اۋقىمدى ەكولوگيالىق اكتسياسى اياسىندا استانادا ءال-فارابي ەسكەرتكىشىنىڭ اۋماعى اباتتاندىرىلدى, دەپ حابارلايدى astana-akshamy.kz
مەملەكەت باسشىسىنىڭ تاپسىرماسى اياسىندا رەسپۋبليكا بويىنشا «تازا قازاقستان: استانا – تازالىق پەن ءتارتىپتىڭ ۇلگىسى» اۋقىمدى ەكولوگيالىق اكتسياسى ءوتىپ جاتىر. بۇگىن اتالعان ءىس-شارا بارىسىندا ءال-فارابي اتىنداعى وقۋشىلار سارايىنىڭ ماڭايى مەن عۇلاما عالىمنىڭ ەسكەرتكىشىنىڭ اينالاسى تازارتىلىپ, اباتتاندىرىلدى, دەپ حابارلايدى ەلوردا اكىمدىگىنىڭ رەسمي سايتى.
استانادا 117 ەسكەرتكىش بار, ونىڭ 46-سى مەملەكەتتىك قورعاۋعا الىنعان. ولاردىڭ ۇشەۋى رەسپۋبليكالىق, قالعان 44-ءى قالا دەڭگەيىندە, ياعني جەرگىلىكتى ماڭىزى بار ەسكەرتكىشتەر بولىپ سانالادى. اكتسيا باستالعالى كۇنىنە 7-8 ەسكەرتكىشتىڭ ماڭايىن قوقىستان تازارتىپ, قالىپقا كەلتىرۋ جوسپارلانعان.
بۇگىنگى ەكولوگيالىق اكتسياعا ءال-فارابي اتىنداعى وقۋشىلار سارايى مەن جاستار سارايىنىڭ 80-گە جۋىق قىزمەتكەرى قاتىستى. ولار ەسكەرتكىش ماڭايى مەن عيماراتتىڭ اينالاسىن سىپىرىپ, قوقىستاردى جينادى.
اكتسياعا قاتىسقان ايگەرىم جيەنباەۆا مۇنداي شارالاردان ەشقاشان شەت قالمايتىنىن ايتتى.
«سەنبىلىك بولسىن, باسقا دا بۇقارالىق شارالار بولسىن ءاردايىم بەلسەندى قاتىسىپ جۇرەمىن. بۇگىنگى اكتسياعا كەرەمەت كوڭىل-كۇيمەن كەلدىك. قالا تۇرعىنى رەتىندە تۇرىپ جاتقان جەرىمىزدىڭ تازالىعىنا, رەتتىلىگىنە ۇلەس قوسىپ جاتىرمىن دەپ ەسەپتەيمىن. الداعى تازالىق شارالارىنا دا مىندەتتى تۇردە قاتىسامىن», – دەدى ول.
استانا قالاسى اكىمدىگىنىڭ «بىرلەسكەن مۇراجايلار ديرەكتسياسى» مكقك ديرەكتورىنىڭ ورىنباسارى سامات تەرگەمباەۆتىڭ ايتۋىنشا, اكتسياعا قاتىسۋشىلار بەلگىلەنگەن ورىنداردى قوقىستان تازارتادى. ال ەسكەرتكىشتەردى جۋمەن تەك ارنايى ماماندار اينالىسادى. ويتكەنى ەسكەرتكىشتەردى كۇتىپ ۇستاۋدىڭ, جۋدىڭ ءتارتىبى بار, ءارى حيميالىق زاتتاردى قولدانۋدىڭ ەرەكشەلىكتەرى ەسكەرىلۋى ءتيىس.
«ەسكەرتكىشتەر ەرەكشە كۇتىمدى قاجەت ەتەدى, ولاردى سۋمەن, باسقا دا حيميالىق رەاكتيۆتى زاتتارمەن جۋعا بولمايدى. ەسكەرتكىش جاسالعان ماتەريالدى قارايمىز. مىسالى, ءال-فارابي ءمۇسىنى مىس ارالاس قولادان جاسالعان. سوندىقتان ونى تەك بالاۋىزبەن تازارتامىز. شاڭ-توزاڭ قونباۋى ءۇشىن ماي دا جاقپايدى. ادەتتە كوكتەم مەن كۇزدە ماماندار ەسكەرتكىشكە بالاۋىز جاعىپ, ءتيىستى شارالاردى اتقارادى. وسىنداي اكتسيالاردى پايدالانىپ, قاتىسۋشىلارعا ەسكەرتكىشتىڭ تاريحى جانە ونى ماماندار قالاي كۇتىپ ۇستايتىنى تۋرالى دا ايتىلادى. ءارى بۇل قاسيەتتى ورىن ەكەنىن, وعان قۇرمەتپەن قاراۋ قاجەتتىگىن تۇسىندىرەمىز. تازالىق اكتسياسىنا كەلگەن ءار ادام ۇيىنە ورالعاندا ەلوردامىزدا وسىنداي كورىكتى ورىندار بار ەكەنىن, ونىڭ ءمانى مەن ماڭىزى تۋرالى ايتىپ جۇرسە دەيمىن», – دەدى سامات تەرگەمباەۆ.
ەستەرىڭىزگە سالساق, بۇعان دەيىن «تازا قازاقستان: استانا – تازالىق پەن ءتارتىپتىڭ ۇلگىسى» اكتسياسىنا دەپۋتاتتار, شاعىن جانە ورتا بيزنەس سۋبەكتىلەرى, ەكىنشى دەڭگەيلى بانك قىزمەتكەرلەرى , وقۋ ورىندارى ستۋدەنتتەرى, ەرىكتىلەر مەن قالا تازالىعىنا بەي-جاي قارامايتىن ازاماتتار قاتىسقان بولاتىن.
استانادا اۋقىمدى ەكولوگيالىق ناۋقان جالعاسۋدا. ول بەس اپتاعا سوزىلادى, ولاردىڭ ارقايسىسى بەلگىلى ءبىر تاقىرىپقا ارنالعان. بۇل اپتا «كيەلى مەكەن» دەپ اتالادى.
«جاسىل ايماق» دەپ اتالاتىن ءۇشىنشى اپتا اعاش وتىرعىزۋ مەن كوشەتتەردى اكتەۋگە ارنالادى.
4 مامىرعا دەيىنگى ۋاقىت – «ونەگەلى ۇرپاق» دەپ اتالادى. بۇل اپتالىق ارداگەرلەر تۇراتىن اۋلالار مەن قارتتار ءۇيىنىڭ اۋماعىن تازالاۋعا جانە اباتتاندىرۋعا ارنالعان.
«ءمولدىر بۇلاق» دەپ اتالاتىن سوڭعى بەسىنشى اپتادا وزەن-كولدەردىڭ ماڭايى قوقىستان تازارتىلادى.
