كەلە جاتقان ەلوردا تويى استانالىقتارعا كوتەرىڭكى كوڭىل-كۇي سىيلادى. كەشە كونگرەسس-حوللدا وتكەن «ءازىل fest-2016» فەستيۆالى قالىڭ كوپشىلىكتىڭ كوڭىلىنەن شىقتى.
استانا قالاسى اكىمدىگىنىڭ ۇيىتقىسىمەن ۇيىمداستىرىلعان كوڭىلدى مەرەكەگە قازاقستاندىق جانە شەتەلدىك ونەرپازدار قاتىستى. ءداستۇرلى شارا ساحناسىنان بۇل جولى ماحاچكالادان كەلگەن «داگەستان», سۋرگۋتتىق «بورتسى» كومانداسى, «ودەسسكيە مانسى», جوعارى كۆن ليگاسىنىڭ فيناليستەرى – ەلوردالىق «سپارتا», الماتىلىق «ورىستار شوۋ» ونەرپازدارى كورىندى. سونداي-اق, قوناقتار «پاترۋل», «ۆۋزەرى», «قىزىق تimes» سىندى تانىمال تەلەجوبا اكتەرلەرىنىڭ ءازىل قويىلىمدارىنا كۋا بولدى.
ءازىل كەشى ەكى كەزەڭگە بولىنگەن. قوڭىلدى تاپقىرلاردىڭ ويىنى مەن كورەرمەن سۇراعى, ياعني – كىشىگىرىم «جاتتىعۋلار». ازىلدەردىڭ باسىم بولىگى باس قالانىڭ ومىرىمەن بايلانىستىرىلدى. ماسەلەن, زالدىڭ ءوزى «وڭ جاعالاۋ جانە سول جاعالاۋ» دەپ ءبولىندى.
كورەرمەندەردەردىڭ بەلسەندىلىگى ەرەكشە بايقالدى. سۇراق-جاۋاپ كەزىندە ولار «ەگەر قازاقستاننىڭ كەلەسى پرەزيدەنتى ايەل بولسا, قازاقتاردىڭ جالقاۋلىعى جايلى ازىلدەردەن قۇتىلامىز با؟», «جىگىت پەن دجەنتەلمەننىڭ ايىرماشىلىعى نەدە؟», «ەرلەر كوزبەن, قىزدار قۇلاقپەن جاقسى كورەدى. ال ەكەۋىنە ورتاق ماحاببات قايسى؟» دەگەن سەكىلدى ءتۇرلى ساۋال قويدى. كۇلكىگە قارىق قىلعان جاۋاپتاردىڭ ءبىرى – «سەنەن قۇتىلۋىمىز كەرەك-اۋ شاماسى». نۇرسۇلتان نازارباەۆتىڭ داۋىسىن اينىتپاي سالىپ, «تەلەفونىڭدى قالدىرىپ كەت, كەيىن حابارلاسامىز» دەگەن ونەرپاز دا بولدى. «ورىستار شوۋ» «ناعىز جىگىت سۇندەتكە وتىرعىزىلادى» دەگەن تاپقىرلىق تانىتسا, كۇرەس بالۋاندارى «قىزدار سىنىق قۇلاقتىلاردى سۇيەدى» دەپ زالدىڭ ىشەك-سىلەسىن قاتىردى.
ەكى ساعاتقا سوزىلعان «ءازىل فەست» ريزا بولعان جۇرتشىلىقتىڭ دۋ قول شاپالاعىمەن اياقتالدى.
ءمادينا جاقىپ
