قولى شيپالى دارىگەرگە جۇرتشىلىق ىزدەپ كەلىپ قارالادى. نۇربول نۇرلانۇلى دا سونداي ساناۋلى ساڭلاقتاردىڭ قاتارىندا. ول 2000 جىلى استاناعا العاش رەت جاس مامان رەتىندە كەلگەندە قالادا بىردە-ءبىر تانىسى جوق-تىن. ال, قازىر بىلىكتى ماماندى تانىمالدىلىق ءوزى ىزدەپ تاپتى. «ءار وتا جاساعان ادام ءوزىڭنىڭ ەت جاقىن تۋىسىڭداي بولىپ كەتەدى. سەبەبى, سىرقات ادام اياعىنان تۇرىپ كەتكەنشە ونىڭ تاعدىرىنا الاڭداۋلىسىڭ», – دەيدى قر دەنساۋلىق ساقتاۋ ءىسىنىڭ ۇزدىگى, مەديتسينا عىلىمىنىڭ كانديداتى نۇربول تۇرسىنباەۆ.
تاڭداۋىن اداسپاي تاپقان…
مەديتسينا عىلىمدارىنىڭ اتاسى سانالاتىن حيرۋرگيا – كۇردەلى سالا. مەديتسينالىق وقۋدى تاڭداعانداردىڭ كوپشىلىگى بۇل سالاعا بارۋعا جۇرەكسىنەدى. نۇربول نۇرلانۇلىمەن بىرگە وسى فاكۋلتەتتە وقىعان 12 بالانىڭ 8-ءى ستۋدەنتتىك كەزدەگى العاشقى وتادان كەيىن-اق, حيرۋرگ بولۋدان باس تارتىپتى. ال نۇربول كەرىسىنشە, وتا ۇستەلىندە ءومىرى ءۇشىن كۇرەسىپ جاتقان ادام وزىنە ەرەكشە كۇش-قۋات بەرگەنىن ايتادى. «وتا جاسالىپ جاتقان ادامنىڭ جۇدىرىقتاي جۇرەگىنىڭ سوعىسى ماعان رۋح سىيلادى. ول ءومىر ءۇشىن كۇرەسىپ جاتتى. سول ساتتە جان-دۇنيەمدى «بۇل ادامنىڭ جۇرەگىنىڭ سوعىسى توقتاماۋىنا مەن كومەكتەسۋگە ءتيىسپىن, ونىڭ ومىرىنە اراشا ءتۇسۋىم كەرەك» دەگەن وي بيلەپ العانى سونشالىق, قورقۋ دەگەندى مۇلدە ۇمىتتىم», – دەيدى نۇربول.
پەداگوگتار وتباسىندا تۋىپ-وسكەن نۇربول بىردە قاتتى اۋىرىپ قالادى. اۋرۋحانا توسەگىندە جاتقان وعان حيرۋرگ بولىپ جۇمىس ىستەيتىن جاقىن تۋىسى قارايلاسىپ تۇرعان. ءوزىن اينالىپ-تولعانعان دارىگەر تۋىسىنىڭ ءىلتيپاتى بالا نۇربولدىڭ بويىنا مەديتسيناعا دەگەن, ونىڭ ىشىندە حيرۋرگ ماماندىعىنا دەگەن سۇيىسپەنشىلىگىن وياتادى. مەكتەپ قابىرعاسىنان كەيىن شىمكەنتتەگى مەديتسينالىق ۋنيۆەرسيتەتكە وقۋعا تۇسەدى. باسىندا فارماتسەۆتيكا سالاسىنا كەلگەن ول كوپ ۇزاماي بۇل ماماندىقتىڭ وزىنە قول ەمەستىگىن سەزىنەدى. رەكتورعا حات جازا ءجۇرىپ, ءوزى قالاعان حيرۋرگياعا اۋىسىپ الادى.
شىڭدالۋ مەكتەبى
حيرۋرگتىڭ قولى – نازىك, كوزى – قىراعى, جۇرەگى – ايبارلى بولۋى كەرەك دەسىپ جاتادى. ادامنىڭ ىشكى اعزاسىن كۇندە اقتاراتىن حيرۋرگتاردى قاتىگەز سانايتىندار دا بار. بىراق نۇربول نۇرلانۇلىنىڭ اڭگىمەسىنەن كەيىن بۇل پىكىردىڭ جاڭساق ەكەنىنە كوزىڭىز جەتە تۇسەدى. ول وتا جاسالعان ءار ادامنىڭ ومىرىنە ءوزىن جاۋاپتى سانايتىنىن ايتادى. ءتىپتى, ءبىر وتا-دان كەيىن بىرنەشە كۇن, ايلار بويى اۋىر ويعا باتىپ, جۇرەك پەن جۇيكەگە سالماق تۇسەتىن كەزدەر از بولمايدى ەكەن. كەيدە وتانىڭ كۇردەلىلىگى سونداي, 10-12 ساعاتقا سوزىلىپ كەتەتىنى بولادى. كۇننىڭ قاشان شىعىپ, باتقانىن اڭعارماي جۇمىسىنا بەرىلگەن حيرۋرگتاردىڭ مۇراتى – حال ۇستىندە جاتقان ادامنىڭ ءومىرىن اراشالاپ قالۋ. نۇربول نۇرلانۇلى ءوزىنىڭ ماماندىعىن – ماماندىقتىڭ تورەسى سانايدى. «ماماندىعىمنىڭ ارقاسىندا تالاي ادامنىڭ ءومىرىن اراشالاپ, العىسىنا يە بولدىم. جۇرتشىلىقتىڭ العىسى مەن باتاسىن العاندا, وتا كەزىندەگى قينالىسىڭدى لەزدە ۇمىتىپ كەتەسىڭ», – دەيدى ول.
نۇربول تۇرسىنباەۆتىڭ استاناداعى ەڭبەك جولى اباي بايگەنجين باسقاراتىن ۇلتتىق عىلىمي مەديتسينالىق ورتالىقتان باستالدى. وسىندا تابان اۋدارماي 14 جىل قىزمەت ەتىپتى.
– بۇل ورتالىقتىڭ ماتەريالدىق-تەحنيكالىق بازاسىنىڭ مىقتىلىعىن بىلاي قويعاندا, دارىگەرلەرى دە شەتىنەن بىلىكتى. وسى مەكەمە ماعان ۇلكەن مەكتەپ بولدى. نەبىر كۇردەلى وپەراتسيالاردى وسىندا يگەرىپ, زاماناۋي مەديتسينالىق قۇرىلعىلاردىڭ ءتىلىن مەڭگەردىم, – دەيدى دارىگەر.
نۇربول نۇرلانۇلى ۇستازى, اكادەميك جاقسىلىق دوسقاليەۆپەن بىرگە, كادىمگى حيرۋرگيالىق وپەراتسيالاردان تىس, باۋىر, بۇيرەك اۋىستىرۋ وپەراتسيالارىنا دا قاتىستى. نۇربول تۇرسىنباەۆ – ترانسپلانتاتسيا جاساۋ ءادىسىن استاناعا العاش ەنگىزگەندەردىڭ قاتارىندا.
ماقساتىم – اۋرۋحانانىڭ جاعدايىن تۇزەۋ
نۇربول تۇرسىنباەۆ بيىلعى اقپان ايىنان باستاپ, №2 اقمولا وبلىستىق كلينيكالىق اۋرۋحانا باس دارىگەرىنىڭ ورىنباسارى بولىپ كەلدى. قازىرگى تاڭدا ەمدەۋ مەكەمەسىنىڭ باسشىسى قىزمەتىنەن كەتۋىنە بايلانىستى ول باس دارىگەردىڭ مىندەتىن اتقارىپ ءجۇر.
№2 اقمولا وبلىستىق اۋرۋحاناسى استانانىڭ ماڭايىندا ورنالاسقان تسەلينوگراد, ارشالى, ەرەيمەنتاۋ, استراحان, شورتاندى, ەگىندىكول اۋداندارىنىڭ, بارلىعى 200 مىڭداي تۇرعىنىنا مەديتسينالىق قىزمەت كورسەتەدى. مۇندا 7 بولىمشە بار. دارىگەرلەردىڭ ۇزىن-سانى – 60-قا جۋىقتايدى.
– وبلىستىق اۋرۋحانا استانادا ورنالاسقانىمەن, ماتەريالدىق-تەحنيكالىق بازاسى ەلوردالىق دەڭگەيگە ساي كەلمەيدى, – دەيدى نۇربول نۇرلانۇلى. بۇل اۋرۋحاناعا سوڭعى سەگىز جىلدا بىردە-ءبىر مەديتسينالىق قۇرىلعى ساتىپ الىنباعان. سىرقاتتاردى ءالى كۇنگە دەيىن ابدەن ەسكىرگەن تاسىلمەن ەمدەيدى. نۇربول تۇرسىنباەۆتىڭ الدىندا ەندى ۇلكەن جاۋاپكەرشىلىك تۇر. ونىڭ ماقساتى – اۋرۋحانانى اياعىنان تۇرعىزىپ, جوعارى مەديتسينالىق كومەك كورسەتەتىن زاماناۋي مەكەمەگە اينالدىرۋ.
– ءبىزدىڭ اۋرۋحانا اۋىل تۇرعىندارىنا قىزمەت كورسەتەدى. قالانىڭ ادامدارىنان گورى شالعاي اۋدان, اۋىل تۇرعىندارى جوعارى مەديتسينالىق كومەككە مۇقتاج. سوندىقتان بۇگىنگە دەيىن جيناعان ازدى-كوپتى تاجىريبەمدى وسى اۋرۋحانانىڭ جاعدايىن كوتەرۋگە جۇمساسام دەيمىن.. مەكەمەمىزدىڭ جاعدايى تۇزەلىپ, ەلگە پايدامىز ءتيىپ جاتسا, العا قويعان ماقساتىمنىڭ ورىندالعانى, – دەيدى نۇربول تۇرسىنباەۆ.
قازىر №2 اقمولا وبلىستىق كلينيكالىق اۋرۋحاناسىنىڭ ماتەريالدىق-تەحنيكالىق بازاسىن جاقسارتۋ ماقساتىندا ارنايى ستراتەگيالىق جوسپار جاسالىپ, بيزنەس-جوسپار بەكىتىلگەن. ازىرشە اۋرۋحانا تىزگىنىن ۇستاپ وتىرعان جاس باسشى دەمەۋشىلەر تاۋىپ, ەمدەۋ مەكەمەسىنىڭ مۇشكىل ءحالىن كوتەرۋ ءۇشىن تۇرىك مەملەكەتىنىڭ ىسكەر ازاماتتارىمەن كەلىسىمشارتتار جاساپ ۇلگەرىپتى.
قىمبات توقتامۇرات
