Elbasy Nūrsūltan Nazarbaev Astanadaǧy Nauryz meiramyna arnalǧan ıs-şaraǧa qatysty. Merekelık ıs-şara aiasynda Memleket basşysy «Jaŋarǧan jer, baq qonǧan nūrly el» miuziklın tamaşalady. Sondai-aq, «EKSPO» körme keşenı aumaǧynda ornalasqan etnoauyldy aralap kördı.
Memleket basşysy būqaralyq aqparat qūraldary ökılderı aldynda söz söiledı. Nūrsūltan Nazarbaev barşa qazaqstandyqtardy Nauryz merekesımen qūttyqtap, būl meiram ūrpaqtar sabaqtastyǧynyŋ jäne halqymyzdyŋ tereŋnen tamyr tartqan salt-dästürı men mädenietınıŋ simvolyna ainalǧanyn aitty.
– Nauryz şynaiy jalpyhalyqtyq merekege, ärbır azamatymyz bükıl Qazaqstannyŋ damuy men örkendeuıne zor üles qosyp otyrǧanyn körsetetın el bırlıgınıŋ jarqyn ülgısıne ainaldy, – dedı Nūrsūltan Nazarbaev.
Qazaqstan Prezidentı jalpyǧa ortaq jaŋaru men ruhani jaŋǧyrudy tanytatyn būl qasterlı merekenıŋ önegelık maŋyzy zor ekenın erekşe atap öttı.
– Ejelden būl meiram adamdardy bereke-bırlıkke bastap, olardy jaqsylyq pen meiırımdılıkke, mahabbat pen şattyqqa bölep keledı. Būl künderı bız bır-bırımızge qoldau körsetıp, ökpe-renışımızdı keşıremız, üilesımdılık pen bırlıkke ūmtylamyz. Elımızdıŋ jahandyq bäsekege qabılettılıgınıŋ berık negızın qalyptastyryp, özara qūrmet pen kelısım qūndylyqtaryn nyǧaitu bärımız üşın asa maŋyzdy, – dedı Elbasy.
Memleket basşysy Qazaqstannyŋ täuelsızdık jyldarynda basty barlyq baǧyttar boiynşa zor nätijelerge qol jetkızgenıne erekşe nazar audaryp, bügınde elımız odan da örşıl maqsatty – älemnıŋ ozyq damyǧan otyz elınıŋ qataryna qosyludy közdep otyrǧanyn atap öttı.
Prezident ärbır azamatymyzǧa jaŋa mümkındıkter beretın «Bes äleumettık bastamany» ıske asyru mäselesıne erekşe toqtaldy.
Soŋynda Elbasy Otanymyz – Qazaqstan Respublikasynyŋ örkendeuı jolynda barşa jūrtqa baqyt, bereke-bırlık pen tolaǧai tabys tıledı.
