باستى اقپاراتءبىلىم

بالاباقشاعا بارعىمىز كەلەدى…

 «بالالى ءۇي – بازار» دەپ حالقىمىز بەكەر ايتپاعان. راسىندا, ومىردەگى باقىتىمىز دا, بار اسىلدان ارتىق جاقۇتىمىز دا – بالا. سوندىقتان, ونىڭ بولاشاعى باياندى بولۋىنا الدىمەن اتا-اناسى الاڭدايدى. مەملەكەتتىڭ تىكەلەي قولداۋىمەن ەلوردادا قانشاما بالاباقشالار سالىندى. ءبىر عانا وتكەن جىلى استانادا 2020 ورىنعا ارنالعان توعىز بالاباقشا بوي كوتەردى. ولاردىڭ بارلىعى دا ۋاقىت تالابىنا ساي قاجەتتى جابدىقتارمەن جاراقتالعان. 

قىسقاسى, بالعىنداردىڭ دامۋىنا تولىقتاي مۇمكىندىك بار. ارينە, بالاباقشالار سانى كوبەيگەنمەن, بالدىرعانداردى وعان تولىق قامتۋ دا مۇمكىن بولماي وتىر. ونىڭ سەبەپتەرى دە كوپ.
بۇگىنگى تاڭدا ەلوردادا ءتۇرلى باعىتتاعى مەكتەپكە دەيىنگى 188 ۇيىم تىركەلسە, سونىڭ 163-ءى – بالاباقشالار. ونىڭ 85-ءى – مەملەكەتتىك, 76-سى جەكەمەنشىك, ەكەۋى ۆەدومستۆولىق سانالادى. قازىرگى كۇندە مەملەكەتتىك بالاباقشاعا 23 498 بالعىن تارتىلسا, جەكەمەنشىك ۇيىمعا 6 715 جەتكىنشەك بارادى. ونىڭ سىرتىندا بالالارعا ارنالعان قىسقا مەرزىمدى 25 شاعىن ورتالىق جۇمىس ىستەيدى. ونىڭ 21-ءى – مەملەكەتتىك, 4 – ءى جەكەمەنشىك. وعان 3931 بالدىرعان قابىلدانعان. ايتالىق, 21 شاعىن مەملەكەتتىك ورتالىق بالالارعا تەگىن قىزمەت كورسەتەدى. مەملەكەتتىك باعدارلاما بويىنشا بالعىنداردى مەكتەپكە دايىندايدى.

يزوبراجەنيە 035

وركەنيەتتى ەلدىڭ ءۇردىسى
تاياۋدا ەلباسى استانا قالاسىنىڭ ەكونوميكالىق دامۋى مەن ەكسپو كورمەسى ماسەلەلەرىنە ارنالعان كەڭەسىندە باس قالاداعى بالاباقشا ماسەلەسىنە ەرەكشە ءمان بەردى.
مەملەكەت باسشىسى وسى رەتتە ەلوردادا جاڭادان پايدالانۋعا بەرىلىپ جاتقان ۇيلەردىڭ ءبىرىنشى قاباتىنان بالاباقشا اشۋ جايىندا ءسوز قوزعادى. سونداي-اق, باس قالانىڭ قۇرىلىسى بارىسىندا بالاباقشالاردىڭ سالىنۋىن كوزدەن تاسا قىلماۋدى تاپسىردى.
–قىرۋار تۇرعىن ءۇي پايدالانۋعا بەرىلىپ جاتىر. بۇل ۇيلەردىڭ تومەنگى قاباتتارىندا بالاباقشا بار ما؟ مۇندا بارلىق قۇرىلىس كومپانيالارىنىڭ باسشىلارى وتىر, ءبىز ولارعا قاراجات بەرەمىز, نەسيە بەرەمىز. ءبىز ول تۇرعىن ۇيلەردىڭ ىشىندە بالاباقشا بولۋىن قاراستىرىپ, تالاپ قويۋىمىز كەرەك. ءزəۋلىم عيماراتتار سالىپ كەرەك ەمەس. ءۇي قۇرىلىسىنا رۇقسات بەرەر كەزدە ولاردىڭ ءبىرىنشى قاباتتارىندا بالاباقشا سالىنۋى ءتيىس دەگەن تالاپ قويىڭىزدار. بارلىق əلەمدە سولاي, – دەدى ەلباسى.

مامان نە ايتادى؟
بيىلعى جىلدىڭ 15 اقپانىنان باستاپ 1 ساۋىرگە دەيىن ەلوردادا بالالاردى بالاباقشاعا قابىلداۋ جۇرگىزىلدى. ناتيجەسىندە 8502 بالعىنعا جولداما بەرىلدى. جالپى, توپتاۋ جۇمىستارى قالاي جۇرگىزىلدى, تاعى وسى باعىتتا قانداي ماسەلەلەر قاراستىرىلۋدا دەگەن ويمەن استانا قالالىق ءبىلىم باسقارماسىنىڭ مەكتەپكە دەيىنگى تاربيە مەن وقۋ ءبولىمى باسشىسى انار سماكوۆانىڭ پىكىرىن بىلگەن ەدىك.
–مەكتەپكە دەيىنگى بالالار ۇيىمدارىنا قابىلدانۋعا ارنايى ستاندارت جازىلعان. وندا زاڭدى وكىلدەرى مۇگەدەك سانالاتىنداردىڭ بالالارى, اتا-انانىڭ قامقورلىعىنسىز قالعاندار, جەتىم بالالار, كوپ بالالى وتباسىدان شىققاندار جانە اسكەري قىزمەتشىلەردىڭ, ونىڭ ىشىندە قىزمەت اتقارۋ كەزىندە قازا تاپقانداردىڭ, قايتىس بولعان نەمەسە حابار-وشارسىز كەتكەن قىزمەتكەرلەردىڭ بالالارى العاشقى كەزەكتە ورىن الادى. وسى جىلى جولداما العانداردىڭ بارلىعى جۇمىس ىستەپ تۇرعان بالاباقشالارعا بارادى. سونداي-اق, ەلوردانىڭ سول جاعالاۋىنان جاڭا مەملەكەتتىك بەس بالاباقشا پايدالانۋعا بەرىلدى. ول ماۋسىم ايىنان باستاپ بالعىندارعا قىزمەت كورسەتەدى. بۇگىنگى تاڭدا وعان 1 280 بالا بارادى دەپ جوسپارلانىپ وتىر. جالپى, ءاربىر بالاباقشا 240 بالدىرعانعا جوبالانعان.
ارينە, مەملەكەتتىك بالاباقشاعا قاراعاندا جەكەمەنشىك ۇيىمنىڭ تولەماقىسى جوعارىلاۋ ەكەنى راس. ەلوردادا 76 جەكەمەنشىك مەكتەپكە دەيىنگى ۇيىم بولسا, ونىڭ 52-ءسى مەملەكەتتىك تاپسىرىسپەن جۇمىس ىستەيدى. وعان 4780 بالا تارتىلعان. ماسەلەن, بيىلعى جىل بويىنشا جەكەمەنشىك بالاباقشادا مەملەكەتتىك تاپسىرىس 15 900 تەڭگەنى قۇراسا, اتا-انالار 23 مىڭ تەڭگە تولەيدى. سوندىقتان مەملەكەتتىك تاپسىرىسپەن جۇمىس ىستەيتىن مەكتەپكە دەيىنگى جەكەمەنشىك ۇيىمدار مەن مەملەكەتتىك بالاباقشانىڭ تولەماقىسىن سايكەستەندىرۋ باعىتىندا شارالار جۇرگىزىلۋدە. ەگەر ول شەشىلسە, اتا-انالاردىڭ تاڭداۋى دا ارتادى, ەكىنشىدەن, جىلداپ توساتىن كەزەك تە ازايادى, – دەيدى انار سماكوۆا.

انار سماكوۆا,
استانا قالالىق ءبىلىم باسقارماسىنىڭ مەكتەپكە دەيىنگى تاربيە مەن وقۋ ءبولىمى باسشىسى:
– ەلوردادا سابيلەردىڭ دۇنيەگە كەلۋ كورسەتكىشى دە جوعارى. كەلەسى توپتاۋ جۇمىستارى 2017 جىلى جۇرگىزىلمەك. ءبىز قازىر مۇمكىندىگىنشە بالاباقشاعا جولدامانى اۆتوماتتى تۇردە بەرۋدى جوبالاپ وتىرمىز. ماسەلەن, اتا-انالار حالىققا قىزمەت كورسەتۋ ورتالىعىنا بارىپ, مەكتەپكە دەيىنگى ۇيىمعا كەزەككە اۆتوماتتى تۇردە ورنالاسادى. بۇل دا ءدال سولاي بولماق.

جاعىمدى جاڭالىق
بۇگىنگى تاڭدا ەلوردادا بيىلعى جىلدىڭ 1 قاڭتارىنا دەيىنگى مالىمەت بويىنشا 87 مىڭنان اسا بالا كەزەكتە تۇر. ارينە, ودان بەرگى التى اي ىشىندە ءبىراز وزگەرىستەر بولعانى انىق. جىل باسىندا بالاباقشالارعا توپتاۋ جۇمىستارى جۇرگىزىلدى. ءبىلىم باسقارماسىنا كۇنىنە 100-دەن اسا بالعىندار كەزەككە تۇرادى. ويتكەنى, ونىڭ ءتۇرلى سەبەپتەرى بار. وعان ىشكى كوشى-قون ماسەلەسى دە اسەر ەتەدى. ەلوردادا سابيلەردىڭ دۇنيەگە كەلۋ كورسەتكىشى دە جوعارى. كەلەسى توپتاۋ جۇمىستارى 2017 جىلى جۇرگىزىلمەك. «ءبىز قازىر مۇمكىندىگىنشە بالاباقشاعا جولدامانى اۆتوماتتى تۇردە بەرۋدى جوبالاپ وتىرمىز. ماسەلەن, اتا-انالار حالىققا قىزمەت كورسەتۋ ورتالىعىنا بارىپ, مەكتەپكە دەيىنگى ۇيىمعا كەزەككە اۆتوماتتى تۇردە ورنالاسادى. بۇل دا ءدال سولاي بولماق» دەدى استانا قالالىق ءبىلىم باسقارماسىنىڭ مەكتەپكە دەيىنگى تاربيە مەن وقۋ ءبولىمى باسشىسى انار سماكوۆا.
شىندىعىندا, جاعىمدى جاڭالىق ەكەن. ەگەر وسى جوبا ىسكە اسىپ جاتسا, اتا-انالار ءبىر جولداما ءۇشىن جۇمىستان سۇرانىپ, ۇزىن-سونار كەزەككە تۇراتىن قيىنشىلىقتان ارىلار ەدى.

دەرەك پەن دايەك

2016 جىلى استانا قالاسىندا 1520 ورىنعا ارنالعان 6 مەملەكەت­تىك بالاباقشا مەن 60 ورىندىق 1 قو­­سال­قى بالاباقشا عيماراتىن اشۋ جوسپارلانىپ وتىر.
ولار:
كوكتال – 2 كەنتىندە 240 ورىندىق ساناتورلىق بالالار باقشاسى;
سىعاناق كوشەسىنىڭ وڭتۇستىگىندە 240 ورىندىق №1 بالاباقشا;
كومسومولسكي كەنتىندەگى قىز جىبەك كوشەسى مەن ۇلپان قىسقا كو­شە­سىنىڭ قيىلىسقان جەرىندە 280 ورىندىق بالاباقشا;
كومسومولسكي كەنتىندەگى قىز جىبەك كوشەسى مەن بايان سۇلۋ كوشە­لەرىنىڭ قيىلىسقان جەرىندە 280 ورىن­دىق بالاباقشا;
№23 كوشە اۋدانىنداعى 240 ورىندىق بالاباقشا; (ورىنبور مەن №36 كوشەلەرىنىڭ اراسى)
№4 «ارۋجان» بالاباقشاسىنا 60 ورىندىق عيمارات.

ازامات ەسەنجول

تاعىدا

ۇقساس جاڭالىقتار

پىكىر ۇستەۋ

Back to top button