋ üzdık tülekterıne ofiserlık şender tapsyramyz. Osy künderı myŋdaǧan qazaqstandyq jas oquyn aiaqtap, ülken ömırge aiaq basady. Sızder öz joldaryŋyzdy eldıŋ bas bairaǧynyŋ aldynda, saltanatty jaǧdaida bastap otyrsyzdar. Būl kezdeisoqtyq emes, öitkenı sızder qoǧamda qūrmetke ie airyqşa mamandyqty taŋdadyŋyzdar. Sızder bırneşe jyldy jaqsy bılım aluǧa, jaŋa maşyqtardy igeruge, dostyq pen özara kömektıŋ qūndylyǧyn tüsınuge arnadyŋyzdar. Endı osynyŋ bärın täjıribede qoldanu kerek, – dedı Nūrsūltan Nazarbaev.
Qazaqstan Prezidentı memlekettık tu köteru räsımı dästür boiynşa Astana künıne arnalǧan ıs-şaralardyŋ bastauy bolyp sanalatynyna nazar audardy.
– Biyl bız Astananyŋ 18 jyldyǧyn – kämelettık jasqa toluyn atap ötemız. Būl – biıkter baǧyndyrylǧan jäne sol biıkten jaŋa perspektivalar körınıp tūrǧan kez. Täuelsızdık tudyrǧan Astana qūlpyrǧan üstıne qūlpyryp, qaryştap ösude. Būl qala eldı bırıktırıp, jaŋa tabystarǧa jetelep, köş basynda keledı, – dedı Memleket basşysy.
Sondai-aq Nūrsūltan Nazarbaev elordanyŋ millionynşy tūrǧyny ömırge kelgenın aitty.
– Bügın erteŋgısın Mūhamediiarovtar otbasynda Astananyŋ millionynşy tūrǧyny ömırge kelgenın zor quanyşpen habarlaimyn. Säbidıŋ anasy – balabaqşa tärbieşısı, äkesı – elektr monterı. Endı bızdıŋ elorda million tūrǧyny bar qalalar qataryna endı, – dedı Qazaqstan Prezidentı.
Soŋynda Nūrsūltan Nazarbaev barşa Qazaqstan halqyn aldaǧy Astana künımen qūttyqtap, beibıtşılık pen tatulyq, tynyştyq pen baq-bereke tıledı.
