Жақында өткен «ЭКСПО-2017» халықаралық мамандандырылған көрмесіне дайындық жөніндегі арнайы кеңесте Елбасының қатаң ескертуінен кейін тиісті органдар Астана қаласындағы «резеңке пәтерлерді» анықтап, нақты шаралар қолдана бастады. Осы мәселені біздің газетіміз үстіміздегі жылғы 25 сәуір күнгі нөмірінде қозғаған болатын.
Жүйелі жүргізілген рейдтердің нәтижесінде заңсыздыққа жол берген 200-ден аса пәтер иесі әкімшілік жауапкершілікке тартылып, тіркеусіз жүрген 100000-нан аса азамат есепке алынған еді.
Бұл жұмыс одан әрі қарқынды жалғасуда. Өткен аптада Астана қаласының прокуратурасы қала әкімдігімен және құқық қорғау органы қызметкерлерімен бірлесе отырып, тұрғын үйлер мен уақытша баспаналарды аралаған еді. Нәтижесінде 30-дан 2500-ге дейін адам заңсыз тіркелген ондаған пәтер мен жекеменшік үй анықталды. Алайда осыншама адам тіркелгенімен, ол үйлерде бірде-бірі тұрмайтын болып шықты.
«Бүгінгі таңда жергілікті полиция қызметі осындай құқық бұзушылыққа жол берген 88 пәтер иесін әкімшілік жауапкершілікке тартты. Ал заңсыз тіркелген 4000-нан аса адам тіркеуден шығарылды. Бір айта кетерлігі, олардың арасында шетелдік азаматтар да бар. Алдағы уақытта мұндай тәртіп бұзған азаматтарға мемлекеттік қызмет көрсету түрі шектеледі. Атап айтқанда, олар енді мемлекеттік тұрғын үй қорынан пәтер ала алмайды.
Сондай-ақ, «резеңке пәтерлерде» тіркелген адам санына байланысты коммуналдық қызмет (жарық, газ, сумен жабдықтау, қоқыс шығару) көрсету бағалары қайта есептелетін болады» деді қалалық прокуратураның баспасөз қызметі.
Қазір қалада криминогендік жағдайды сауықтыру мақсатында жүріп жатқан «Құқықтық тәртіп» шұғыл-алдын алу іс-шарасының алғашқы он күнінде түрлі бап бойынша 10000-нан аса адам әкімшілік жауапкершілікке тартылса, белгілі тұрағы жоқ 336 адам уақытша бейімдеу орталығына орналастырылған.
Көші-қон ережесін бұзған 1320 адамға айыппұл салынса, 73 шетелдік елден шығарылды.
Таңатар ТӨЛЕУҒАЛИЕВ
