قازاقستان پرەزيدەنتى قاسىم-جومارت توقاەۆ 26 ماۋسىم كۇنى «قازاقستان رەسپۋبليكاسى ازاماتتارىنىڭ بورىش جۇكتەمەسىن ازايتۋ شارالارى تۋرالى» جارلىققا قول قويعان بولاتىن. وسىعان سايكەس كەپىلسىز تۇتىنۋشىلىق قارىزى بار ازاماتتاردىڭ 300 مىڭ تەڭگەگە دەيىن نەگىزگى بەرەشەگى مەن وعان ەسەپتەلگەن وسىماقىنى تولەۋدى مەملەكەت ءوز مىندەتىنە الدى. بۇل تۋرالى ورتالىق كوممۋنيكاتسيالار قىزمەتىندە وتكەن ءباسپاسوز ءماسليحاتىندا ەڭبەك جانە حالىقتى الەۋمەتتىك قورعاۋ ۆيتسە-ءمينيسترى سۆەتلانا جاقىپوۆا ءتۇسىندىرىپ بەردى.
بۇل قارىزعا نەگىزگى بورىش, سىياقى, ايىپپۇلدار دا كىرەدى. قارىزى جارلىقتا كورسەتىلگەن مولشەردەن اساتىن بورىشكەرلەردىڭ تەك 300 مىڭ تەڭگە كولەمىندەگى ءبىر بولىگى عانا وتەلەدى. بۇل جاعدايدا ولاردىڭ قارىزى 3 ميلليون تەڭگەدەن اسپاۋى كەرەك.
– پرەزيدەنت جارلىعىنا سايكەس بەس ساناتتاعى وتباسىلاردىڭ تۇتىنۋشىلىق قارىزدارى وتەلەدى. بۇل ساناتقا كوپبالالى وتباسىلار, مۇگەدەك بالانى تاربيەلەپ وتىرعان وتباسىلار, اسىراۋشىسىنان ايىرىلعان وتباسىلار, 18 جاستان اسقان بالا كەزىنەن مۇگەدەكتەر مەن اتاۋلى الەۋمەتتىك كومەك الۋشىلار, سونداي-اق اتا-انالارىنان ايىرىلعان 29 جاسقا دەيىنگى ازاماتتار جاتادى, – دەيدى سۆەتلانا جاقىپوۆا.
دەگەنمەن اتالعان بەس ساناتقا كىرەتىن, بىراق نەسيەسى وتەلەتىندەر تىزىمىندە جوق ازاماتتار دا بار. سۆەتلانا جاقىپوۆانىڭ ايتۋىنشا, مۇنداي وتباسىلار تۋرالى تولىق مالىمەتتەر اقپاراتتار بازاسىنا ەنگىزىلمەگەندىكتەن بولۋى مۇمكىن. سوندىقتان ونداي وتباسىلار قۇزىرلى ورگاندارعا تيىسىنشە تىركەلۋى ءتيىس.
سونداي-اق قارىزدى قايتارۋ شارتى كوللەكتورلىق كومپانيالارعا ءوتىپ كەتكەن ازاماتتاردىڭ بەرەشەگى تەك كەي جاعدايلاردا عانا وتەلەدى.
نەسيەسى كوللەكتورلارعا ءوتىپ كەتكەن ازاماتتاردىڭ ماسەلەسى ەكى سانات بويىنشا قارالادى. بىرىنشىدەن, نەسيە بانك بالانسىنان شىعارىلماسا, كوللەكتور قارىز الۋشى مەن بانك اراسىندا بايلانىس ورناتىپ, ونىڭ قايتارىلۋىنا ىقپال ەتەدى. ال نەسيە بانك بالانسىنان شىعارىلىپ, كوللەكتورعا ساتىلىپ كەتسە, ول وتەلمەيدى,- دەدى ۇلتتىق بانك توراعاسىنىڭ ورىنباسارى ولەگ سمولياكوۆ.
