«قازمەديا» ورتالىعىندا «امانگەلدى يمان» قوعامدىق قورىنىڭ جانە قوستاناي وبلىسى مادەنيەت باسقارماسىنىڭ باستاماسىمەن 1916 جىلعى ۇلت-ازاتتىق كوتەرىلىس باس ساردارى, حالىق باتىرى امانگەلدى يمانوۆتىڭ 150 جىلدىعىنا ارنالعان برەندبۋك تانىستىرىلىمى ءوتتى.
برەندبۋك اۆتورى – تانىمال سۋرەتشى, يلليۋستراتور, ديزاينەر, قازاقستان سۋرەتشىلەر وداعىنىڭ مۇشەسى, قر كوركەم اكادەميا كوررەسپوندەنت مۇشەسى الماس سىرعاباي. ول سوڭعى جىلدارى كومپيۋتەرلىك گرافيكانى قولدانۋ ارقىلى «Digital art» ستيلىندە سۋرەت سالىپ ءجۇر.
سۋرەتشى الماس سىرعاباي – 2022 جىلى ءبىرتۇتاس ۇلتتىڭ ۇستازى اتانعان احمەت بايتۇرسىنۇلىنىڭ 150 جىلدىعى لوگوتيپىنىڭ اۆتورى. سونداي-اق ول – الاش ارداقتىسىنىڭ ومىرىنەن سىر شەرتىپ, تۇلعالىق بولمىسىن ايقىنداعان سۋرەت كورمەسىن دە ۇيىمداستىرعان سۋرەتشى-كەسكىندەمەشى.
لوگوتيپتىڭ قىسقاشا مازمۇنىنا اۆتورى الماس سىرعاباي بىلاي دەپ تۇسىنىكتەمە بەردى: «لوگوتيپ ارنايى قۇرىلعان كوميسسيانىڭ تالقىلاۋىنان ءوتتى. لوگوتيپ ەكى ءتۇرلى نۇسقادا دايىندالدى. ءبىرىنشىسى, قازاقتىڭ ايگىلى كەسكىندەمەشىسى, قازاق بەينەلەۋ ونەرىنىڭ نەگىزىن سالۋشىلاردىڭ ءبىرى, قازاقستاننىڭ حالىق سۋرەتشىسى ءابىلحان قاستەەۆ سالعان پورترەتىنىڭ نەگىزىندە, ەلدىڭ كوڭىلىندە جۇرگەن بەلگىلى وبرازدا جاسالدى. ەكىنشىسى, الماتىدا ورناتىلعان العاشقى اتتى ءمۇسىن «امانگەلدى يمانوۆ» ەسكەرتكىشىن ء(مۇسىنشى ح.اسقار-سارىدجا, ساۋلەتشى ت.باسەنوۆ; 1947 ج.) نەگىزگە الا وتىرىپ جاسالدى. سەبەبى قازاق حالقىنىڭ جادىندا باتىردىڭ وبرازى وسىلاي ساقتالعان».
قازاقستان كومپوزيتورلار وداعىنىڭ توراعاسى, قازاقستاننىڭ ەڭبەك سىڭىرگەن قايراتكەرى, پروفەسسور سەرىكجان ءابدىنۇروۆ ءبىر شىعارماسىن امانگەلدى يمانوۆقا ارنادى. جالپى بيىلعى ءساۋىر ايىندا استانا قالاسى اكىمدىگىنىڭ ەركەعالي راحماديەۆ اتىنداعى مەملەكەتتىك اكادەميالىق فيلارمونياسى «باتىردىڭ بيىك تۇلعاسى» اتتى اكادەميالىق كونتسەرت جوسپارلاپ, دايىندىقتى باستاپ كەتتى. سەرىكجان ءابدىنۇروۆتىڭ ايتۋىنشا, قازاق مۋزىكا ونەرىندە امانگەلدى باتىرعا كوپ شىعارما ارنالدى. ءالى دە جازىلىپ كەلەدى. سونىڭ ەڭ كورنەكىلەرى – كلاسسيك كومپوزيتورلارىمىز مۇقان تولەباەۆ پەن ەۆگەني برۋسيلوۆسكيدىڭ «امانگەلدى» وپەراسى, قىتاي كومپوزيتورى سي سينحايدىڭ «امانگەلدى» سيمفونياسى. سونداي-اق ءابىلاحات ەسپاەۆ, لاتيف حاميدي, بوريس ەرزاكوۆيچ, دميتري ماتسۋتسين, اتاقتى كۇيشى سۇگىر شىعارمالارى قازاق راديوسىنىڭ «التىن قورىندا» ساقتاۋلى. ال اريالاردى ورىنداعاندار – قازاق ونەرىنىڭ نەگىزىن قالاۋشىلار ماناربەك ەرجانوۆ, ءمۇسىلىم مەن ريشاد ابدۋلليندەر, ەرمەك سەركەباەۆ, سۋات ابۋسەيىتوۆ, راشيت مۇساباەۆ, كاۋكەن كەنجەتاەۆ. وسى اتالعان شىعارمالاردىڭ بارلىعى كونتسەرتتە جاڭا وڭدەۋدە, جاڭا دىبىستا ارلەنىپ, قايتادان جاڭعىرىپ ورىندالماق.
ال تانىستىرىلىم سوڭىندا كۇيشى, قازاقستاننىڭ ەڭبەك سىڭىرگەن قايراتكەرى انار مۇزداحانوۆا ايتباي مۇزداحانوۆتىڭ «امانگەلدى ءدۇبىرى» كۇيىن تارتۋ ەتتى.
