نۇر-سۇلتان قالاسىندا جىل سايىن ءوتىپ كەلە جاتقان مارافوننىڭ تاريحىنا بيىل رەكورد ەنگىزىلدى. ءبىرىنشىسى, مارافوننىڭ گەوگرافياسى كەڭەيدى, اتاپ ايتقاندا, بيىلعى جارىسقا 27 ەلدىڭ – ازيا, ەۋروپا, امەريكا جانە افريكا قۇرلىقتارىنان سپورتشىلار قاتىستى. ءبىرىنشى رەت 5 مىڭنان اسا ادام جارىس جولىنا شىقتى.
مارافونعا قاتىسۋشىلاردىڭ ءبىرى, نۇر-سۇلتان قالاسىنىڭ اكىمى التاي كولگىنوۆ سپورت مەرەكەسىنە جينالعان جۇرتشىلىققا ساتتىلىك تىلەدى.
«بارلىق قاتىسۋشىلاردى «Astana Marathon 2019» اشىلۋىمەن قۇتتىقتايمىن. مەملەكەت باسشىسى ەلىمىزدە بۇقارالىق سپورتتى دامىتۋعا شاقىرادى. اۋا رايىنىڭ قولايسىزدىعىنا جانە دەمالىس كۇنىنە قاراماستان, سىزدەر بەرىلگەن قاشىقتىقتاردى جۇگىرىپ وتۋگە نيەت بىلدىردىڭىزدەر. «Astana Marathon 2019» ەلباسى جاريالاعان جاستار جىلىنىڭ اياسىندا ءوتىپ جاتىر. ءبىز بارلىق سپورت تۇرلەرىن دامىتۋعا بار كۇشىمىزدى سالامىز. بارشاڭىزعا ساتتىلىك تىلەيمىن» دەدى قالا باسشىسى.
جارىستىڭ اشىلۋ سالتاناتىندا سونىمەن قاتار وليمپيادا ويىندارىنىڭ چەمپيونى ولگا رىپاكوۆا دا مارافونعا قاتىسۋشىلارعا ساتتىلىك تىلەدى. مارافونعا سەرىك ساپيەۆ, مەرەي اقشالوۆ, مەيىرىم نۇرسۇلتانوۆ جانە باسقا دا اتاقتى سپورتشىلار قاتىستى.
مارافونعا جۇگىرۋشىلەر 10 جانە كلاسسيكالىق 42 شاقىرىمدىق قاشىقتىقتارى باعىندىردى. ءبىر ايتارلىعى, 10 شاقىرىمعا جۇگىرۋشىلەر قاتارى وتە كوپ بولدى. ويتكەنى اۋەسقوي سپورتشىلار, سونداي-اق سالاۋاتتى ءومىر سالتىن ۇستاناتىن ازاماتتار, نەگىزىنەن, وسى قىسقا قاشىقتىقتى تاڭداعان ەكەن.
ال ەندى مارافوننىڭ قورىتىندىسىن ايتار بولساق, كلاسسيكالىق مارافوننىڭ ايەلدەر اراسىنداعى جارىستا قىرعىزستان سپورتشىسى يۋليا اندرەەۆا مارە سىزىعىن ءبىرىنشى بولىپ كەستى. جەڭىمپاز جارىس جولىن 2 ساعات 28 مينۋت 42 سەكۋندتا باعىندىرىپ, 1 ميلليون تەڭگە سىيلىق الدى. ەكىنشى ورىندى وتانداسىمىز گۇلجانات جاناتبەك يەلەنسە, ەكاتەرينا سۋندۋكوۆا ۇزدىك ۇشتىكتى تۇيىندەدى. ال ەرلەر اراسىنداعى جارىستا وزبەكستان سپورتشىسى زىكىروللا ماماعۇلوۆ جەڭىمپاز اتاندى. تاشكەنت تۇرعىنى 2 ساعات 26 مينۋت 10 سەكۋند ىشىندە 42 كيلومەتر 200 مەتردى جۇگىرىپ ءوتتى. كۇمىس جۇلدەنى ۆلاديسلاۆ مامەدوۆ, ال قولا جۇلدەنى ولەگ بايتۋكانوۆ ولجالادى.
سونىمەن «Astana Marathon» ءداستۇرلى جارىسى مارەسىنە جەتتى. ەڭ باستىسى, جارىسقا قاتىسۋشىلاردىڭ ءبارى كوتەرىڭكى كوڭىل كۇيگە بولەندى. دەمەك, استانالىق مارافون حالىقارالىق جارىس رەتىندە دە, سپورت مەرەكەسى رەتىندە دە ءوزىنىڭ ومىرشەڭدىگىن تاعى ءبىر ايقىنداپ كورسەتتى دەي الامىز.
