بالەت جۇلدىزدارى استاناعا جينالادى
26 ماۋسىم كۇنى «قازاقستان» ورتالىق كونتسەرت زالىندا بالەت ونەرىنىڭ جارىق جۇلدىزى, ۋكرايندىق ونەرپاز دەنيس ماتۆيەنكونىڭ تەاترى «Quatro» جانە «Radio and Julie» قويىلىمدارىن قويادى. «KJ» ارت اگەنتتىگىنىڭ شاقىرۋىمەن ەلورداعا ات باسىن تىرەيتىن ونەر ۇجىمىنىڭ جاڭالىعى نەدە؟ ونى بىزگە اتالمىش اگەنتتىكتىڭ ارت-ديرەكتورى, بالەتمەيستەر جانىبەك قايىر ايتىپ بەردى.
– كومپانيانى قۇرۋداعى باستى ماقساتىم – قازاقستاندىق كورەرمەندى الەمدىك بالەت جۇلدىزدارىمەن, وسى ونەردىڭ جاڭا اعىمدارىمەن جاقىن تانىستىرۋ. بالەت تەك قانا كلاسسيكادان تۇرمايدى. قازىر مودەرن سياقتى زاماناۋي باعىتتار دا شىقتى. دەنيس ماتۆيەنكونىڭ ءوزى – سونداي جاڭاشىلدىققا جاقىن, بالەتتىڭ قىر-سىرىن مەڭگەرگەن الەمدىك دەڭگەيدەگى جۇلدىز, ماريا تەاترىنىڭ پرەمەرى, ۇلكەن تەاتر شاقىرعان جۇلدىزدى بالەت ءبيشىسى. بيىلدان باستاپ ول نوۆوسىبىردەگى وپەرا جانە بالەت تەاترىنىڭ كوركەمدىك جەتەكشىسى قىزمەتىنە كىرىسىپ وتىر, – دەپ باستادى اڭگىمەسىن بالەتمەيستەر.
ونىڭ ايتۋىنشا, «Radio and Julie» بالەتى كلاسسيك قالامگەر ۋيليام شەكسپيردىڭ «رومەو مەن دجۋلەتتا» شىعارماسىنىڭ جەلىسىمەن قويىلماق. الايدا, قويىلىم جاڭاشا تالداۋدا بولماق.
«دەنيس ونىڭ ورنىنا «Sabat» بالەتىن ۇسىنعان. بىراق, اتالمىش بالەتتى قازاقستاندىق كورەرمەننىڭ نازارىنا شىعارۋ ءالى ەرتەرەك دەپ ويلاپ, الدىنداعى شىعارماعا توقتادىق. بۇل بالەتتە «Radio and Hair» دەگەن اتاقتى روك-توپتىڭ مۋزىكاسى وينايدى. مۋزىكا مەن قويىلىم-دى قويۋدا حورەوگراف ەدۆارد كليۋك كورەرمەندى قىزىقتىراتىن وزىندىك ەرەكشەلىكتەردى تاپتى. وسىنداي بالەتتى قازاقستاندىقتار ءالى كورمەگەن.
ال «Quatro» بالەتىندە وسى ونەر تۇرىندەگى جاڭا اعىمدار, ياعني, تەحنولوگيا زامانىنداعى قازىرگى تىنىس-ءتىرشىلىگىمىز قاربالاسىمەن قوسا كورىنىس تابادى. ياعني, بۇل شىعارما ارقىلى بۇگىنگى ءومىرىمىزدى سىرتىنان تاماشالاۋعا بولادى.
بالەتكە ءتورت كەيىپكەر قاتىسادى. ونىڭ ارقايسىسىنىڭ ءوز ءومىرى, ءوز ەنەرگەتيكاسى بار. ءبىر ەرەكشەلىگى – «Quatro» بالەتىنە ارنايى مۋزىكا جازىلدى. ساحنادا ول رويال مەن ۆيولونچەلدىڭ سۇيەمەلدەۋىمەن جاندى داۋىستا ورىندالادى» دەيدى جانىبەك قايىر.
بالەتمەيستەر اڭگىمە بارىسىندا «استانا وپەرا» تەاترىنىڭ قويىلىمدارىنا قاتىستى دا پىكىرىن ءبىلدىردى. ونىڭ سوزىنشە, تەاتر قويعالى وتىرعان «پاريج قۇداي اناسىنىڭ عيباداتحاناسى» بالەتى – ونەر ۇجىمىنىڭ ۇلكەن دامۋ جولىنا تۇسكەنىنىڭ بەلگىسى جانە ونەردەگى زور جەتىستىكتەرگە جەتەلەيتىن قويىلىم. «سونداي قويىلىمدار استانادا جيىرەك قويىلۋى ءتيىس. سوندا حالىقتا دا تاڭداۋ بولىپ, بالەت ونەرىنە جاقىنداي تۇسەدى» دەيدى ول. اگەنتتىك تە بۇل تەاترمەن بولاشاقتا ارىپتەستىك ورناتپاق.
«KJ» ارت اگەنتتىگى استانادا شەتەلدىك ءارتىستەردىڭ قاتىسۋىمەن بالەت قويۋ جوباسىن العاش رەت قولعا الىپ وتىر. اگەنتتىك ارت-ديرەكتورى بولاشاقتا ەلورداعا الەمدىك جۇلدىزدار قاتىساتىن كلاسسيكالىق بالەتتەردى اكەلمەك. سونداي-اق, شەتەل ساحنالارىندا ونەر كورسەتەتىن قازاق جۇلدىزدارىن استاناعا جيناۋ ماسەلەسىن ويلاستىرۋدا. ماسەلەن, بۋداپەشت تەاترىندا جۇمىس ىستەيتىن ءاليا تانىقباەۆا سىندى ءبيشىنى شاقىرماق. بالەتمەيستەردىڭ ايتۋىنشا, ول سياقتى الەمدىك دەڭگەيدەگى قازاق ارتىستەرى شەتەلدە وتە كوپ. بۇيىرتسا, بۇل جوبا دا الداعى بىرنەشە جىلدا جۇزەگە اسادى.
امانعالي قالجانوۆ