QAZAQSTANDYQ «ELEKTRONDYQ ÜKIMET» QYZYQTYRADY
Prezident Nūrsūltan Nazarbaev elımızdı älemnıŋ damyǧan 30 elınıŋ qataryna qosu jolynda bıregei ısterge qadam basuda. Äsırese, Qazaqstanda bılım beru men aqparattyq tehnologiia salalaryn jetıldıre tüsu üşın ırgelı şaralar qolǧa alynuda. Atqarylǧan şarualar da nätijesız emes, bızden körşı elder ülgı alatyn därejege de jetıp ülgerdık. Aitalyq, jaqynda Täjıkstan ökılderı elektrondyq ükımettı qūrudyŋ qazaqstandyq täjıribesın üirenu maqsatymen Astanaǧa keldı. Būl jönınde gazet tılşısıne «Ūlttyq aqparattyq tehnologiialar» AQ basqarma töraǧasy Ruslan Eŋsebaev äŋgımelep berdı.
– Alystan at terletıp kelgen aǧaiynǧa aldymen qai jetıstıkterıŋızdı körsettıŋızder?
– Qazaqstandaǧy «elektrondyq ükımet» qūru täjıribesın üirenu üşın Astanaǧa Täjıkstan Respublikasy memlekettık organdarynyŋ ökılderı keldı. Täjıkstan delegasiiasymen kezdesu aiasynda, «Ūlttyq aqparattyq tehnologiialar» AQ ökılderı «elektrondyq ükımet» portaly, elektrondyq qūjat ainalymy jüiesı, «E-lisenziialau» jüielerı jäne «e-Learning» jūmysyn jan-jaqty körsettı. Sondai-aq Qazaqstan Respublikasynyŋ aqparattandyru salasyndaǧy bıryŋǧai tehnikalyq saiasatyn ıske asyru jönındegı täjıribemızben bölıstık. Sonymen qatar, Astananyŋ qonaqtaryna osyndaǧy Halyqqa qyzmet körsetu ortalyqtarynyŋ yqpaldastyrylǧan aqparattyq jüiesı qalai jūmys ısteitındıgı turaly tüsındırıldı.
– Şeteldıkter pıkırı jönınde aita alasyz ba, mäselen, bızdegı aqparattyq tehnologiia jüiesı olardyŋ köŋılınen şyqty ma?
– Älbette, bızdıŋ täjıribemız, jūmys jüiemız olarǧa ūnady dep oilaimyn. Öitkenı, Täjıkstan Respublikasy Prezidentı janyndaǧy memlekettık basqaru institutynyŋ ǧylym jäne halyqaralyq qatynastar jönındegı rektor orynbasary Akmaldjon Abduhalikov qazaqstandyq aqparattyq tehnologiianyŋ qarqyndy damuyna taŋǧalysyn jasyrmady. «Täjıkstanda Qazaqstandaǧy siiaqty köptegen e-ükımet qyzmetın qamtamasyz etetın zaŋnamalyq jäne normativtık-qūqyqtyq qūjattar qabyldanǧan, alaida olardy ıske asyru mehanizmı äzırşe dūrys jolǧa qoiylmaǧan. Qazaqstan, būl jönınde aitarlyqtai nätijelerge jetken eken. Bız de sızderdıŋ täjıribelerıŋızdı qabyldaimyz dep ümıttenemın» dep aǧynan jaryldy ol.
– Mūndai şaralar aldaǧy uaqytta da jalǧasuy mümkın be?
– Eger bızdıŋ täjıribemızdı üirengılerı kelıp, ūsynys jasaityndar bolsa, ärdaiym daiynbyz. «Ūlttyq aqparattyq tehnologiialar» AQ körşı elderge elektrondyq ükımettı qūruda jäne damytuda ädıstemelık kömek körsetuden bas tartpaidy.
Ashat RAIQŪL