Qazaqstan polisiiasy künı käsıbi merekesıne orai Astana qalasynyŋ äkımı Ädılbek Jaqsybekov elordalyq tärtıp saqşylaryna jaŋa 40 qyzmettık kölıktıŋ kıltın tabys ettı.
Qalalyq äkımdık aldyndaǧy alaŋda qaz-qatar tızılgen 40 polisiia kölıgı közge erekşe tüsedı. Kök beldemesı bar kölıkterdıŋ markasy da ärtürlı. «Pejo 301», «Şkoda Oktaviia» avtomaşinalary qala ışındegı qauıpsızdık pen tärtıptı qamtamasyz etse, «SangEng-Kairon» djip kölıgı şet jaqtaǧy ūŋǧyl-şūŋǧyly köp aumaqtardy baqylauǧa arnalǧan. Al, «Pejo 508» maşinasy resmi delegasiiany alyp jüruge, olardyŋ qauıpsızdıgın qorǧauǧa arnaiy mamandandyrylǧan batalonǧa berıledı eken.
Saltanatty şarany aşqan Ädılbek Jaqsybekov polisiialardy käsıbi merekesımen qūttyqtap, qoǧamnyŋ qauıpsızdıgı senıp tapsyrylǧan saqşylarǧa ülken jauapkerşılık jüktelıp otyrǧanyn atap öttı:
– Memleket basşysy özınıŋ 5 institusionaldy reformany jüzege asyru baǧytyndaǧy «100 naqty qadam» baǧdarlamasynda polisiiany jaŋa sapaly kezeŋge köteru, qoǧamdyq tärtıptı qorǧau, qūqyq būzuşylyqqa qarsy tūru syndy mäselelerge qatysty bırqatar maŋyzdy tapsyrma bergenı belgılı. Qyzmettık avtokölıkter parkın jaŋartu – memlekettıŋ qūqyq qorǧau organdary qyzmetınıŋ sapasyn arttyruǧa baǧyttalǧan sol keşendı şaralardyŋ bır bölıgı ǧana. Polisiia qyzmetıne zamanaui tehnologiialardy engızu arqyly būl salany jaŋa deŋgeige köterudı maqsat etıp otyrmyz. Tärtıp saqşylary da qazırgı zaman talabyna sai bolyp, özderıne artylǧan mındettı abyroimen atqaruy tiıs, – dedı ol.
Qala äkımı elordada «Tynys-tırşılıktı qamtamasyz etudıŋ keşendı jüiesı» atty auqymdy joba jüzege asyrylyp jatqanyn, sonyŋ aiasynda aldaǧy uaqytta qalada 15 myŋ beinekamera ornatu közdelıp otyrǧanyn jetkızdı.
Būdan keiın Ädılbek Ryskeldıūly jaŋa polisiia kölıkterıne otyryp körıp, olardyŋ tehnikalyq jaǧdaiymen tanysty. Astana qalasy IID Äkımşılık polisiia basqarmasy basşysynyŋ orynbasary Eljan Chupekovtıŋ aituynşa, Qazaqstanda qūrastyrylǧan būl kölıkter qazırgı zaman talaptaryna sai keledı. Onda Işkı ıster ministrlıgınıŋ aqparattyq bazasynan qajettı jedel aqparatty aluǧa bolatyn jäne qoǧamdyq tärtıptı būzǧan oqiǧalar men jol qozǧalysy erejelerın saqtamau deregın tırkeitın arnaiy qūrylǧylar ornatylǧan. «Bızdıŋ avtoparkte qauıpsızdıktı qamtamasyz etuge arnalǧan kölıkter jetkılıktı. Qalalyq äkımdıktıŋ qoldauymen olardyŋ qūramy ärdaiym jaŋartylyp otyrady. Byltyr da polisiia künıne orai 40 avtokölık kıltın aldyq» deidı Eljan Qaliūly.
Būl kölıkterdıŋ bır bölıgı – uchaskelık inspektorlarǧa, keibıreuı – jol-patruldık polisiiaǧa, endı bırı kämelettık jasqa tolmaǧandardyŋ ısterımen ainalysatyn inspektorlarǧa berılmek.
Qymbat TOQTAMŪRAT
