استاناداعى رەسەي عىلىم جانە مادەنيەت ورتالىعىندا «الەف» ەۆرەي ەتنومادەني بىرلەستىگى كلاسسيكالىق مۋزىكا كەشىن وتكىزدى. حالىقارالىق كونكۋرستاردىڭ لاۋرەاتى رۋسلان تۇرىنتاەۆ پ.چايكوۆسكي, پاگانيني, گ.ۆەنياۆسكي مەن برامستىڭ تۋىندىلارىن ورىنداپ, تىڭدارمان قاۋىمدى ونەرىمەن ءتانتى ەتتى.
12 جاسىنان تالعامى بيىك مۋزىكا ماماندارىنىڭ نازارىنا ءتۇسىپ, قازاقستاننىڭ مەرەيىن دۇنيەجۇزىنە اسىرىپ جۇرگەن رۋسلان تۋرالى گازەتىمىزدە ءبىرنەشە ماقالا جاريالانعان بولاتىن. وقىرماندارىمىز ونىڭ ماسكەۋ مەملەكەتتىك كونسەرۆاتورياسىنىڭ ورتالىق مۋزىكا مەكتەبىندە وقىپ جۇرگەنىن, 15 جاسىندا جاسوسپىرىمدەر اراسىندا وتكەن سەگىزىنشى چايكوۆسكي اتىنداعى حالىقارالىق كونكۋرستىڭ جەڭىمپازى بولعانىن دا بىلەدى. اتاقتى ديريجەر, سكريپكاشى ۆ.سپيۆاكوۆتىڭ رۋسلانعا فرانتسۋز شەبەرى ەميل بۋلانجەنىڭ سكريپكاسىن تابىس ەتىپ, ونىڭ ستيپەندياتى اتانعانىن دا بىلەمىز. سپيۆاكوۆتىڭ دۋالى اۋىزىمەن «قازاقستاندىق پاگانيني» اتانعان رۋسلان اتاقتى ماەسترونىڭ «ۆيرتۋوزى موسكۆى» وركەسترىمەن كونتسەرت بەرىپ جۇرەدى. بىلتىر ەۋروپانى تۇگەل شارلاپ, مەكسيكادا دا كونتسەرت بەرىپتى.
جازعى دەمالىسقا كەلگەن بويدا رۋسلاننىڭ ەلوردالىقتارعا سالەم بەرگەن جايى ەكەن. وسى ءداستۇردى قالىپتاستىرۋدا «الەف» ەتنومادەني ورتالىعىنىڭ جەتەكشىسى مويسەي گولدبەرگتىڭ ۇلەسى زور. جاسىنان جارق ەتكەن تالانتتى ءدوپ تانىپ, ونىڭ ۇشتالۋىنا اتسالىسىپ, جەتەكتەپ ءجۇرىپ ماسكەۋگە اپارعان دا مويسەي ميحايلوۆيچ دەۋگە بولادى. ءتىپتى, اقىلى وقۋعا قاراجات جيناۋ ءۇشىن تالاي ەسىكتەردى اشىپ, «قازاقتىڭ بالاسى ءۇشىن سۇراپ جۇرگەنىنە ارلانبايتىنىن» ماقتانىشپەن ايتقانى بار. سوندىقتان دا, رۋسلان شىعارماشىلىعىنىڭ باستاۋىندا گولدبەرگتىڭ قامقورلىعى ايرىقشا. ول تۋرالى وسى كەشتە ءسوز العان قوعام قايراتكەرى قۋانىش سۇلتانوۆ تا اتاپ ءوتتى. رۋسلاننىڭ شىعارماشىلىعىن تالداعاندا, مۋزىكا ماماندارى ءورىمتال جاستىڭ سكريپكادا ويناۋ ەرەكشەلىگىن ءسوز ەتپەي تۇرمايدى. ونىڭ ورىنداۋىندا ىشەكتى اسپاپتىڭ ءۇنى وزىندىك بوياۋىمەن ناقىشتالا تۇسەتىنىن بايقاعان.
رۋسلاننىڭ يتاليادا وتەتىن «دجوۆانني مۋزيتسيەنتە» سايىسىنا قاتىسىپ, XII عاسىردا سالىنعان كونە حرامدا پاگانينيدىڭ ماڭگىلىك تۋىندىلارىن ورىنداعانى بار. اتاقتى نيككولو پاگانيني, دجۋزەپپە ءمادزينيدىڭ وتانىندا قارشاداي قازاق بالاسى اتاقتى سكريپكاشىلاردىڭ رۋحىمەن تىلدەسكەنىن سول كۇندەرى بۇقارالىق اقپارات قۇرالدارى جارىسا جازىپتى.
سوندا ىرىمشىل يتاليالىقتار «بالانى ماەسترو پاگانينيدىڭ رۋحى قولدادى, قۇدىرەتى قوندى» دەپ ءبىراۋىزدان شۋلاپ قويا بەرىپتى. ءبىرىنشى ورىندى ولجالاعان رۋسلاندى گەنۋيالىقتار قوشەمەتتەپ, بار قۇرمەتىمەن شىعارىپ سالادى. بۇل ونەر الەمىنىڭ ۇشار شىڭىنا بەت العان قازاق بالاسىنىڭ شەتەلدەگى جەڭىسىنىڭ ءبىر بايانى عانا.
ايگۇل ۋايسوۆا
