Būryn tehnikany syrttan tasymaldap kelgen elımızdıŋ äskeri salasy endı köp ūzamai özımızde öndırılgen kölıkterdı qoldanatyn bolady. Keşe Astana qalasynyŋ äkımı İmanǧali Tasmaǧambetov jäne QR Qorǧanys ministrı Ädılbek Jaqsybekov äskeri jäne azamattyq maqsattaǧy arnaiy maşinalar öndıretın jaŋa zauyttyŋ ırgetasyna kapsula qoidy.
Bolaşaq zauyt «Astana – jaŋa qala» arnaiy ekonomikalyq aimaǧyna kıretın İndustrialdyq park aumaǧynda ornalasqan. TMD men Ortalyq Aziia aumaǧynda alǧaş ret qolǧa alynyp otyrǧan jobany jüzege asyruǧa Oŋtüstık Afrikalyq «Paramaunt grupp» kompaniiasy jäne «Qazaqstan injiniring» Ūlttyq kompaniiasy AQ men «Qazaqstan injiniring Distribiuşn» JŞS-nyŋ bırlesken küşı jūmyldyrylmaq. Öndırıstıŋ negızgı salmaǧyn kötergelı otyrǧan «Paramaunt grupp» kompaniiasy – qaruly küşter salasyna zamanaui tehnika öndıru jaǧynan düniejüzındegı aldyŋǧy qatarly käsıporyn. Olardyŋ şyǧarǧan äskeri tehnikalary qandai şabuyldarǧa da tötep beretın qorǧanysy berık, sapasy joǧary eken. Kompaniianyŋ brondalǧan döŋgelektı maşinalary elımızdıŋ Qaruly Küşterınıŋ äskeri poligonynda ötkızılgen synaqtan da sättı ötıptı. Aitalyq, oŋtüstık afrikalyqtardyŋ tank şabuyldaryna qarsy zymyrandyq qūrylǧysy bar kölıkterı men jaiau äskerlerdı qaru jaǧynan qoldaityn oq ötpeitın maşinalarynyŋ qandai şaiqasqa da qarsy tūra alatyn qauqary bar. Jarylǧyş zattarǧa qarsy qorǧanysy bar taǧy bır kölıgı «älemdegı eŋ joiqyn tehnika» atyn alyp ta ülgergen. 
Zauyttyŋ keleşekte öndıretın kölıkterdıŋ nobaiymen tanysyp şyqqan Astana qalasynyŋ äkımı İmanǧali Tasmaǧambetov pen Qorǧanys ministrı Ädılbek Jaqsybekov būl joba Memleket basşysy – QR Qaruly Küşterınıŋ Joǧarǧy Bas qolbasşysy Nūrsūltan Nazarbaevtyŋ: «2020 jylǧa qarai memlekettık qorǧanys tapsyrysynyŋ 80 paiyzy otandyq öndırıspen qamtamasyz etıluı kerek» degen tapsyrmasyna säikes keletının atap öttı. Sebebı, zauyt äskeri tehnikalar öndırıp qana qoimai, oǧan qajettı qosalqy bölşekterdı, oq ötpeitın temır taqtailardy kesu, dänekerleu, maşinalardy qūrastyru syndy köptegen şarualardy atqaratyn ämbebap käsıporyn bolmaq. Jylyna 120-dan 360-qa deiın kölık şyǧarudy josparlap otyrǧan zauyt kelesı jyldyŋ aiaǧynda ıske qosylmaq. Al, onyŋ alǧaşqy önımın şyǧaru 2015 jyldyŋ qaŋtar-aqpan ailarynda josparlanyp otyr. «Paramaunt grupp» kompaniiasynyŋ biznestı damytu jönındegı direktory Maiklz Chemberstıŋ aituynşa, zauyt tek äskeri-qorǧanys tehnikalardy ǧana emes, jolauşylarǧa arnalǧan 40, 100 oryndyq avtobustar şyǧarudy da oilastyryp otyr. Bıraq, būl sūranysqa bailanysty, – deidı ol. Öndırıstık käsıporyn ıske qosylsa, 150 adamdy jūmyspen qamtamasyz etedı. Oǧan qosa, zauytta jūmys ısteitın 50-den astam injenerdı alys-jaqyn şet elderde oqytu josparlanyp otyr.
Qymbat TOQTAMŪRAT
