ەلباسى نۇرسۇلتان نازارباەۆ پەن قازاقستان پرەزيدەنتى قاسىم-جومارت توقاەۆ ەكسپو قالاشىعى اۋماعىندا ورىن تەپكەن ەتنواۋىلعا بارىپ, حالىقتى ناۋرىز مەرەكەسىمەن قۇتتىقتادى.
ەتنواۋىلدى جاعالاي ون جەتى كيىز ءۇي تىگىلدى. سول ماڭايدا تەاترلاندىرىلعان قويىلىمدار, ۇلتتىق سپورت ويىندارى, قولونەرشىلەر كورمەسى ۇيىمداستىرىلىپ, سالت-داستۇرلەرىمىز دارىپتەلدى. ەلباسى مەن پرەزيدەنت ەتنواۋىلدى ارالاپ, ەلوردا قوناقتارى جانە تۇرعىندارىن, بارشا قازاقستاندىقتاردى ناۋرىز مەرەكەسىمەن قۇتتىقتاي وتىرىپ, باق-بەرەكە تىلەدى.
ناۋرىز تويىندا ەلوردادا نەكەلەرىن قيعان 9 جۇپ تا سول جەردەن تابىلىپ, نۇرسۇلتان نازارباەۆتىڭ اق باتاسىن الدى. ەلباسى جاس وتباسىلاردى ەستە قالارلىق ماڭىزدى كۇندەرىمەن قۇتتىقتاپ, ولارعا باقىتتى, ۇزاق ءومىر تىلەدى.
– سەندەرگە باقىت تىلەيمىن! ماحابباتتارىڭ ەش ۋاقىتتا سونبەسىن. الدارىڭ اشىق بولسىن. بالالى-شاعالى, ءۇبىرلى-ءشۇبىرلى بولىڭدار! اتا-انالارىڭا قۋانىش اكەلىڭدەر. ەلدىڭ ازاماتى بولىڭدار! – دەدى نۇرسۇلتان نازارباەۆ.
قاسىم-جومارت توقاەۆ تا حالىققا قۇتتىقتاۋ جولدادى. «ءبارىمىزدى قۋانىش پەن ءسۇيىسپەنشىلىك سەزىمىنە بولەيتىن بۇل مەرەكە – بەيبىتشىلىك پەن جاقسىلىقتىڭ نىشانى. ونىڭ فيلوسوفيالىق ءمانى زور جانە بۇكىلالەمدىك مادەني سيپاتى بار. كونە زاماننان باستاۋ الاتىن وسىناۋ مەيرام جاڭارۋ مەن جاڭا ءومىردىڭ باستالۋ ءساتىن سيپاتتايدى. ناۋرىز – رۋحاني باي مۇرامىزدىڭ, بىرەگەي ۇلتتىق كودىمىز بەن ۇزدىكسىز ۇرپاق ساباقتاستىعىنىڭ جارقىن سيمۆولى. بۇل مەرەكە ومىرىمىزگە جاسامپازدىق پەن دامۋدىڭ جاڭا لەبىن اكەلەدى. بۇگىندە ناۋرىز – ورتاق شاڭىراعىمىز – قازاقستان رەسپۋبليكاسىنداعى دوستىقتى, ءوزارا قۇرمەت پەن كەلىسىمدى نىعايتۋعا سەپتىگىن تيگىزەتىن شىن مانىندەگى جالپىحالىقتىق مەيرام. ونىڭ ماڭگىلىك ءمانى – ەڭ جوعارى قۇندىلىعىمىز بەن ورتاق بايلىعىمىزدى – حالىقتىڭ ىنتىماعىن بەكەمدەۋ. «بىرلىك بار جەردە, تىرلىك بار» دەيدى حالىق دانالىعى. ءاز-ناۋرىز ءار وتباسىنا باق-بەرەكە اكەلسىن!» دەلىنگەن پرەزيدەنت قۇتتىقتاۋىندا.
