استانا قالاسىنىڭ اكىمدىگىندە قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆتىڭ قاتىسۋىمەن اكتيۆ ءماجىلىسى ءوتىپ, وندا ەلباسى استانانىڭ جاڭا اكىمىن تانىستىردى. بۇل تۋرالى استانا قالاسى اكىمدىگىنىڭ ءباسپاسوز قىزمەتىنەن حابارلادى.
– مەنىڭ جارلىعىممەن يمانعالي تاسماعامبەتوۆ قورعانىس ءمينيسترى بولىپ تاعايىندالدى. بۇل لاۋازىم – ەل ءۇشىن, حالقىمىز ءۇشىن جاۋاپكەرشىلىكپەن اتقارىلاتىن ەڭ ءبىر ماڭىزدى قىزمەت. مەملەكەتتىڭ تاۋەلسىزدىگىن قورعاۋ, شەكاراسىنىڭ بەرىكتىگىن قامتاماسىز ەتۋ – قاشان دا ابىرويلى ءىس. سوندىقتان, وسى قىزمەتتى ايىرىقشا سەنىم ارتىپ يمانعالي نۇرعاليۇلىنا جۇكتەپ وتىرمىن. ول كوپ جىلداردان بەرى مەنىڭ قاسىمدا جۇمىس ىستەپ كەلەدى, كوپتەگەن لاۋازىمداردى اتقاردى. بارلىق جەردە جۇمىستى بۇگە-شىگەسىنە دەيىن زەردەلەپ, مىقتى ۇجىم قالىپتاستىرىپ, قويىلعان مىندەتتەردى ورىندادى. ءبارىمىزدىڭ سۇيىكتى قالامىز استانانى التى جىلدان اسا باسقارىپ, شاھاردىڭ دامىپ, وركەندەۋى ءۇشىن بار كۇشىن سالىپ, ۇلكەن جۇمىستار اتقاردى, – دەدى مەملەكەت باسشىسى.
ءوز سوزىندە يمانعالي تاسماعامبەتوۆ وسىنداي جوعارى لاۋازىمعا تاعايىنداپ, ۇلكەن سەنىم بىلدىرگەنى ءۇشىن ەلباسىنا العىس ايتا كەلىپ, قالىپتاسۋ جىلدارىندا استانانىڭ ىرگەتاسىن بىرگە قالاسىپ, ەلدىڭ, حالىقتىڭ يگىلىگى ءۇشىن بىرگە تەر توككەن ارىپتەستەرىنە ريزاشىلىعىن جەتكىزدى.
– كونستيتۋتسياعا سايكەس, مەن ءماسليحاتتىڭ كەلىسىمىن الىپ, ادىلبەك جاقسىبەكوۆتى استانا قالاسىنىڭ اكىمى ەتىپ تاعايىندادىم. بۇل كىسى 1997 جىلى قالانىڭ العاشقى مەرى بولدى. ول قانداي سالادا جۇمىس ىستەسە دە, بارلىق مىندەتتەردى يگەردى, – دەدى مەملەكەت باسشىسى.
بەدەلسوز
نۇرسۇلتان نازارباەۆ:
– استانا – بولاشاقتىڭ قالاسى. مادەنيەت وشاعى, ءبىلىم مەن عىلىمنىڭ ورداسى. ەلىمىزدىڭ كوگىلدىر تۋى جەلبىرەگەن تاۋەلسىزدىگىمىزدىڭ تۇعىرى. ەلوردا – جاسامپازدىققا ۇمتىلىستىڭ, بۇكىل قوعامىمىزدىڭ جاڭارۋىنىڭ ەرەكشە نىشانىنا اينالعان قۇبىلىس. ون التى جىلدا ءبىز جاڭا ەلوردا سالىپ قانا قويعان جوقپىز, ەلىمىزدىڭ تۇرعىندارىمەن قاتار دۇنيە جۇزىنەن كەلەتىن قوناقتاردى دا تاڭداندىرىپ, تامساندىراتىن قالا جاسادىق. بۇگىن استانانىڭ عالامشارداعى «توپ-21» اقىلدى قالالار تىزىمىنە كىرگەنى ءمالىم بولدى. وسىنداي اسەم دە اقىلدى قالانى جانعا جايلى, كوپشىلىككە ىڭعايلى ەتىپ باسقارۋ ۇلكەن ىسكەرلىكتى قاجەت ەتەدى.
بۇدان كەيىن استانا قالاسىنىڭ اكىمى ادىلبەك جاقسىبەكوۆ ءسوز الىپ, «عاسىرلار توعىسىندا ەسىلدىڭ جاعاسىندا ومىرگە كەلگەن عاجايىپ شاھار – ەل پرەزيدەنتىنىڭ كەرەمەت شىعارماشىلىقپەن جۇزەگە اسىرىلىپ جاتقان ءتول تۋىندىسى. وسى نەگىزدە ايتىلعان سونى ويلار مەن بەرىلگەن بارلىق تاپسىرمالاردى ورىنداۋ مەن ءۇشىن ۇلكەن قۇرمەت جانە اركەز تىڭ جاۋاپكەرشىلىكتەر جۇكتەيدى» دەي كەلە جاڭا جۇمىسىنا كۇش-جىگەرىن جۇمسايتىندىعىنا سەندىردى.
