باس قالا ەلدىڭ باسقا ايماقتارىنا نەسىمەن ۇلگى بولا الادى؟ بۇل سۇراقتىڭ جاۋابىن تارقاتار بولساق, باسقاسىن ايتپاعاندا, ەلوردا ەلدىڭ وزگە قالالارىنا يننوۆاتسيالىق دامۋىمەن جول كورسەتە الادى.
بۇگىندە كىندىك قالانى عالامدىق باسەكەگە قابىلەتتى ەتىپ دامىتۋدى نەگىزگە العان «Smart Astana» كونتسەپتسياسى قابىلداندى. ياعني, بۇل تۇجىرىم استانانىڭ «اقىلىن» كىرگىزۋدى دىتتەپ وتىر.
يننوۆاتسيا – زامانا تۋدىرعان قاجەتتىلىك. وسى كۇنى الەمدى تەك جاڭالىقپەن عانا تاڭ قالدىرىپ, باسەكەلى كەڭىستىككە تۇمسىق تىعا الامىز. ەل ورتالىعى – استانادا بۇل ماسەلەگە ءجىتى ءمان بەرەتىنى سوندىقتان. ۇدەمەلى يندۋستريالدى-يننوۆاتسيالىق دامۋدى مىقتاپ قولعا العان ەلىمىزدە وسى كۇنى يننوۆاتسيانى مەڭگەرۋ ءارى ونى تاجىريبەگە ەنگىزۋ ماڭىزدى بولىپ وتىر. بۇل رەتتە «استانا Innovations» اق جۇكتەلىپ وتىرعان مىندەت تە كوپ.
وتكەن جىلى «استانا-ينۆەست» فورۋمىنان كەيىن قۇرىلعان كاسىپورىننىڭ ماقساتى – جوعارعى تەحنولوگيالىق دامۋ جوبالارىن ەنگىزىپ, قالانىڭ باسەكەگە قابىلەتتىلىگىن ارتتىرۋعا جاعداي جاساۋ. كاسىپورىننىڭ مەجەلەگەن ماقساتقا جەتۋدەگى العاشقى قادامىنىڭ قارقىنى دا وسال ەمەس. ناقتى ايتساق, 2011 جىلى «Smart Astana» تۇجىرىمداماسىن جۇزەگە اسىرۋدىڭ العاشقى ادىمدارى باستاۋ الدى. ول قاۋىپسىزدىك پەن قىزمەت كورسەتۋدى دامىتۋدىڭ جاڭا ساتىسى دەسەك بولادى. ەلوردا تۇرعىندارىنىڭ ءومىر ءسۇرۋ جاعدايىن جاقسارتۋ, مەملەكەتتىك قىزمەت تۇرلەرىن جاڭارتۋ, قالالىق جەلىلەردىڭ ينتەگراتسياسىن جاقسارتۋدى كوزدەپ وتىر.
«اقىلدى قالانىڭ» العىشارتتارى بەس جوبادان تۇرادى. بۇل بەس يننوۆاتسيالىق جوبالار دەنساۋلىق ساقتاۋ, ءبىلىم بەرۋ جانە اقپاراتتىق تەحنولوگيالار سالاسىنا تىكەلەي قاتىستى. ارقايسىسىن ايتار بولساق, العاش بولىپ ىسكە قوسىلعان «Open Wi-Fi» جوباسى – Wi-Fi نۇكتەلەرىن ورناتۋ ارقىلى حالىقتى تەگىن ينتەرنەت جەلىسىمەن قامتۋعا باعىتتالعان. جوبانىڭ العاشقى كەزەڭى وتكەن جىلى سول جاعالاۋدا باستاۋ الدى. ەكىنشى كەزەڭى بيىل ەلوردانىڭ تاريحي ەسكى بولىگىندەگى قوعامدىق ورىنداردى قامتىدى. «بولاشاقتىڭ مەكتەبى – بۇگىن» جوباسى استانا مەكتەپتەرىنە كەشەندى قاۋىپسىزدىك جۇيەسىن ەنگىزۋگە ارنالعان. وقۋشىلارعا بەرىلەتىن كوپفۋنكتسيالى ەلەكتروندى كۋالىك مەكتەپكە كەلگەن جانە مەكتەپتەن قايتقان ۋاقىتتا اتا-انالارىنا sms ارقىلى حابار بەرىپ وتىرادى. ياعني, سول ەلەكتروندى كۋالىكتىڭ ارقاسىندا ۇيدەگى اتا-انا تۇزدەگى بالاسىن باقىلاپ وتىرادى. جوبا جەتەكشىلەرىنىڭ ايتۋىنشا, بولاشاقتا ول كۋالىك مەكتەپتەگى تاماقتانۋدى نەمەسە قوعامدىق كولىكتە ءجۇرۋ اقىسىن تولەۋ قىزمەتتەرىن اتقارا الادى. بۇگىندە اتالمىش جوبانىڭ قاناتقاقتى نۇسقاسى №54 مەكتەپ-ليتسەيىنە تاجىريبە رەتىندە ەنگىزىلدى. جوبانىڭ ەكىنشى كەزەڭى بيىل قالاداعى 10 مەكتەپتە ەنگىزىلەتىن بولادى.
«اقىلدى قالانىڭ» تاعى ءبىر اقىلدى قادامى – «ە-جەدەل-جاردەم» دەپ اتالادى. ول جەدەل مەديتسينالىق جاردەم قىزمەتىنىڭ ساپاسىن ارتتىرۋدى دىتتەپ وتىر. سوعان سايكەس, جەدەل جاردەم بريگادالارى ءبىر باسىنا بىرنەشە قىزمەتتەردى قامتىعان پلانشەتتى قۇرالدارمەن جابدىقتالعان. 2012 جىلدىڭ ءبىرىنشى توقسانىنىڭ ناتيجەسى كورسەتكەندەي, جەدەل-جاردەم قىزمەتىمەن قامتىلعانداردىڭ سانى 32 پايىزعا ارتقانىن كورسەتتى.
ءتورتىنشى جوبا – «3D تەحنولوگيالار ورتالىعى» جوباسى. زاماناۋي 3D تەحنولوگيالاردى وقىتۋ, زەرتتەۋلەر مەن ساراپتاما جاساۋ ورتالىعىنىڭ قانداي ماقساتتا قۇرىلعانى اتىنان-اق ءبىلىنىپ تۇر. تاعى ءبىر تىڭ جوبا – «قازاقستان-چەحيالىق تەحنولوگيالىق ورتالىعى» دەپ اتالادى. ەكى ەل بىرىگىپ قولعا العان جوبانىڭ ماقساتى – استانا كاسىپورىندارىنىڭ جۇمىسىن جاڭعىرتۋ جانە ينجەنەرلىك-تەحنيكالىق مامانداردى وقىتۋ.
بۇدان بولەك «استانا-يننوۆەيشەنس» اق-دا تەحنولوگيالىق بيزنەس-ينكۋباتور, ينۆەستورلارعا قولداۋ كورسەتۋ ورتالىقتارى جۇمىس ىستەپ تۇر. قاي جاعىنان الساق تا, كاسىپورىن يننوۆاتسيالىق دامۋعا سەرپىن بەرەتىن تىڭ باستامالارعا تولى.
اينۇر شوشاەۆا
