«EKSPO-2017» halyqaralyq körmesınıŋ mūrasyna ainalǧan «Nūr Älem» pavilony elordanyŋ ǧajaiyp ǧimarattary qataryn byltyr ǧana tolyqtyrdy.
Körmenıŋ arhitekturalyq simvoly sanalatyn «Nūr Älem» – älemdegı eŋ ülken sfera. Onyŋ diametrı – 80 metr, al biıktıgı – 100 metr. Halyqaralyq baiqauǧa qatysqan 105 kompaniianyŋ ışınde Adrian Smith+Gordon Gill Architecture AQŞ säuletşılerı tobynyŋ jobasy üzdık bolyp tanyldy. Ǧimarattyŋ alǧaşqy qabaty Qazaqstannyŋ tarihy, mädenietı, dästürı, körıktı jerlerı men elımızdıŋ soŋǧy jetıstıkterıne arnalǧan. Pavilon «Qazaqstanmen tanysu» jäne «Jasampazdyq energiiasy» atty ekı basty taqyrypty qamtidy. Al 2-8 qabattary Bolaşaqtyŋ muzeiı ıspettes. Tarqatyp aitsaq, sandyq, multimediialyq jäne interaktivtı tehnologiialardyŋ kömegımen jasalǧan ärbır qabat türlı energiianyŋ mümkındıgın tanystyrady. Kelgen qauym 2-qabatqa köterılgende su energiiasyn öndıretın qūrylǧylardy köredı. Kelesı qabatta kinetikalyq energiianyŋ tarihi jädıgerlerı saqtalǧan. Al biomassaǧa arnalǧan 4-qabatqa kırseŋız, jaiqalǧan jasyl jelektıŋ ışınde aŋ-qūsty baiqaisyz. 5-qabatta jel quatyn körnekı türde körsetetın aua fontany bar. Bır qabat joǧary köterılgende kün jüiesınıŋ qalai paida bolatynyn baiqap, kün säulesınen quat alatyn kölıkke otyryp, jarysqa qatysa alasyz. 7-qabatta ǧaryş älemıne saiahat jasap, ǧaryşkerlerdıŋ kiımderı men kemesın köresız. Soŋǧy segızınşı qabat «Astana – bolaşaqtyŋ qalasy 2050» dep atalady. Alyp ekrannan qala qūrylysynyŋ qaryştap damuyn beineleitın filmdı tamaşalauǧa bolady. Odan bölek bolaşaqta josparlanǧan jobalarmen tanys bolasyz. Sondai-aq, būl qabatta 93 metr biıktıkte ornalasqan «şyny köpır» bar. Ǧimarattyŋ joǧarǧy bölıgındegı şolu alaŋyna lift arqyly köterılıp, bükıl EKSPO qalaşyǧyn tamaşalauǧa bolady.
«Astana EKSPO-2017» ūlttyq kompaniiasynyŋ bas menedjerı Roza Asanbaevanyŋ aituynşa, säulettık şeşımı men kelbetı köz tartatyn «Nūr Älemnıŋ» bırneşe erekşelıgı bar. «Nūr Älemnıŋ» qūrylysyna 13000 tonna metall ketken. Şar 2800 äinek jabyndysynan jasalǧan. Är äinektıŋ salmaǧy 600-800 kelıge deiın jetedı. Qūrylymnyŋ kün energiiasyn elektr quatyna ainaldyratyn jabdyǧy bar. Sferanyŋ joǧarǧy jaǧynda 2 alyp jel generatory ornatylǧan. Nysannyŋ jalpy aumaǧy – 22000 şarşy metr. Būl – tört futbol alaŋynyŋ kölemımen para-par. Körmenıŋ barlyq nysandarynyŋ qūrylysy üşın 56 myŋ tonna metall men 500 myŋ tonna beton jūmsalǧan. Eseptesek, būl älemdegı eŋ biık ekı mūnarany tūrǧyzuǧa jetedı.
Ǧimarattyŋ «kırpışı» endı qalanyp jatqannyŋ özınde säulet önerınen habary bar adamdar ony Londondaǧy Hrustal saraiyna, Parijdegı Eifel mūnarasyna, Briusseldegı «Atomium» ıspettı belgılı nysanǧa ainalatynyna senım bıldırdı.
Qazırdıŋ özınde «Nūr Älem» ǧimaraty turizm jäne halyqaralyq körmelerdıŋ älemdık mūrasyna endı.
