Qalalyq Tötenşe jaǧdailar departamentı men Esıl audandyq ışkı ıster bölımı tūrmysy tömen otbasylar üşın ört qauıpsızdıgı jönınde reid ötkızdı.
Ūiymdastyruşylar Prigorodnyi kentındegı on üidı aralap, esık aşqan tūrǧyndarǧa qauıpsızdık jadnamasyn taratty. Balalarmen tıldesıp, olarǧa örttı aldyn alu şaralaryn tüsındırdı. «Qalada kün saiyn 6-7 ört oqiǧasy oryn alady. Köpşılıgınıŋ şyǧu sebebı – toq ötkızgış symdardyŋ aqauy. Dese de, ötken jyly ışımdıkke salynǧan ata-ananyŋ kesırınen tūtanǧan otta janyp ketken ekı balany ūmytu mümkın emes. Sondai jaǧdailardy boldyrmau maqsatynda bız ai saiyn profilaktikalyq reid ötkızıp, tüsındıru jūmystaryn jürgızemız» deidı memlekettık ört baqylau bölımınıŋ injinerı Ermek İsmailov. Onyŋ aituynşa, eresek adamdardyŋ köbı öz ömırıne nemqūraily qarap qana qoimai, balalaryn da tılsız jaudan saqtandyrudy ūmyt qaldyryp jatady. Üide jalǧyz qalǧan balalarmen äŋgımelesu barysynda olardyŋ qauıpsızdık erejelerın bıle bermeitındıgıne köz jetkızdık. Ülkender joqta olar ütıktı de, gazdy da öz betınşe qosady eken. IIB qyzmetkerlerı büldırşınderge ört qaupın tudyratyn zattarǧa jolamaudy eskerttı.
Sonymen qatar, qūtqaruşylar būrys paidalanylǧanda ülken qauıp töndıretın gaz ballondardy qai jerde ornalastyrǧan abzal ekendıgın aityp, jaramdylyǧyn tekseru ädısın de körsettı.
Mädina JAQYP
