كۇننەن-كۇنگە الىپ بايتەرەكتەي بوي تۇزەپ, بايشەشەك گۇلدەي قۇلپىرىپ كەلە جاتقان ەلوردانىڭ كەلبەتى الىستان كوز تارتىپ تۇرادى. وسىنداي اسەم قالامەن بىرگە ءوسىپ كەلە جاتقان استانانىڭ قۇرداستارى دا جەتەرلىك. سولاردىڭ ءبىرى – باس شاھارداعى دارىندى قىز بالالارعا ارنالعان قازاق-تۇرىك ليتسەي ينتەرناتىنىڭ تۇلەگى, بيىلعى ۇلتتىق بىرىڭعاي تەستىلەۋدە 116 بالل جيناپ, «التىن بەلگى» يەگەرى اتانعان اقنۇر تۇرداليەۆا.
اقنۇر قازاقتىڭ باي تاريحى جاتقان سىر بويىندا دۇنيەگە كەلىپتى. ول ءۇش جاسقا تولعاندا اتا-اناسى جۇمىس بابىمەن ەلورداعا قونىس اۋدارادى. سودان بەرى باس قالانىڭ تۇرعىنى سانالادى. العاش دارىندى بالالارعا ارنالعان №9 «زەردە» مەكتەبىنىڭ تابالدىرعىن اتتايدى. وندا ارداقتى ۇستاز بيبىگۇل ابىلماجىنقىزىنان ءتالىم الادى. مۇعالىمى تالاپتى جاس جەتكىنشەكتىڭ بويىنا ءبىلىم ءنارىن سىڭىرەدى. دانالىق تاربيەسىن ۇيرەتەدى. ءسويتىپ, سۇيكىمدى قىز بالانىڭ ءبىلىم جولىنداعى العاشقى قادامى قۇتتى باستالادى. ءبىرىنشى سىنىپتى ۇزدىك ءتامامدايدى. «مەن ءۇشىن العاشقى ۇستازىمنىڭ ورنى بولەك. ول كىسىدەن كوپ دۇنيە ۇيرەندىم. سودان بەرى بارلىق ساباقتى تەك قانا ۇزدىك باعامەن وقىدىم» دەيدى اقنۇر اياۋلى ۇستازى تۋرالى قۋانا ءسوز قوزعاپ.
ونىڭ اتا-اناسى دا – ەلوردانىڭ دامۋىنا ءوز ۇلەسىپ قوسىپ كەلە جاتقان قالانىڭ قاراپايىم تۇرعىندارى. اكەسى – نۇرتالاپ ينجەنەر-ەكونوميست بولىپ ەڭبەك ەتسە, اناسى – ورىنكۇل «انا مەن بالا» ورتالىعىندا دارىگەر. تالاي بالانىڭ ناۋقاسىنا شيپا بولعان اق حالاتتى ابزال جان. وسىنداي بەرەكەلى, باقىتتى وتباسىندا وسكەن اقنۇردىڭ بولمىسىنان مادەنيەتتىلىكتىڭ, زيالىلىقتىڭ لەبى ەسەدى. ۇلتتىق تاربيەنىڭ قۇنارىندا وسكەنى بايقالادى. قازاق قىزدارىنا ءتان اسىل قاسيەتتىڭ بارلىعىن بويىنا جيناقتاعان. بالا كەزىنەن ماتەماتيكانى جاقسى كورىپتى. مەكتەپتە جۇرگەندە وسى پاننەن تالاي ءبىلىم بايقاۋلارىنا قاتىسىپ, ۇزدىكتەر قاتارىنان كورىنگەن.
ول ەلورداداعى دارىندى قىز بالالارعا ارنالعان قازاق-تۇرىك ليتسەي ينتەرناتىنا 6-شى سىنىپتا وقىپ جۇرگەندە قابىلدانادى. ارينە, اتالعان وقۋ ورداسىنا كەز كەلگەن وقۋشى قابىلدانا بەرمەيدى. سىناقتان سۇرىنبەي وتكەن بالالار عانا ىرىكتەلەدى. سولاردىڭ قاتارىندا اقنۇردىڭ دا جۇلدىزى جانادى.
– ءبىزدىڭ ليتسەيدىڭ وقۋ ءۇردىسى ەرەكشە. كەيبىر پاندەر اعىلشىن تىلىندە وتەدى. بالالارعا تۇسىنىكتى بولۋ ءۇشىن قازاقشا-اعىلشىنشا دا جۇرگىزىلەدى. ونداي كەزدە ارنايى تەرمينولوگيالىق كىتاپتاردى پايدالاندىق. وسى وقۋ ورداسىندا ءجۇرىپ اعىلشىن ءتىلىن جەتىك مەڭگەردىم. ساباق بارىسىندا ۋاقىت تالابىنا ساي جاراقتالعان جاڭا قۇرىلعىلاردى قولداندىق. ۇستازدار وقۋشىلارعا ساپالى ءبىلىم بەرۋ ءۇشىن بار مۇمكىندىكتەرىن اياعان جوق. اسىرەسە, ليتسەي ديرەكتورى ەرلان تالعاتبەكۇلىنا العىسىمدى بىلدىرگىم كەلەدى. وسى كىسى جەتكىنشەكتەردىڭ شىنايى قامقورى بولدى. سونداي-اق, تاريح ءپانىنىڭ مۇعالىمى ساكەن تالدىاحمەتوۆ اعايدىڭ دا ورنى بولەك. ۇبت-عا دايىندىق كەزىندە كوپ قولداۋ كورسەتتى, – دەيدى ول.
جالپى, اقنۇر بالا كۇنىنەن جۋرناليست بولسام دەپ ارمانداپتى. بىراق, اتا-اناسى ونىڭ ەكونوميست بولعانىن قالاعان. ەندىگى ماقساتى – ەلىمىزدەگى ەڭ بەدەلدى وقۋ ورىندارىنىڭ بىرەگەيى سانالعان قازاقستان-بريتان تەحيكالىق ۋنيۆەرسيتەتىنىڭ حالىقارالىق ەكونوميكالىق مەكتەبىندە وقىپ, جوعارى ءبىلىم الىپ, تۋعان جەرىنىڭ ەكونوميكاسىنا ءوز ۇلەسىن قوسقىسى كەلەدى. «ارينە, مەن ەكونوميكا ماماندىعىن بەكەر تاڭداعان جوقپىن. ءبىر جاعىنان, اكە جولىن جالعاستىرعىم كەلدى. ەكىنشىدەن, قازىر الەمدە ءتۇرلى ەكونوميكالىق داعدارىستار بەلەڭ الدى. ونىڭ سالقىنى ءبىزدىڭ مەملەكەتىمىزگە دە تيمەۋى ءۇشىن ءوز ءىسىمنىڭ كاسىبي مامانى اتانىپ, تۋعان ەلىمدى كوركەيتكىم كەلەدى» دەيدى بويجەتكەن نازىك جۇرەگىنىڭ لۇپىلىمەن.
ءبىز دە كىشكەنتاي عانا جۇرەگى ەلىم, جەرىم دەپ سوققان اقنۇردىڭ بولاشاعى تەك جارقىن بولسىن دەمەكپىز!
ازامات ەسەنجول
