Ūly Jeŋıs – är äulettıŋ estelıgı bar atauly kün. Atamyz Temırǧali Ädılbekov – soǧysqa qatysyp, eldıŋ tynyştyǧy üşın küresken jan. Bız ony maqtan etemız. Maidanger atamyzdyŋ ömırı, jeŋıske jetu üşın körsetken erlıgı – bız üşın önege.
Ol – Ūly Otan soǧysynyŋ ardagerı, zapastaǧy milisiia polkovnigı, bız üşın eŋ meiırımdı, ardaqty ata. Aqmola oblysy Arşaly audanynyŋ Qoigeldı auylynda düniege kelgen. Reseidıŋ Ufa qalasynda soǧys täsılderın üirenıp, 1942 jyly jazda qan maidanǧa – Briansk qyrǧynyna attanady.
Bız atamyzǧa qonaqqa barǧandy jaqsy köretın edık. Sebebı, bızge ärtürlı qyzyq äŋgımeler men oqiǧalar aityp beretın.
Atamyzdyŋ sol qolynyŋ sūq sausaǧy joq edı. Onyŋ sebebın sūraǧanymyzda bızge bylai dedı: «Orel-Kursk būǧazyndaǧy maidan… Ainala kök tütın. Gürs-gürs jarylǧan bomba. Tüskı as kezı. Starşina aspazdy ertıp kelıp, jauyngerlerge tamaq berdı. Snariadtar jarylyp jatty. Aspaz tamaqty tez-tez saldy. Tamaqty apyl-ǧūpyl ışıp jattyq. Işpeseŋ, bırneşe kün boiy aş qalatynyŋ anyq. Kenet tu syrtymyzdan gürs etken dybys şyqty. Qūlaǧym şyŋ ete qaldy. Köz aldym būldyrap, aiaq-qolym dır-dır ettı. Qolymdaǧy qūty men qasyǧym ūşyp kettı. Bet-auzym qanǧa malynǧan. Sol qolymnyŋ sūq sausaǧyn jarylǧan snariadtardyŋ jarqynşyqtary jūlyp tüsırıptı».
Atamyz 97 saptyq 136-atys diviziiasynda qyzmet atqaryp, bırneşe äskeri operasiiaǧa qatysqan. 1942 jyly Briansk, 1943 jyly Orel-Kursk būǧazyndaǧy maidandarǧa aralasyp, ölım men ömır arpalysqan şaiqasta jaraqattanǧan.
Maidannan jaralanyp, elge oralǧan soŋ, ışkı ıster organdaryndaǧy qyzmetın Aqmola oblysy Esıl audany bölımşesınıŋ arnaiy komendanty retınde bastaǧan. Osy salada 33 jyl boiy üzbei eŋbek etıp, milisiia podpolkovnigı şenıne jetken. II därejelı «Ūly Otan soǧysy» ordenı, «Jukov» jäne basqa medaldarmen marapattalǧan.
Atamyzdyŋ suret salatyn önerı de bar. Ol tıptı soǧys kezınde de būl süiıktı ısın tastamaǧan. Maidanda «Boevoi listok» ünparaǧynyŋ ūrandaryn jazyp, ony qazaqtyŋ oiularymen bezendırgen körınedı.
Bızdıŋ atamyzdyŋ esımı 2012 jyly Qazaqstan, Resei, Ukraina, Belarus memleketterınıŋ ataqty azamattarynyŋ qūrmetıne şyǧarylǧan «Üzdık tūlǧalar» ensiklopediiasyna engızılgen. Ol da atamyzdyŋ adal eŋbegınıŋ arqasy.
Abai Qūnanbaevtyŋ «Aqyryn jürıp anyq bas, eŋbegıŋ ketpes dalaǧa» degen sözderı atamyzdyŋ ömır boilyq ūstanymyna ainalǧan. Ol ärdaiym bızge, ūrpaqtaryna, «Eŋ bastysy, käsıpterıŋe nemqūraily qaramai, jandaryŋdy salyp eŋbek etıŋder. Elge adal qyzmet ısteŋder. Paraqorlyq, jemqorlyq – eŋ naşar qasietter. Odan aulaq bolyŋdar. Adal bolyŋdar. Kımnıŋ jaqsy, kımnıŋ jaman ekenın halyq özı bıledı» dep aityp otyratyn.
Biyl 26 aqpanda №70 mektep-liseide atamyzben kezdesu boldy. Ökınışke qarai, bızdıŋ atamyz bır aidan keiın qaitys boldy. Bız video men fotosuretterın körıp, jyladyq. Eşqaşan ūmytpaimyz süiıktı atamyzdy.
Nūrislam Ädılbek,
№64 mektep-liseidıŋ
6-synyp oquşysy,
Qaiyr Aiaulym,
№ 70 mektep-liseidıŋ
4-synyp oquşysy
