Qala köşelerın keşe jas tülekterdıŋ quanyşty külkısı men şattyq ünı kernedı. Soŋǧy qoŋyrau aiaqtalǧan soŋ, besın aua mektep bıtıruşılerge arnalǧan merekelık ıs-şaralar bastalǧan. Jas tülekter arnaiy baǧdarlamalar ūiymdastyrylǧan «Studenttık», «Ǧaşyqtar» saiabaqtaryna jäne Qarjy ministrlıgı aldyndaǧy alaŋǧa qarai aǧyldy. Onda mektep oquşylarynyŋ konsertın tamaşalap, qyzyqty oiyn- sauyqqa qanyqty.
Üzdıkterge ükılep ümıt artu – qalyptasqan dästür. Būl oraida, mektep bıtıruşıler arasyndaǧy «Altyn belgı» iegerlerı men olimpiada, ǧylymi baiqaular jeŋımpazdary üşın arnaiy bal ūiymdastyryldy. «Astana daryny» öŋırlık ǧylymi-praktikalyq ortalyǧy ūiymdastyrǧan «Triumf» baly TMD-daǧy teŋdesı joq ǧimarat – Oquşylar saraiynda öttı. Şaraǧa Parlament jäne mäslihat deputattary, Bılım jäne ǧylym ministrlıgı ökılderı, üzdık oquşylardyŋ ūstazdary da şaqyryldy.
Astana qalasynyŋ talantty oquşylaryn anyqtau jäne qoldau maqsatynda ūiymdastyrylyp tūratyn mūndai baldyŋ özındık dästürı bar. Soǧan sai, er balalar smoking nemese qara tüstı klassikalyq kostium, aq jeide kiıp, qara tüstı elbelek taǧyp kelse, qyz balalar aq tüstı bal köilegı men aq tufli kidı. Ülken ömır aldynda jüzderı balbūl janǧan jastarǧa Astana qalasy Bılım basqarmasynyŋ bastyǧy Äsima Bimendina söz söilep, ızgı tılegın jetkızdı.
Basqarma bastyǧynyŋ aituynşa, elordamyzda mektep qabyrǧasynda jürıp-aq biık belestı baǧyndyrǧan jastar az emes. Aitalyq, biylǧy jyly mektep bıtıruşıler ışınen respublikalyq olimpiadalar men ǧylymi saiystar qorytyndysy boiynşa, elordalyq komanda 95 jüldelı oryndy ielense, būl jalpykomandalyq esepte bırınşı oryn eken. Astanalyq mektep oquşylarynyŋ qorjynynda olimpiadalardan 7 altyn jülde men respublikalyq ǧylymi saiystardan taǧy bır altyn bar. Körkemöner salasy boiynşa da, halyqaralyq deŋgeide baǧy janyp, astanalyqtardyŋ atyn ozdyrǧandar az emes. Atap aitqanda, Braziliia, Koreia, Qytai, Resei, Türkiia, Rumyniia, Ündıstan, Gruziia, Kipr jäne basqa da elderden astanalyq oquşylar 92 jülde alyp kelıptı.
Hoş. 2012 jyldyŋ soŋǧy qoŋyrauyn qalanyŋ bılım beru mekemelerı osylai ülken jetıstıktermen atqaryp saldy. Ūstazdar qauymy men şäkırtterdıŋ osy jetıstıkterımen Parlament Mäjılısınıŋ deputaty Vladimir Redkokaşin de qūttyqtady.
«Triumf» baly kezınde erekşe közge tüsıp jürgen segız altyn jüldegerge qala äkımı atynan syilyqtar tabys etıldı. Al, olarǧa tälım bergen ūstazdar Bılım jäne ǧylym ministrlıgınıŋ marapattaryna ie boldy.
Näzira SAILAUQYZY
P.S.
Orys tılındegı «Mektep valsı» änıne bilegen tülekter «Ūstazym» änın tyŋdap, būrynǧylarşa jappai köz jasyna erık bergen joq. Bıraq, sonda da är-är jerden ūstazyn qapsyra qūşaqtap, qimastyqpen jylaǧan qyz- jıgıtterdı közımız şaldy.
Tülekterdıŋ alabūrtqan sezımı sekıldı Astananyŋ da aspany tūnjyrap tūrǧan bolatyn…
