9 قىركۇيەك – قازاقتىڭ قابىرعالى جازۋشىسى, مەملەكەتتىك سىيلىقتىڭ لاۋرەاتى دۇكەنباي دوسجاننىڭ تۋعان كۇنى. وسىعان وراي, ۇلتتىق اكادەميالىق كىتاپحانادا قالامگەردى ەسكە الۋ كەشى ءوتتى. وعان سۋرەتكەرمەن ومىردە جاقىن سىيلاسقان دوستارى, ارىپتەستەرى, وقىرماندارى جينالدى.
زاڭعار جازۋشى ءابىش كەكىلباەۆ قالامداسى تۋرالى جازعان ماقالاسىندا «جۇرەگىنە ءسوز قاسيەتى قونعان, تابيعاتىنا تارتا تۋعان, «بولسىن» دەگەن ىلگەرى تىلەۋمەن جۇرەتىن, بالاداي اڭقاۋ, اناداي اڭعال, ەرەكشە دارىن يەسى سوزدەن سويلەم, سويلەمنەن سۋرەت كوركەمدەگەن جاقسىلىقتىڭ ديقانشىسى بولىپ ەلەستەيدى كوزىمە» دەپ ايتىپتى.
دۇكەنباي دوسجان – مىڭ تاعدىردىڭ جازۋشىسى. ونىڭ شىعارمالارى ۇلتتىق بوياۋ مەن داستۇرگە باي, ادام جانىنىڭ قاتپارلارىنا تەرەڭ ۇڭىلە بىلۋىمەن ەرەكشەلەنەدى. قالامگەر كوزى تىرىسىندە 11 رومان, 23 حيكايات, 100 اڭگىمە جازىپ, وقىرمانى كوپ جازۋشى اتاندى.
كەش بارىسىندا قالامگەردىڭ جاقىن دوسى, كۋرستاسى سۇلتان ورازالين ءسوز زەرگەرىنىڭ ادامي بولمىسى مەن شىعارماشىلىعى تۋرالى وي ءوربىتتى.
– دۇكەنباي – قازاق ادەبيەتىندە ءوزىنىڭ ورنىن ويىپ تۇرىپ العان ساڭلاقتاردىڭ ءبىرى. ونىڭ ءومىرى دە كۇردەلى جاعدايدا ءوتتى. ءتۇرلى قيىنشىلىقتى دا, قىزىقتى دا باسىنان كەشتى. دۇكەش ومىردەن وتكەلى دە ءبىراز جىل ءوتتى. بىراق ونىڭ كىتاپتارىنا دەگەن قىزىعۋشىلىق تولاستاعان ەمەس. مەن وعان ارنالعان بارلىق جيىندارىنا قاتىسىپ ءجۇرمىن. ونىڭ وتكەن عاسىردىڭ الپىسىنشى جىلدارى جازعان اڭگىمەلەرى مەن پوۆەستەرى ادەبيەتتە قۇبىلىس رەتىندە قابىلداندى. تاريحي تاقىرىپقا دا ءبىرىنشى بولىپ قالام تەربەدى. جازۋشىنىڭ جارىققا شىققان ءار تۋىندىسىنا ءتۇرلى كوزقاراستار بولدى. ول زاڭدى دا. ءوزىم ونىڭ العاش جازعان اڭگىمەلەرىن وتە جوعارى باعالايمىن, – دەدى ول.
سونىمەن بىرگە مارات
ءماجيتوۆ, ورىنباي جانايداروۆ, قۋانىش جيەنباي, جولتاي ءالماشۇلى سەكىلدى ازاماتتار دا كورنەكتى قالامگەر جايىنداعى ءوز ەستەلىكتەرىمەن ءبولىستى.
