ەلوردادا ورتالىق ازياداعى ەڭ ءىرى – «Automechanika Astana – 2024» حالىقارالىق اۆتوموبيل كورمەسى اشىلدى, دەپ حابارلايدى astana-akshamy.kz
قر تۋريزم جانە سپورت مينيسترلىگى ءمالىم ەتكەندەي, ءىس-شارانى Business Media Central Asia تۋريزم جانە سپورت مينيسترلىگىنىڭ قولداۋىمەن جانە Business Media Central Asia سەرىكتەستىگى نەگىزىندە ۇيىمداستىرۋدا. Kazakh Tourism ۇلتتىق كومپانياسى اق بيىلعى ناۋرىز ايىندا قىتايداعى قازاقستان ءتۋريزمى جىلىنىڭ اشىلۋى اياسىندا Messe Frankfurt ازيا ايماعى بويىنشا وكىلدىگىمەن (گونكونگ ق.) ىنتىماقتاستىق تۋرالى مەموراندۋمعا قول قويعان بولاتىن.
كورمە 17-19 ءساۋىر كۇندەرى استاناداعى ەحرو حالىقارالىق كورمە ورتالىعىندا وتەدى. حالىقارالىق اۋديتورياعا يننوۆاتسيالىق ونىمدەر, قىزمەتتەر مەن تەحنولوگيالاردىڭ كەڭ اۋقىمى كورسەتىلەدى.
Automechanika Astana — 2024 كورمەسىنە الەمنىڭ 20 ەلىنەن 450-دەن استام ەكسپونات قويىلعان. سونىمەن قاتار ءۇش ۇلتتىق پاۆيلون جۇمىس ىستەپ تۇر. كورمەگە 15 000-نان اسا ادام كەلەدى دەپ كۇتىلۋدە. كورمە ەكسپوزيتسياسىنىڭ اۋدانى شامامەن 14000 م² قۇرايدى.
ءىس-شارانىڭ اشىلۋ سالتاناتىنا تۋريزم جانە سپورت ۆيتسە-ءمينيسترى ەرجان ەركىنباەۆ قاتىستى.
«قىتايداعى قازاقستان ءتۋريزمى جىلىنىڭ اشىلۋى اياسىندا Messe Frankfurt ءىرى كومپانيالارىنىڭ بىرىمەن ىنتىماقتاستىق تۋرالى مەموراندۋمعا قول قويدىق. وسى ۋاعدالاستىق اياسىندا Messe Frankfurt Automechanika Astana 2024 حالىقارالىق كورمەسىن ۇيىمداستىرىپ جاتىر. استانا — ەلىمىزدىڭ ساياسي, اكىمشىلىك, ىسكەرلىك جانە مادەني ورتالىعى. قالادا ورتالىق ازياداعى MICE ءتۋريزمنىڭ ورتالىعى دەپ اتاۋعا قاجەتتى بارلىق ينفراقۇرىلىم بار. ءبىز اتالعان قىزمەتتەردى تۋريستەر ءۇشىن ىڭعايلى جانە تارتىمدى ەتۋگە تىرىسامىز. بۇل ءوز كەزەگىندە, ۇلتتىق ەكونوميكانىڭ دامۋىنا جانە ونىڭ الەمدىك نارىققا ينتەگراتسيالانۋىنا ايتارلىقتاي اسەر ەتەدى. مىسالى, Automechanika Astana 2024 كورمەسىنە 15 000 ادام كەلەدى دەپ كۇتىلۋدە. ونىڭ ىشىندە 3000-ى الىس شەتەلدىڭ ازاماتتارى. ستاتيستيكا بويىنشا, ەلىمىزگە كەلگەن ءاربىر تۋريست ەلدە بولعان ۋاقىتتا كەمىندە 1400 دوللار جۇمسايدى», — دەدى ەرجان ەركىنباەۆ.
قاتىسۋشى ەلدەردىڭ قاتارىندا قىتاي, دانيا, گەرمانيا, ءۇندىستان, يسپانيا, يتاليا, ليتۆا, مالايزيا, تايلاند, تۇركىمەنستان, تۇركيا, ءباا, پولشا, رەسەي فەدەراتسياسى, بەلارۋس, اقش, ەستونيا, وڭتۇستىك كورەيا, جاپونيا بار.
بۇل — ورتالىق ازياداعى ىسكەرلىك جانە كونگرەسستىك ءتۋريزمنىڭ حابىنا اينالعان قازاقستانعا دەگەن جاھاندىق قىزىعۋشىلىقتى كورسەتەدى.
