ەلوردادا COVID-19 ۆيرۋسىنىڭ تارالۋى جيىلەپ كەتتى. دەگەنمەن, قالا – ءالى دە «جاسىل ايماقتا». كەشە استانا قالاسى اكىمدىگىندە وتكەن ارنايى بريفينگتە ەلورداداعى كوروناۆيرۋس ينفەكتسياسىنىڭ تارالۋىنا قاتىستى مالىمەتتەر بەرىلدى.
استانا قالاسى سانيتارلىق-ەپيدەميولوگيالىق باقىلاۋ دەپارتامەنتى باسشىسىنىڭ ورىنباسارى جاننا پراليەۆانىڭ ايتۋىنشا, بيىل 24 قازاننان باستاپ ەلوردادا كوروناۆيرۋستىڭ تارالۋى بويىنشا ەپيدەميولوگيالىق جاعداي تۇراقتى ەمەس. تاۋلىگىنە 61-دەن 69-عا دەيىن دەرەك تىركەلىپ وتىر. ۆيرۋستىڭ تارالۋى جەلتوقساننىڭ 7 كۇنىندە قاراشامەن سالىستىرعاندا 4,6 ەسەگە ارتتى, ياعني 70-تەن 322-گە دەيىن ءوستى. سوڭعى اپتادا كوروناۆيرۋس جۇقتىرۋدىڭ 432 جاعدايى تىركەلدى. بۇل – الدىڭعى اپتامەن سالىستىرعاندا ەكى ەسە ارتىق.
– كوروناۆيرۋس ينفەكتسياسى مەن تۇماۋدىڭ تارالۋىنا بايلانىستى ۆيرۋسقا قارسى ۆاكتسينا الۋعا كەڭەس بەرەمىن. ەڭبەك ۇجىمدارىن, اتا-انالار, زەينەتكەرلەر مەن ستۋدەنتتەردى يممۋنيتەتتى ۋاقىتىلى قورعاۋعا شاقىرامىن. ۆيرۋستىڭ الدىن الۋدىڭ ەڭ ءتيىمدى ءادىسى – ۆاكتسيناتسيا, – دەيدى باس سانيتار دارىگەر.
وسى بريفينگتە استانا قالاسى قوعامدىق دەنساۋلىق ساقتاۋ باسقارماسى باسشىسىنىڭ ورىنباسارى بەرىك قايكەنوۆ كوروناۆيرۋس ينفەكتسياسىنا بايلانىستى قالادا 6 ينفەكتسيالىق ستاتسيونار جۇمىس ىستەپ تۇرعانىن جەتكىزدى. وندا 184 توسەك-ورىن بار. قازىر ينفەكتسيالىق ستاتسيونارلاردا 105 ادام جاتىر, جۇكتەمە – 53,8%. ونىڭ ىشىندە 85 پاتسيەنتتىڭ دەرتى راستالدى, قالعان 20 ادام پنەۆمونيادان ەمدەلۋدە. سونىمەن قاتار رەانيماتسيا بولىمىندە 7 پاتسيەنت ەم قابىلداۋدا.
– بۇگىندە كوروناۆيرۋسقا قارسى ۆاكتسينانىڭ 1-كومپونەنتىن 537863, ال 2-كومپونەنتتى 520822 ادام الدى. رەۆاكتسيناتسيادان 169 مىڭ ادام ءوتتى. كوروناۆيرۋستان ەمدەلگەننەن گورى ونىڭ الدىن العان دۇرىس. ۆيرۋستان ساقتانۋدا ۆاكتسينانىڭ ۇلكەن ءرول اتقاراتىنىن تاعى ءبىر ەسكە سالعىم كەلەدى. ۋاقتىلى ۆاكتسيناتسيا جانە رەۆاكتسيناتسيادان وتكەن ادام يممۋنيتەتى 90 پايىز جاعدايدا ىندەتكە ەركىن توتەپ بەرەدى. قازىر ەلوردادا 12 مىڭعا جۋىق ۆاكتسينا بار. ولاردىڭ قاتارىندا – كازۆاك, سينوفارم جانە پفايزەر. سول سياقتى بمسك ۇيىمدارىندا 34 ەكپە ەگۋ كابينەتى جۇمىس ىستەيدى, – دەيدى ب.قايكەنوۆ.
استانادا 1 قازاننان باستاپ جرۆي, ياعني جەدەل رەسپيراتورلىق ۆيرۋس ينفەكتسياسىنىڭ تارالۋى بويىنشا 42 022 جاعداي تىركەلدى. ودان بولەك, تۇماۋ دا قاتتى تارالۋدا. سوڭعى اپتادا جرۆي مەن تۇماۋدىڭ تارالۋىندا ءسال ءوسىم بايقالادى. جاس ەرەكشەلىكتەرىنە كەلسەك, سىرقاتتانۋشىلاردىڭ 54%-ى – 14 جاسقا دەيىنگى بالالار مەن جاسوسپىرىمدەر. ونىڭ 6 پايىزىن 1 جاسقا دەيىنگى سابيلەر قۇرايدى. ال جۇكتى ايەلدەر اراسىندا جرۆي مەن تۇماۋدىڭ تارالۋى 5%-عا جەتتى. جەدەل رەسپيراتورلى ۆيرۋس ينفەكتسياسىن جۇقتىرعانداردىڭ 5%-ى ستاتسيونارلىق جاعدايدا ەمدەلدى. مامانداردىڭ ايتۋىنشا, ەگەر جرۆي-گە ءبىر سىنىپ وقۋشىلارىنىڭ 20-30 پايىزى شالدىقسا, سىنىپتا وقۋ ۋاقىتشا توقتاتىلادى. ال سىنىپ وقۋشىلارىنىڭ ىندەتتى جۇقتىرۋ كورسەتكىشى 30 پايىزدان اسىپ كەتسە, مەكتەپتىڭ جۇمىسى ۋاقىتشا توقتاتىلادى.
